Yeyee wulli
1 Awe, we ye za mǝ Dǝɓlii Masǝŋ ɓiiri. Ne cok dǝɓ mo wǝ we tǝ yeyee wul ah ɓe, we ɗea suu ɓii ne nyah ka, wala we sõo tǝtǝl ka. 2 Awe ye mǝ Dǝɓlii Masǝŋ ɓiiri, ako ye nǝǝ we ɓo kǝsyil za sǝr daŋ ka we ciŋ za mǝ ahe.
Faɓal mai mo ka ne 'nahm ya ne ma ne 'nahmme
(Lew 11:1-47)3 We re fan mai Dǝɓlii Masǝŋ ɓii mo faa ɓo a ne 'nahmme ka. 4 Fan mai ka we re nǝǝ ah a naiko: dǝǝ, pǝsǝ̃ǝre, sǝgwii, 5 nǝǝminni, tǝsai, magwiiŋgaɓɓe, ne baŋne. 6 Faɓal mai daŋ fyãh ɓal ɓǝǝ mo sǝǝ ɓo, so moo guura wommi. 7 Amma ne daŋ laŋ, we re nǝǝ fan mai mo sǝǝ fyãh ɓal ɓo to, wala moo guu wom to ka. We re nǝǝ njoŋnjoŋ ka, we re cõi wala tǝkpiiwa ka, we kwo fan ah ra na a ne 'nahm wo Dǝɓlii, a guura wommi, amma fyãh ɓal ɓǝǝ sǝǝ ya. 8 We re bil ka, we kwo na a ne 'nahmme, fyãh ɓal ɓǝǝ sǝǝ ɓo, amma ka guura wom ya, we re nǝǝ fan marai ka, wala we juu wul ɓǝǝ laŋ ka.
9 We re zahban syiŋ mai daŋ mo ne kãm tǝkine tǝzyeere. 10 Amma fan mai daŋ mo pǝ bii, mo ka ne kãm ne tǝzyee ya daŋ, we re ka, we kwo fan ah ra na a ne 'nahmme.
11 Juu mai mo ka ne 'nahm ya daŋ we re. 12-18 Zahban juu mai ka we re ka a naiko: matǝrri, woŋguu, markwakke, tǝkelle, mavakmǝrrĩ, vakke, tǝmgbuuri, majuulii, mandahtǝfoofoo, makãhgoŋe, makǝrãhmo, weeweero, majuurãhsyiŋ, kyaŋsyiirǝŋ, ne kǝcwakdahɗǝ. Vakke
19 So fan manyee ah mai moo zwǝǝra ne yee daŋ we re ka, a ne 'nahmme. 20 Amma we re fan ma zwǝǝ ne yee masãh ah ra to. 21 Nǝǝ mai mo wǝ ɓo wǝ daŋ we re ka, we nyi nyi za gwǝǝ mai mo kaara ɓo kǝsyil ɓii re, wala we lee fan ne jol za ki. Mor awe ye mǝ Dǝɓlii Masǝŋ ɓiiri, we ye zan ahe.
We kǝǝ nǝǝ we pǝsãhm wala we sǝgwii ne won mah ah daŋ ka .
Ɓǝ lai nyi patǝ jemma fanne
22 Pǝzyil syii daŋ we nyi patǝ jemma fakpãhpǝǝ mai daŋ 'wah ɓii mo joŋ ɓo nyi we. 23 So ka we ge pǝ cok mai Dǝɓlii Masǝŋ ɓii mo nǝǝ ɓo ka za mo ge juupel wol ah gŋ ne ko, ka we re patǝ jemma sor ɓii, ne mǝ bii lee kpuu vin, ne mǝ nǝmmi, mǝ we dǝǝ ɓii ma byaŋ kǝpel ne mǝ gwii daŋ pel ah gŋ ŋhaako. We joŋ naiko, mor ka cẽecẽe we fee ɗuu gal Dǝɓlii Masǝŋ ɓiiri. 24 So we gak ka woo patǝ jemma fakpãhpǝǝ mai Dǝɓlii Masǝŋ ɓii mo ẽe we ɓo ne ga pǝ cok juupel ne ya mor we kaa ɓo pǝɗǝk ne cok ah ɓe, 25 ka we lea lak ne fakpãhpǝǝ ahe, ka we woo lak ah mor jol we ge pǝ cok juupel ne ko, 26 ka we lea fan mai zahzyil ɓii mo 'yah daŋ ne lak ahe: dǝǝ, gwii, bii lee kpuu vin, ne yimmi, ka awe ne za yaŋ ɓii daŋ we re, we zwah gŋ ŋhaa pel Dǝɓlii Masǝŋ ɓii we laa pǝ'nyahre.
27 We yaŋ Lewitien mai mo kaara ɓo pǝ yaŋ ɓii maluu ra ka, mor ara ka ne sǝr ma syak ɓǝǝr a. 28 Syii sai mo joŋ ɓe daŋ, ka we woo patǝ jemma fakpãhpǝǝ ɓii mai we tai ɓo yaŋ ɓii ra daŋ ge ne ko. 29 Farel ah ra mǝ Lewitien yo, mor ara ka ne sǝr kǝsyil ɓii ya, so a mor za gwǝǝre, wee syelle, ne ŋwǝǝ wul mai mo kaara ɓo ne we pǝ yaŋ ɓii maluu ra. Ka ara daŋ mo gera, ka mo rera. We joŋ naiko, Dǝɓlii Masǝŋ ɓii a ga ẽe we pǝzyil fan daŋ mai wee joŋni.
© Bible Moundang © Alliance Biblique du Tchad, 1996.
