Ɓǝ kikiŋ dǝɓ ma ruu fanne
(Mt 13:1-9Lu 8:4-8)1 Yesu ge zahbii tǝŋ cuu ɓǝ nyi za gŋ faɗa. Za taira wol ah pǝlli, so Yesu yee dah kal ge pǝ bii nje, kaa gŋ. Za daŋ cwãara zahbii. 2 Cuu ɓǝ nyi ra ne ɓǝ kikiŋ pǝlli. Ne cok mo tǝ cuu nyi ra, faa: 3 We laa ɗao. Dǝɓ ma ruu fan kal ge cok ruu fanne. 4 Ne cok mo tǝ ruuni, nah ah manyeeki ah myah kah fahlii, juu ge sǝ̃ǝra. 5 Manyeeki ah myah ge tǝgǝǝ tǝsalle, cok ah sǝr ka gŋ pǝlli ya, ciŋ gwari, mor sǝr ka gŋ pǝlli ya. 6 Amma com mo coo pǝlli o, so rẽeni, yakke, mor ka ne sǝ̃ǝ ya. 7 Manyeeki ah myah pǝ cok mai waa mo gŋ, waa ah jwǝǝ ge lal giŋ cak zah ahe, byaŋ ya. 8 Manyeeki ah myah ge tǝ sǝr masãhe, ciŋ giŋ pǝ'manne, bem pǝsãhe, nǝn ah maki ah jemma sai, maki ah jemma yea, maki ah temere vaŋno. 9 So faa nyi ra: We ne sok laa ɓǝ no ɓe, we laa.
Yesu faa ɓǝ kikiŋ mor fẽene?
(Mt 13:10-17Lu 8:9-10)10 Ka za ki kalra ɓe, za syee mor Yesu jemma tǝtǝl gwa ne tǝcoŋ za ki fiira mor ɓǝ kikiŋ ah zah ahe. 11 Yesu faa nyi ra: Masǝŋ nyi fahlii nyi we ka we tǝ mor ɓǝ tǝsyeɓ Goŋ ahe, amma ɓǝ ah tǝ faa wo za ki ne ɓǝ kikiŋ. 12 Ɓǝ ah joŋ naiko ka mo
Eẽra, ẽera, amma ka mo kwora ɓǝ ah ka,
Ka mo laara, laara, amma ka mo tǝra mor ɓǝ ah ka,
Mor ka mo ferra ɓǝ ɓǝǝ ka Masǝŋ mo rwah faɓe' ɓǝǝ ka.
Yesu kee mor ɓǝ kikiŋ dǝɓ ruu fanne
(Mt 13:18-23Lu 8:11-15)13 So Yesu fii ra faɗa: We tǝ mor ɓǝ kikiŋ mai ya ba ne? Ko we ga tǝ mor ɓǝ kikiŋ manyeeki ah ra ɗǝne? 14 Dǝɓ ma ruu fanne, a ruu Ɓǝ'nyah Masǝŋ. 15 Za ma kah fahlii ah mai ɓǝ ah mo ruu ɓo gŋ, ara ye za mai ɓǝ ah mo cuu ɓo wo ɓǝǝra, a laara ɓǝ ahe, so ne pel sǝ Satan a gin ɓaŋ ɓǝ mai mo ruu ɓo pǝ zahzyil ɓǝǝra. 16 Nai ne za ma ruu pǝ cok tǝsal ta, ara ye za mai mo laara ɓǝ ahe, nyiŋra ɓǝ ah gwari, laara pǝ'nyahre. 17 Amma ɓǝ ah ka ne sǝ̃ǝ pǝ zahzyil ɓǝǝr a. Nǝnra ne ɓǝ ah nje, amma ne cok bone ne syak mo ge lwaa ra mor ɓǝ ahe, so soɓra ɓǝ ah gwari. 18 Za ma ruu pe cok mai waa mo gŋ, ara ye za mai mo laara Ɓǝ'nyah Masǝŋ, 19 amma foo ɓǝ fan sǝr ma tǝ'nahko, kyeɓ lakre, ne cwaa fan sǝr manyeeki ah dan pǝ zahzyil ɓǝǝ ŋhaa a cak ɓǝ faa Masǝŋ, ka lwaa byaŋ ya. 20 Za ma ruu tǝ sǝr masãh ah ara ye za mai moo laara Ɓǝ'nyah Masǝŋ, nyiŋra ɓǝ ahe, byaŋ, nǝn ah maki ah jemma sai, maki ah jemma yea, maki ah temere.
