Nĩi dǝɓ kǝsyil za Dǝɓlii ga lalle
1 Dǝɓ mai mo syẽe yo, wala far ah mo ŋgoŋ ge ɓo lalle, mo nĩira ko kǝsyil za Dǝɓlii ge lalle.
2 We ɓil lalle, wala mo morsǝ̃ǝ ah yo, koo mo dai zahŋhǝǝtǝ̃ǝ jemma laŋ, mo nĩira ko kǝsyil za Dǝɓlii ge lalle.
3 Koo Ammonien wala Moabien, koo mo morsǝ̃ǝ ɓǝǝ yo, mo dai zahŋhǝǝtǝ̃ǝ jemma laŋ, ka taira ne za Dǝɓlii ya. 4 Mor ne cok we pǝ̃ǝ gin sǝr Egiɓ, zyii ka nyira farel nyi we ne bii zwan a, so soora Bileam we Beor ma yaŋ Petor sǝr Mesopotamia ne lak ka mo ɓooko zahyee nyi we. 5 Amma Dǝɓlii Masǝŋ ɓii zyii laa ɓǝ Bileam ya, fer zahyee ah mo ɓoo nyi we ciŋ ẽere, mor tǝ 'yah we. 6 Pǝ zah'nan cee ɓii we kaa ɓo wo sǝr nyee daŋ, we gbah jol ɓǝǝ ka mo yeara jam ka syaŋsyaŋ.
7 We syẽa Edomien ka, mor ara ye zum ɓiiri. We syẽa za sǝr Egiɓ ka ta, mor we yea kaa ɓo sǝr ɓǝǝra. 8 Morsǝ̃ǝ ɓǝǝ ne zahŋhǝǝtǝ̃ǝ patǝ sai ah ɓe, a gak taira ki ne za Dǝɓlii.
Ɓǝ lai tǝ ɓǝ zahjul salle
9 Ne cok we gbah jul sal ɓo lal ne cok sal ɓe, we joŋ fan ma ren swãa ah mai moo joŋ we yea pel Dǝɓlii ne 'nahm gŋ ka. 10 Dǝɓ mo joŋ suu ah ne 'nahm mor lolom ɓo tǝ nǝm ne suŋ ɓe, ka mo pǝ̃ǝko zahjul sal ge lalle, mo kaako gŋ ŋhaako. 11 Ka ne lil ah ɓe, ka mo erko bii, ka com mo dan ɓe, mo piiko soo ge zahjulli.
12 We zyeɓ cok fahfal zahjul lalle, ka we kaa lal ge gŋ ŋhaako. 13 Koo zune daŋ mo yeako ne fan cii fan kǝsyil fan yeɓ ahe, ka lal mo gaɓ ko mo ge kaako ɓe, ka mo ciiko lak ne njǝk ge gŋ. 14 We gbǝ zahjul pǝsãhe, ka mo yea ne 'nahm ka, mor Dǝɓlii Masǝŋ ɓii a no ne we zahjul ka byak we, ka joŋ we kaa kacella tǝ za syiŋ ɓiiri. We joŋ fan ma ren swãa ah mai moo gak joŋ Dǝɓlii jiŋ fahfal ɓoo nyi we ka.
Ɓǝ lai camcam
15 Byak mo ɗuu gin wo pah yaŋ ah mo ge wo ɓo ka zye ǝ̃ǝ ɓe, mo soɓ ko pee ge nyi pah yaŋ ah ka. 16 We soɓ mo kaako kǝsyil ɓii pǝ yaŋ makẽne daŋ mo nǝǝko, we joŋ ko pǝɓe' ka.
17 Mo dǝɓ Israel o, wala mo madǝwin ah yo, mo joŋko tǝkoi ka. 18 So lak ma tǝ tǝkoi ma morãi we ɓaŋ ge yaŋ Dǝɓlii Masǝŋ ɓii ne ka soo tǝ ɓǝ gbanzah ɓii we gbǝ ɓo ne ka, we joŋ nai ka, Dǝɓlii syiŋ ɓǝ tǝkoi ma morãi ɓo syiŋ.
19 Ne cok we nyi val lakre, wala val farelle, wala mo val fan maki ah cam yo, nyi dǝɓ Israel na we ɓe, we ɓoo bii ah ge nyi gŋ ka. 20 We ɓaa bii ah ge nyi za gwǝǝ gŋ mgbaŋ, amma we ɓoo ge nyi dǝɓ Israel na we ta gŋ ka. We syee mor ɓǝ lai maiko, Dǝɓlii Masǝŋ ɓii a ga ẽe we pǝ fan daŋ mai wee ga joŋ pǝ sǝr mai we tǝ ga gŋ ka renne.
21 Ne cok we gbǝ zah pel Dǝɓlii Masǝŋ ɓii ne ɓǝ joŋ fan ɓe, we pee bai joŋ fan ah ka, mor Dǝɓlii ka pee bai fii ɓǝ gbanzah ah ya. Mor dǝɓ mo gbǝ zah pel Dǝɓlii ka joŋ fanne, mo joŋ ya ɓe, faɓe' yo. 22 We gbǝ zah pel Dǝɓlii ne ɓǝ fan a laŋ, faɓe' ye ka. 23 Amma fan mai we gbǝ zah ɓo pel Dǝɓlii tǝ ɓǝ ah ne 'yahe, we joŋ fan ah baa ge cok ahe.
24 Ne cok we tǝ syee pǝ 'wah kpuu vin dǝɓ Israel na we ɓe, we re lee kpuu vin mai daŋ zahzyil ɓii mo 'yahe, amma we woo ge pǝ kee ka kal ne ka. 25 Ne cok we tǝ kyãh pǝ 'wah sor dǝɓ Israel na we ɓe, we gak hah sor mai we ne 'yah ah daŋ ka soŋni, amma we ce sor ah ne gwǝǝ ka.
© Bible Moundang © Alliance Biblique du Tchad, 1996.
