1 Mo tǝ 'yah ka nǝǝ fan kǝsyil tǝɗii masãh ah ne joŋ ɓe, mo nǝǝ tǝɗii sãhe. 2 Pa joŋ ne pa syak ara zahki, mor Dǝɓlii ye joŋ ra gwa daŋ. 3 Dǝɓ ma ne tǝtǝl mo kwo gaɓ mo tǝ gin pel ah ɓe, a ɗuu muŋni, amma dǝɓ ma bai tǝtǝl a syee ga haihai, ŋhaa a ga dan gaɓ ahe.
4 Mo ɗuu Dǝɓlii, mo wonsuu ɓo, mo ga lwaa fanne, yǝkki, mo ga nǝn wo sǝrri. 5 Mo tǝ 'yah cee suu ɓo ɓe, mo byak suu ɓo kah mǝmmǝǝ mai moo gbah za faɓe' tǝ fahlii. 6 Mo cuu fahlii mai we moo ga ɓaŋ nyi ko, koo mo ge tamko ɓe laŋ, ka ga soɓ ɓoo ya. 7 Za syak ara ye byak za joŋne, mo ɓaŋ val jol dǝɓ ɓe, ka mo ye byak dǝɓ ahe. 8 Dǝɓ mo ruu nah ɓǝɓe' ɓe, tǝbyaŋ ah ye ɓǝ gaɓɓe, a ga lwaa kiita pǝ'man tǝ ɓǝ ah a muŋ.
9 Mo nyi fanne, mo woŋ farel ɓo ne pa syakke, Masǝŋ ga ẽe mo mor ahe. 10 Mo nĩi pa lah suu yaŋ ɓo ge lalle. Mo joŋ nai ɓe, bal ka ga yea ya, tǝnyee ne ɓǝ ren swãa laŋ ka ga yea ya ta.
11 Mo gak gbǝ bai ne goŋ mor mo tǝ ɓǝ faa zah 'nyah ɓo, amma Dǝɓlii a 'yah dǝɓ tǝ goŋga. 12 Nahnǝn Dǝɓlii a byak fatan dǝɓ matǝ goŋga, amma a ga ɓeɓ ɓǝ faa dǝɓ matǝ vǝrvǝrri. 13 Vǝǝkoi a dan kaa yaŋ, a faa zye pǝ̃ǝ ge lal ɓe, ɓol ga gbǝ zye tǝ fahlii tǝgǝǝ yaŋ. 14 Ɓǝ faa zah ma tǝkoi a tǝgbana lak maɗǝk ahe, za mai Dǝɓlii mo ɓoo zahyee ɓo nyi ra daŋ a leara ga gŋ. 15 Tǝgwĩi tǝkine ɓǝ maɓe' ah a pǝ zahzyil wee nyee daŋ, amma mo loɓ ko pǝsãh ɓe, a ga pǝ̃ǝ wol ah ga lalle. 16 Mo kal nyi fan nyi pa joŋne, wala pa ma cuu bone nyi pa syakke, ka amo ne suu ɓo sǝ mo ga yea pǝsyakke.
Ɓǝ matǝ jemma sai mai za fatan mo faa ɓo
17 Mo syii sokki, me ga cuu fan mai za fatan mo faara ɓǝ ah ɓo nyi mo, ka mo fee ɓǝ faa ɓǝǝra. 18 Mo tǝ foo ɓǝ ah mo so tǝ jin kee ɓe, mo ga laa pǝ'nyahre. 19 Me 'yah mo soɓ suu ɓo wo Dǝɓlii, mor ah me tǝ ga faa ɓǝ ah nyi mo zǝzǝ̃ǝko. 20 Ame ŋwǝǝ ɓǝ ɓo mor ɓo camcam jemma sai, fatan tǝkine yella masãh ah ra daŋ a gŋ. 21 Me ga cuu fan masãh ah ra ne matǝ goŋga ah nyi mo, ka mo so ɓaŋ ɓǝ ah ge kee ɓǝ ah nyi dǝɓ mai mo pee mo ge.
-1-
22 Mo nyiŋ fan jol pa syak ne swah mor pa syak yo ka, mo ɓeɓ ɓǝ kiita dǝɓ matǝtǝ̃ǝ ah pǝ cok kiita ka. 23 Mor Dǝɓlii ga zyii ɓǝ ga mor ɓǝǝra. A ga joŋ ɓe' wo za mai mo joŋ ra pǝɓe' ta.
-2-
24 Mo joŋ bai ne dǝɓ ma ɓaŋ kpãh lii ka, 25 mor ka mo cii ne fan joŋ ah ka mo so jin joŋ fan na ko ka.
-3-
26 Mo nyiŋ ɓǝ val dǝɓ ki kan ge tǝtǝl ɓo ka. 27 Mor mo ka ne fan ka soo ɓǝ ah ne ya ɓe, a ga woora faswul ɓo kal ne ko.
-4-
28 Mo tǝɓ zahsyee mai pa ɓo lii ra mo kan ka.
-5-
29 Mo kwo dǝɓ mai mo tǝ yeɓ ɓo pǝsãh mo pǝ yeɓ ah ɓe, ka mo tǝ, a ga lwaa cok pel za goŋe, ka ga yea kǝsyil za makol ah ya.
© Bible Moundang © Alliance Biblique du Tchad, 1996.
