Ezra kee ɓǝ lai nyi zana
1 Ne fĩi patǝ rǝŋ ah za Israel mo kaara ɓo yaŋ ɓǝǝ maluu ne manyee ah ra. Ne zah'nan patǝ vaŋno ah pǝzyil fĩi ahe, taira ge yaŋ Jerusalem pǝ cok matǝ gbai ah mai mo zahfah Bii. Za fiira pa joŋzahsyiŋ Ezra, pa cuu ɓǝ lai mai Dǝɓlii mo nyi nyi za Israel ne jol Mosus, ka mo ɓaŋko ɗerewol Ɓǝ Lai ge ne ko. 2 Ezra ge ɓaŋ ɗerewol Ɓǝ Lai ge pǝ cok mai za pãa mo taira ɓo gŋ: za wǝǝre, ŋwǝǝre, ne wee manyee mai mo joŋra zaluu nǝn laa ɓǝ ɓe. 3 Kee ɗerewol Ɓǝ Lai nyi ra pǝ cok matǝ gbai ah mo zahfah Bii. Tǝŋ daga zah'nan pim ŋhaa dai com kǝsyitǝtǝlli, za daŋ syiira sok laa ɓǝ ahe.
4 Ezra yee uu pǝ cok ma sǝŋ ah mai mo zyeɓra ɓo ka uu gŋ ne cok ahe. So za mai mo uura kah ah nǝjokǝsãh ye Matatias, Sema, Anaja, Urias, Hilkiija, ne Maaseja. So za mai mo uura fah jokǝlǝɓai ah ye Pedaja, Miskal, Malkia, Hasum, Hasbadana, Zakarias, ne Mesulam.
5 Ne cok Ezra mo yee uu pǝ cok ma sǝŋ ah mo zyeɓra ɓo, ara daŋ woora nahnǝn rǝk ge wol ahe, so ne cok mo gbǝr ɗerewol nai sǝ, za daŋ urra sǝŋ yu. 6 Ezra yii Dǝɓlii faa: Osoko Dǝɓlii Masǝŋ mayǝkki. So za pãa daŋ woora jol ɓǝǝ ge sǝŋ, zyiira faa: Amen, Amen. So keara ge sǝŋ ne zahciŋɓalle, ɗǝmra zahpel ge tǝ sǝrri, yiira Masǝŋ.
7 Za so urra uu sǝŋ pǝ cok ɓǝǝra. Lewitien manyeeki ah cuura mor ɓǝ lai nyi ra. Zan ah ra ye Joswa, Bani, Serebia, Jamin, Akkuɓ, Saɓtai, Hodia, Maaseja, Kelita, Azaria, Jozabad, Hanan, ne Pelaja. 8 A keera ɓǝ lai, a so ferra, a cuura mor ɓǝ ah nyi za ka mo laara pǝsãhe.
9 Ne cok za mo laara ɓǝ mai ɓǝ lai mo cuu ɓo, za laŋra ne lii ɓǝǝ daŋ corroroo, tǝŋ yera yee. So Nehemias, Ezra, ne Lewitien mai mo tǝ cuura ɓǝ lai nyi ra faara nyi zana: Zah'nan mai a daŋdaŋ wo Dǝɓlii Masǝŋ ɓiiri, zahzyil mo nǝǝ we wala yeyee ka. 10 Zǝzǝ̃ǝ mai we pii soo ge yaŋ ɓiiri, we ge joŋ fĩi, we re farel ne fazwan ne za mai ara mo ka ne pǝlli ya. Zah'nan ma tǝ'nah a daŋdaŋ mor Dǝɓlii mana, we swaa ɓǝ ka. Laa pǝ'nyah mai Dǝɓlii mo nyi ɓo nyi we, ɓǝ ah ga joŋ we yea pǝswahe.
11 Lewitien ge yeera zah zana, faara nyi ra: We swaa ɓǝ ka, mor zah'nan mai a daŋdaŋ. 12 So za daŋ kalra ge yaŋ ɓǝǝra, rera fan ne zwah fan ne laa pǝ'nyahre, peara fan ah ra ge nyi za ki ta, mor laara ɓǝ mai mo keera nyi ra ɓe.
Fĩi julli
13 Tǝ'nan ah zaluu ma morsǝ̃ǝ za camcam, ne za joŋzahsyiŋ ne Lewitien taira ge wo Ezra ka fee ɓǝ lai. 14 So lwaara pǝ ɗerewol Ɓǝ Lai mai Dǝɓlii mo nyi ne jol Mosus, faa ɓo nyi za Israel daŋ, ne cok mo tǝ joŋra fĩi jul ɓe, ka mo kaara pǝ julli. 15 So ka mo laira ɓǝ, mo peera pee yaŋ Jerusalem, ne yaŋ maluu manyeeki ah ne yaŋ manyee ah ra daŋ faa: We ge tǝ waare, ka we hah jol kpuu tǝbaakãm ma pǝ 'wah ne ma lal daŋ ge ne ko, ne goo kpuu dabonooje, ne goo kpuu ma ɗii ne mirte ne goo kpuu manyeeki ah daŋ ge ne ka gbah jul ne tǝgbana mai ɓǝ ah mo ŋwǝǝ ɓo pǝ ɗerewol Ɓǝ Lai.
16 Za so gera ne goo kpuu, gbahra jul ne zahdǝǝ sǝŋ tǝ yaŋ ɓǝǝ camcam, wala zahpiicel ɓǝǝra, wala ɓǝr pedǝǝ yaŋ Masǝŋ, ne pǝ cok matǝ gbai ah zahfah Bii, ne zahfah Benyaamin. 17 Za mai mo pii soora gin pǝ byak ge daŋ gbahra jul kaara gŋ. Daga ne cok zah'nan Joswa we Nun, ŋhaa ge dai com ahe, za Israel joŋra na moo taa ya. Za daŋ laara pǝ'nyah pǝlli. 18 Tǝŋ daga zah'nan joŋ fĩi ah patǝ vaŋno ahe, ŋhaa vǝr ahe, Ezra a kee ɗerewol Ɓǝ Lai Masǝŋ nyi ra zah'nan daŋ. Joŋra fĩi ah zah'nan rǝŋ, ne zah'nan patǝ nama, so joŋra tai ma in zah fĩi ah tǝgbana ɓǝ lai mo faa ɓo.
© Bible Moundang © Alliance Biblique du Tchad, 1996.
