Estar ɗii goŋ ne Haman ka ren fan yaŋ ahe
1 Ne zah'nan patǝ sai ah Estar mo tǝ syẽe fanne, so ɓaa mbǝro magoŋ ah ge wo suu, ur kal ge zahfah yaŋ goŋe, pǝ cok mai mo ɓyaŋ ki ɓo ne fakal goŋ mo kan ɓo gŋ, ka goŋ no ɓǝr yaŋ, kaa ɓo tǝ fakal goŋ ah gŋ. 2 Ne cok goŋ mo ɓaŋ nahnǝn kwo magoŋ Estar uu ɓo lalle, joŋ gboŋgboŋ wol ahe, so cuu kǝndaŋ ah ma vãm kaŋnyeeri ge nyi ko, Estar so syee ge juu zah kǝndaŋ ahe. 3 Goŋ fii ko faa: A fẽe ye joŋ ɓo ne magoŋ Estar? Mo cuu fan mai mo 'yah nyi me, mo ga lwaa fan ahe, koo mo raita goŋ ɓe ye laŋ, mo lwaa. 4 Estar zyii zah ah faa: Goŋ mo zyii ɓe, me 'yah mo ne Haman gwa daŋ, we ge yaŋ ɓe ne suŋ maiko, ka we re farel mai me joŋ ɓo mor ɓiiri.
5 Goŋ pepee ɗii Haman ka mo geko gwari, ka mo ge rera farel yaŋ Estar. So goŋ ne Haman kalra ge ka ren farel mai Estar mo joŋ ɓo mor ɓǝǝra. 6 Ne cok mo kaara ɓo tǝ zwah fanne, goŋ fii Estar faa: Mo 'yah fẽene Estar, mo cuu fan ah nyi me, me ga joŋ fan mai mo fii, koo mo fii raita goŋ ɓe laŋ, mo lwaa. 7 Estar zyii faa: 8 Goŋ mo 'yah ka joŋ fan mai me fii ɓe, me 'yah goŋ ne Haman we ge tǝ'nan faɗa, ka we re farel mai me tǝ ga joŋ mor ɓiiri. Ne cok ah ɓe, me ga cuu ɓǝ fan mai me tǝ 'yah nyi mo gŋ ba.
Haman kyeɓ ka in Mordekai pǝ wulli
9 Ne cok Haman mo ur gin cok ren farelle, ɓǝ ah 'nyah suu ah pǝlli, zahzyil ah laa pǝ'nyahre. Amma ne cok mo ge kwo Mordekai zahɓel goŋe, so Mordekai mo zyii ur sǝŋ ka yii ko ne cok mo tǝ pǝ̃ǝ gan a, Haman ɓaŋ kpãh tǝ Mordekai pǝlli. 10 Amma ne daŋ so 'ya zahzyil kal ge fah yaŋ. Ge pepee ɗii bai ah ra ge yaŋ ahe, so ɗii mawin ah Zeres ge taira ne ko. 11 Yii suu ah wo ɓǝǝ tǝ ɓǝ kǝ̃ǝ ah mo kǝ̃ǝ ɓo, ne ɓǝ wee ah mo ne pǝpãare, ne mai goŋ mo ɓaŋ ko kan ɓo pǝ cok ul ma pel ahe, tǝkine mai mo pǝyǝk kal zaluu pel goŋ manyeeki ah ra daŋ. 12 So Haman syee ge pel ne ɓǝ faa: Magoŋ Estar ka joŋ farel ka ɗii za ki ne ya, amma sai goŋ ne me to, so ɗii ɗah ru ɓo ka ga gŋ tǝ'nan kpǝ. 13 Amma ne cok mee so kwan Mordekai Yahuduyo kaa ma zah yaŋ goŋ ko, fan marai daŋ a so wo ɓe na fan kolle.
14 So mawin ah ne bai ah ra faara nyi ko: Mo kyeɓ kpuu mawah ah mo i jol jemma dappe, ka mo pee, ka tǝ'nan ne zah'nan mo fii goŋ ka mo rao Mordekai ge tǝl ahe, ka fahfal ah mo ge cok ren farel ne zahzyil pǝ'nyahre. Ɓǝ ah 'nyah suu Haman, so kal ge pee kpuu.
© Bible Moundang © Alliance Biblique du Tchad, 1996.
