Ɗerewol ne Wepǝsãhmme
1 Me kwo ɗerewol macẽe ah jokǝsãh Dǝɓ mai mo kaa ɓo tǝ fakalle, ŋwǝǝ ɓo nǝkǝɓǝr ne kǝlal daŋ, kanra lamba ɓo tǝtǝl ah camcam rǝŋ. 2 Me kwo angelos maswah ah faa ɓǝ ne kyaŋ pǝ'manne: Azu ye kii ɓo nǝn pǝkoŋ 'wal lamba ah tǝkine gbǝr ɗerewol ah ne? 3 Amma koo dǝɓ vaŋno ma coksǝŋ, ma wo sǝrri, wala ma mor sǝrri, mai moo gak gbǝr ɗerewol ah ka ẽe ɓǝr ah kǝka. 4 Me yeyee pǝlli, mor lwaara koo dǝɓ vaŋno ma gak gbǝr ɗerewol ah ka ẽe cok ga ɓǝr ah ya. 5 Dǝɓ vaŋno kǝsyil zaluu faa nyi me: Mo yeyee ka. Mo ẽe ɗǝ, Ɓol zahban Yuda, morsǝ̃ǝ goŋ David, pa mai mo kaa swah ɓo, a gak 'wal lamba ah matǝ rǝŋ tǝkine gak gbǝr ɗerewol ahe.
6 So me kwo Wepǝsãhm uu ɓo kǝsyil fakal ahe, fan ma ne cee matǝ nai tǝkine zaluu ryaŋra ko ɓoo ɓo kǝsyilli. Wepǝsãhm ah tǝgbana ŋgoŋ ɓo, a ne ciŋ rǝŋ ne nahnǝn rǝŋ, ara ye tǝ'yak Masǝŋ matǝ rǝŋ mai Masǝŋ mo pee ra ɓo wo sǝr daŋ. 7 Wepǝsãhm syee ge ɓaŋ ɗerewol mai mo jokǝsãh Dǝɓ mai mo kaa ɓo tǝ fakalle. 8 Ne cok mo ge ɓaŋ ɗerewol ah naiko, fan matǝ nai ma ne cee tǝkine zaluu jemma gwa tǝ nai keara ge sǝŋ pel Wepǝsãhm ne zahciŋɓalle. Zune kǝsyil ɓǝǝ daŋ a ne tǝnjuŋ jolle, tǝkine tahsah ma vãm kaŋnyeeri, ɓǝrdi baa ɓo gŋ cyõ, ako ye juupel za Masǝŋ. 9 Ɗǝǝra lǝŋ mafuu ah faara:
Mo kii nǝn pǝkoŋ ɓaŋ ɗerewol ah tǝkine 'wal lamba ah ɓe,
Mor yea ŋgoŋra mo ɓo,
Mor mo lee dǝfuu daŋ nyi Masǝŋ ne syim suu ɓo,
Daga zahban camcam, za camcam, ne zah camcam tǝkine za sǝr daŋ.
10 Amo joŋ ra ciŋ za goŋe, ne za joŋzahsyiŋrĩ,
Mor ka joŋ yeɓ mor Masǝŋ mana,
A ga kaara goŋ tǝ sǝrri.
11 Me so kwo fan faɗa, me laa kyaŋ angeloi pǝlli, pãa ɓǝǝ a ujenere jemma zahlǝŋ ujenere jemma, so ujenere, ujenere. Ryaŋra fakal ɓo ne fan ma ne cee matǝ nai tǝkine zaluuri. 12 Ɗǝǝra lǝŋ ne kyaŋ lii faara: Wepǝsãhm mai mo ŋgoŋra ɓo kii ɓo nǝn pǝkoŋ ka lwaa swahe, kǝ̃ǝre, fatanne, swah suu, yiini, yǝkki, tǝkine osoko.
13 So me laa fan mai Masǝŋ mo joŋ daŋ, ma coksǝŋ, ne ma tǝ sǝrri, ma mor sǝrri, tǝkine ma mor bii, fan mai mo joŋ ɓo ne lii ah daŋ, a ɗǝǝra lǝŋ cor Dǝɓ mai mo kaa ɓo tǝ fakal ne ko tǝkine Wepǝsãhmme, a faara: Osoko, yiini, yǝkki, tǝkine swah daŋ ma ɓo ye ga lii ga lii!
14 Fan ma ne cee matǝ nai a zyiira: Amen! So zaluu a keara sǝŋ ne zahciŋɓal juura pelle.
© Bible Moundang © Alliance Biblique du Tchad, 1996.
