Ɓǝ faa ɓǝǝ kǝsyil ki patǝ sai ahe (22:1-27:23)
Ɓǝ faa Elifas
1-2 Yella dǝfuu a gak joŋ fan ki wo Masǝŋ no ne? 3 Njaŋ ɓo a ne reba wo Masǝŋ no ne? Wala fan joŋ sãh ɓo a ga gbah jol ah ne? 4 Masǝŋ ka tǝ lai mo mor mo tǝ ɗuu ko ya, ka tǝ lii mo ne bone mor ah ya ta. 5 Tǝ joŋ mo nai mor mo joŋ faɓe' ɓo pǝlli, tǝkine ɓǝ maɓea ah mai mo joŋ camcam. 6 Amo nyiŋ fan jol wee pa ɓo ra ne hǝram, mo wǝǝ fan wo suu ɓǝǝ mo soɓ ra ɓaa tǝkolle. 7 Amo ka zyii nyi bii ɓo nyi za matǝ jok ah zwan a. Mo ka zyii nyi farel nyi za mai mo ne koŋ ren a ta. 8 Amo cuu swah ɓo tǝkine yǝk ɓo mo nyiŋ sǝr jol za ne ko. 9 Mo ka zyii gbah jol ŋwǝǝ wul a, so mo woo fan jol wee syel tǝkine syẽa ra. 10 Zǝzǝ̃ǝko mǝmmǝǝ saa ryaŋ zah ɓo ɓo, so gal tǝŋ ren mo ne pel pǝ'man sǝ. 11 Cok foo nahnǝn ɓo tǝnjǝŋ, mo ka gak kwan cok ya, so bii malii ah ge tǝ ɓo ge jǝŋ mo kǝɗ.
12 Masǝŋ kaa ɓo ka coksǝŋ pǝɗǝk ko so ẽe ŋwǝǝmǝŋgai gin sǝŋ ya ne? 13 Amo so faa: Masǝŋ tǝ ɓǝ ah gin kẽne? Swãh rii nǝn ah ɓo, a gak ŋgoŋ kiita tǝ man ne? 14 Amo lǝŋ zahyii swãh moo kwan pǝyǝk a cak ko, ka gak kwo cok gin a, a kyãh tǝ zahsyee sǝr ne coksǝŋ ŋhaa sǝ.
15 Ɓǝ foo ɓo joŋ mo ɓo ka ɓaŋ tǝbǝlam za maɓea ah mo syeera ɓo gŋ kǝpel ɓaaɓe ne? 16 Ka zah'nan ɓǝǝ ge laŋ ya ba, bii ge ik ra tǝɗe'. 17 Za mai mo 'yahra Masǝŋ ya a lǝŋra Masǝŋ ka joŋ fan ki wo ɓǝǝr a. 18 So Masǝŋ ye nyi joŋ ɓo nyi ra. Me ka gak laa mor ɓǝ foo za faɓe' ya. 19 Ne cok za matǝ goŋga ne za ma bai ɓǝɓe' mo kwora Masǝŋ mo ŋgoŋ kiita tǝ za faɓe' ɓe, a laara pǝ'nyah tǝkine syesyakke. 20 Fan za faɓe' daŋ a ga vǝrri, fan ah mai mo soɓko ɓo daŋ wii ga sye tǝɗe'.
21 Joɓ, zǝzǝ̃ǝ mo zyeɓ ɓǝ ɓo ne Masǝŋ ka mo yea jam ne ki, mo soɓ fahlii mai mo joŋ ko ɓo na pa syiŋ ɓo ɓoo. Mo joŋ nai ɓe, a ga ǝ̃ǝ mo. 22 Mo nyiŋ ɓǝ mai mo cuuko ɓo nyi mo, mo gbǝ ɓǝ faa ah pǝ zahzyil ɓo. 23 Oho, sai mo wonsuu ɓo mo pii soo ge wo Masǝŋ, mo soɓ ɓǝɓe' mai mo tǝ joŋ ɓǝr yaŋ ɓo daŋ, mo i zah ahe. 24 Mo ɓoo vãm kaŋnyeeri ɓo ge lalle, mo 'nǝǝ vãm kaŋnyeeri ɓo masãh ge tǝgǝǝ tǝsal pǝ elle. 25 Mo soɓ Masǝŋ ma ne swah daŋ mo yeako vãm kaŋnyeeri ne vãm solai ɓo. 26 Mo nai ɓe, cẽecẽe mo ga soɓ suu ɓo wol ahe, so mo ga tǝ, ako ye pa ma joŋ mo laa pǝ'nyahre. 27 Ne cok mo juupel wol ah ɓe, a ga zyii zah ɓo, so ka mo joŋ ɓǝ gbanzah mai mo gbǝ ɓo pel ahe. 28 Mo ga yea ne pejii pǝ fan joŋ ɓo daŋ, cokfãi ga sǝǝ pel ɓo tǝ fahlii ɓo moo ga syee gŋ daŋ. 29 Masǝŋ a tǝr pa ma yii suu, a ǝ̃ǝ dǝɓ ma wonsuu ahe. 30 Amo, mo bai ɓǝ ɓe, fan joŋ ɓo mo njaŋ ɓe, a ga ǝ̃ǝ mo.
© Bible Moundang © Alliance Biblique du Tchad, 1996.
