'Yah Masǝŋ
1 Lǝŋ David.
Mazwãhsuu ɓe ne fan suu ɓe daŋ, we yii tǝɗii Dǝɓlii mayǝkki!
2 Mazwãhsuu ɓe, mo yii Dǝɓlii,
Mo yaŋ yeɓ sãh ah mo joŋ wo ɓo koo vaŋno ka.
3 Ako ye rwah ɓǝɓe' ɓe daŋ,
A laɓ syem ɓe daŋ ta.
4 A ǝ̃ǝ me gin zah wulli,
A 'yah me ne joŋ gboŋgboŋ wo ɓe tǝkine kwan syak tǝ ɓe.
5 A kǝ̃ǝ me ne fan sãhe,
Ako ye joŋ me soo laŋ ɓo tǝgbana wowooro.
6 Dǝɓlii a joŋ fan njaŋ,
A joŋ fan sãh wo za ma pǝ bone.
7 Dǝɓlii cuu ɓǝ foo fan mai mo tǝ ga joŋ daŋ nyi Mosus,
So soɓ za Israel kwora yeɓ ah matǝ gǝriŋ mo joŋko.
8 Dǝɓlii ne 'yahe,
Ako ye pa kwan syakke,
Ka ɓaŋ kpãh gwari ya,
A ne 'yah pǝlli.
9 Dǝɓlii ka faŋ val a,
Ka kaa ne kpãh ga lii ya.
10 Ka joŋ wo man tǝgbana faɓe' man a,
Ka faŋ val tǝ man tǝgbana ɓǝɓe' man naa joŋ ya.
11 Tǝgbana tǝlǝǝ sǝŋ mo no pǝɗǝk ne sǝrri,
Nai ta, Masǝŋ a joŋ ɓǝ 'nyah pǝ'man wo za mai moo ɗuura ko.
12 Tǝgbana morcomzah'nan mo ɗǝǝ ɓo pǝɗǝk ne morcomlilli,
Dǝɓlii ga woŋ faɓe' man pǝɗǝk ne na nai ta.
13 Tǝgbana pah wee moo kwan syak tǝ wee ahe,
Dǝɓlii kwan syak tǝ za mai moo ɗuura ko nai ta.
14 Mor ako tǝ na ɓe,
Tǝ ɓe, ana ye vuuri.
15 Zah'nan cee dǝfuu a tǝgbana fãa,
A na fãi fanne.
16 Zyak sǝŋ mo nǝǝ ɓe, a yakke,
Dǝɓ ka tan cok ah yao.
Dǝfuu laŋ a nai ta.
17-18 Amma Dǝɓlii a joŋ ɓǝ sãh wo za mai moo ɗuura ko cẽecẽe,
A kwan syak tǝ wee ɓǝr za mai moo gbanra ɓǝ ah tǝkine laa zah ahe.
19 Dǝɓlii zyeɓ fakal goŋ ah ɓo coksǝŋ,
Kaa goŋ ɓo tǝ fan daŋ.
20 Awe zapee ma coksǝŋ maswah mai we tǝ joŋ yeɓ Dǝɓlii ɓii ne laa zah ah daŋ, we yii ko.
21 Awe za yeɓ Dǝɓlii mai we tǝ joŋ 'yah ah daŋ, we yii ko.
22 Fan mai Dǝɓlii mo joŋ ɓo mo no mor swah ah daŋ, we yii ko.
Mazwãhsuu ɓe, mo yii Dǝɓlii!
© Bible Moundang © Alliance Biblique du Tchad, 1996.