Ɓǝ kikiŋ pitǝrla
(Lu 8:16-18)21 Yesu faa nyi ra faɗa: A kanra pitǝrla mor taabǝl ne? Wala mor col ne? Ka kanra tǝ taabǝl ya ne? 22 Koo dǝɓ mo muŋ fẽene daŋ a pǝ̃ǝni, koo ɓǝ fẽene mo muŋ ɓo daŋ a jooni. 23 We ne sok laa ɓǝ no ɓe, we laa.
24 So faa nyi ra faɗa: We joŋ yella ne ɓǝ mai we tǝ laani, a ga liira nyi we ne tahsah mai we lii nyi za ki ne ko, a ga ɓoora gai we gŋ ta. 25 Mor dǝɓ mo no ne fanne, a ɗǝǝ ga gŋ faɗa, dǝɓ mo ka ne fan a ɓe, koo mai mo jol ah laŋ a ga nyiŋra.
Ɓǝ kikiŋ nah fanne
26 So faa nyi ra: Goŋ Masǝŋ laŋ a tǝgbana dǝɓ ma ruu nah fan ga mor sǝrri, 27 a swan sǝŋ ne suŋni, a kpiŋ ne zah'nanne, nah fan ah a ciŋni, a so giŋni, amma tǝ fan ah a giŋ ɗǝne ya. 28 Sǝr a byaŋ fan suu ahe, ciŋ ah a ciŋ kǝpelle, so a byaŋni, fahfal ah a zyen nǝnni. 29 Amma fahfal ah mo zye vǝr ɓe, dǝɓ cenne, mor gwahl ah cee ɓe.
Ɓǝ kikiŋ nah foore
(Mt 13:31-32Mt 34Lu 13:18-19)30 Yesu faa nyi ra: Na ga lii Goŋ Masǝŋ ne fẽene? Na ga lii ne ɓǝ kikiŋ fẽene? 31 A tǝgbana nah foore, nah ah pǝnyee kal nah fan manyeeki ah daŋ. 32 Amma dǝɓ mo ɓaŋ ruu ɓe, a ciŋni, a giŋ pǝ'man kal kpuu daŋ, a ɓer jol pǝluuri, juu ma zoo sǝŋ a cwǝǝra tǝ jol ahe.
33 Yesu faa ɓǝ nyi ra ne ɓǝ kikiŋ pǝlli nǝn mai moo gak laara. 34 Amma ka faa ɓǝ nyi ra bai ɓǝ kikiŋ ya. Ne cok mo kaara ɓo syak ɓǝǝ ɓe, a so cuu mor ɓǝ ah nyi za syee mor ahe.
Yesu lai zyakke
(Mt 8:23-27Lu 8:22-25)35 Com ah ne lilli, Yesu faa nyi za syee mor ahe: Na ge nǝzakǝŋhaa. 36 Nyi fahlii nyi za kal o. So za syee mor ah yeera dah mai Yesu mo kaa ɓo gŋ, so dah maki ah ra no kah ahe. 37 Zyak ur ne kuu pǝ'manne, wea bii ge pǝ dahe, dah kyeɓ ka baa o, 38 ka Yesu swǝ ɓo sǝŋ sǝ̃ǝ dah nǝnǝm ɓo tǝ fakan tǝtǝlli. Kpiŋra ko, faara nyi ko: Pa cuu fanne, mo kan lǝŋ ɓǝ wul ɓuu ru tǝ ga wuk ya ne? 39 Yesu kpiŋ o, lai zyakke, faa nyi bii: Mo laŋ ka, mo kaa 'wa. Zyak yea zahe, cok cõo nyanya. 40 Yesu faa nyi ra: We ɗuu gal mor fẽene? Ɗǝne? We nyiŋ Masǝŋ ya ne? 41 Ɗuura gal pǝlli, faara tǝgǝǝ ki: Azu ye dǝɓ mai ne? Zyak ne bii laŋ a laara zah ahe.
© Bible Moundang © Alliance Biblique du Tchad, 1996.
