Haozah woli
1 Ame dǝɓlii eklesia, me pee leetǝr wo mawin mai Masǝŋ mo nǝǝ ɓo ne wee ahe , mai me tǝ 'yah ra ne goŋga. Ame ye ka tǝ 'yah we syak ɓe to ya, amma za mai mo tǝra goŋga ɓo daŋ tǝ 'yahra we, 2 mor goŋga mai mo pǝ zahzyil mana, a yea ne na ga lii.
3 Masǝŋ Pamme, ne Wel ah Yesu Kristu mo joŋ gboŋgboŋ wo mana, ne kwan syak tǝ man tǝkine nyi jam nyi na, mor ka na kaa ne fan ɗǝǝ marai ne goŋga tǝkine 'yahe.
Goŋga ne 'yahe
4 Me laa pǝ'nyah pǝlli, mor me lwaa wee ɓo manyeeki ah tǝ syeera mor goŋga tǝgbana mai Pam mo faa ɓo nyi na. 5 Zǝzǝ̃ǝko me tǝ pǝǝ mo mawinni: na 'yah ki. Ɓǝ lai mafuu ah ye ka me so tǝ ŋwǝǝ nyi mo ya, amma ɓǝ lai mai na ne daga tǝtǝŋ ah sǝ yo. 6 'Yah mai me tǝ faa ɓǝ ah nyi mo sye, ako ye mai ka na syee na ɓǝ lai Masǝŋ mo faa ɓo. So ɓǝ lai mai we laa ɓo daga tǝtǝŋ ahe, ako ye mai mo faa: we yea ne 'yahe.
7 Za maber ah pǝlli myahra ɓo wo sǝr ne lii ah daŋ. Ka tǝ zyii nyiŋra Yesu Kristu ge ɓaŋ suu na suu dǝfuu 'manna 'manna ya. Dǝɓ mai mo tǝ faa nai daŋ ka pa ber o, pa syiŋ Kristu yo. 8 We byak suu ɓiiri, mor ka lee syẽm yeɓ ɓii mo ge muŋ ka, amma ka we ge lwaa soo ah tǝɗe'.
9 Koo zune mo uu ɓo ka tǝ ɓǝ cuu Kristu ya, amma mo kal cak ge ɓo cok ki cam ɓe, ka ka ne Masǝŋ ya. Koo zune mo uu ɓo tǝ ɓǝ cuu ah ɓe, ka a ne Pam ne Wel ah gwa daŋ. 10 Dǝɓ ki mo ge wo ɓii mo ka ne ɓǝ cuu mai ya ɓe, ka we nyiŋ ko yaŋ ɓii ka, we haozah wol ah ka ta. 11 Mor dǝɓ mai mo haozah wol ah ɓe, ka tai ki ne ki pǝ faɓe' ah mo tǝ joŋko ɓe.
Ɓǝ ma fahfal tǝ lii ahe
12 Me no ne ɓǝ pǝlli ka me faa ne we, amma me 'yah ka ŋwǝǝ ɓǝ ah pǝ ɗerewol ne aŋkǝr ya, me tǝ kyeɓ ka me ge wo ɓiiri, ka me ge faa ne we ne zahe, mor ka na laa pǝ'nyah zahki tǝɗe' daŋ.
13 Wee naa ma ɓo mawin kŋ haora zah wo ɓo daŋ.
© Bible Moundang © Alliance Biblique du Tchad, 1996.
