Lai tǝ ɓǝ syee mor masǝŋ ki ra
1 Wee pa ɓe, me 'yah we foo ɓǝ fan mai mo joŋ pa man lii mai mo syeera ne Mosus. Ara daŋ syeera mor swãh bamme, ara daŋ yeera mabii Syẽ. 2 Ara daŋ nyiŋra baptisma pǝzyil swãh ah ne pǝ mabii ah ne Mosus. 3 Ara daŋ rera farel ma Tǝ'yak vaŋno, 4 daŋ zwahra fazwan ma Tǝ'yak vaŋno, zwǝra wo pǝɗakka ma Tǝ'yak mo tǝ syee ne ra, pǝɗakka ah Kristu yo. 5 Amma so Masǝŋ laa pǝ'nyah ne kǝlii za ki tǝgǝǝ ɓǝǝr a, mor ah leara ge sǝŋ kǝsyicok wukra.
6 Fan mai daŋ joŋ ɓo ka cuu fan nyi na, mor ka na yea ne 'yah joŋ fan maɓe' tǝgbana mo joŋra ka. 7 We syee mor masǝŋ ki ra tǝgbana za ki kǝsyil ɓǝǝ mo joŋra ka, tǝgbana Ɗerewol mo faa: Za haira ge sǝŋ ka ren fan ne zwah fanne, so urra sǝŋ ka dǝdaa. 8 Na joŋ ɓǝǝ na za ki kǝsyil ɓǝǝ mo joŋra ka, za ujenere jemma gwa tǝtǝl sai leara ge sǝŋ wukra com vaŋno. 9 Na lii Dǝɓlii tǝgbana za ki kǝsyil ɓǝǝ mo joŋra ka, soo lwǝǝ ra peera tǝɗe'. 10 We kyãh ɓǝ nyee tǝgbana za ki kǝsyil ɓǝǝ mo joŋra ka, angeloi ma ik wul ik ra tǝɗe'.
11 Fan mai daŋ joŋ wo ɓǝǝ nai mor ka cuu fan nyi za ki, so ɓǝ ah ŋwǝǝ ɓo mor ka lai na. Mor na kaa ɓo pǝ cok mai zah'nan vǝr fan mo gwari o.
12 Dǝɓ mo lǝŋ zye uu ɓo, mo joŋko yella ka mo leeko ka. 13 Kǝǝ mai moo lwaa we daŋ, mai moo gin wo za daŋ yo. Masǝŋ Dǝɓ tǝ goŋga yo, a ga joŋ ɓǝ faa ahe, ka soɓ kǝǝ ka kǝǝ we kal tǝ swah suu ɓii ka we gak uu gŋ ka ya. Amma ne cok mai kǝǝ mo ga lwaa we, a ga nyi swah nyi we ka we gak pǝ̃ǝ gŋ.
14 Mor maiko za 'yah ɓe, we ɗuu ɓǝ syee mor masǝŋ ki ra. 15 Me tǝ faa wo ɓii na dǝɓ moo faa ɓǝ nyi za ma ne tǝtǝlli. We foo ɓǝ mai me tǝ faa ne suu ɓii ɗao. 16 We foo ɓǝ tahsah ah mo ẽe ɓo mai naa joŋ osoko nyi Masǝŋ tǝl ahe. Ne cok na tǝ zwan ɓe, ka na tai ɓo ka ne syim Kristu ya ne? Tǝwaa ah mai naa ɓǝlli: ne cok na tǝ ren ɓe, ka na tai ɓo ka ne suu Kristu ya ne? 17 Mor tǝwaa ah a vaŋno, ana pǝpãare, na joŋ suu vaŋno, ana daŋ na ren tǝwaa tǝ vaŋno.
18 We ẽe za Israel ɗǝ. Za mai moo renra fan mai moo nyira mor joŋ syiŋrĩ, taira ɓo ne Masǝŋ pǝ cok joŋ syiŋ ah ta. 19 Me 'yah faa ɗǝ sye ne? Masǝŋ ki cam wala nǝǝ mai moo ŋgoŋra joŋ syiŋ ne ko ŋ a pǝyǝk ye ne? 20 Ka nai ya. Me faa sye: fan mai za bai iŋ moo joŋra syiŋ ne ko a joŋra ne wo coksyiŋrĩ, ka wo Masǝŋ ya. Me 'yah we tai ki ne coksyiŋ ya. 21 We ka gak zwǝ fan pǝ tahsah Dǝɓlii ne tahsah coksyiŋ gwa daŋ ya. We ka gak re fan zah taabǝl Dǝɓlii ne taabǝl coksyiŋ gwa daŋ ya. 22 Wala na 'yah ka kǝǝ Masǝŋ ka joŋ tǝwon ne? We lǝŋ ana pǝswah kal ko ɓe ne?
We joŋ fan daŋ mor ka yii yǝk Masǝŋ
23 Za ki faara: Na no ne fahlii ka joŋ fan daŋ. Oho, so fan ka pǝsãh ne lii ah daŋ ya. A so faara kpǝ: Na no ne fahlii ka joŋ fan daŋ. Amma ma ɓe me faa: Fan daŋ ka gak gbah jol man daŋ ya. 24 Dǝɓ mo kyeɓko fan mor suu syak ah ka, amma mo kyeɓko mor za ki.
25 We no ne fahlii ka ren nǝǝ mai mo leera pǝ luma nǝǝ daŋ bai fifii tǝl ahe, mor ɓǝ fatan zahzyilli. 26 Mor tǝgbana Ɗerewol mo faa: Sǝr tǝkine fan mai mo gŋ daŋ mǝ Dǝɓlii yo.
27 Dǝɓ ma bai iŋ ah mo ɗii we ka ga ren farel ɓe, we zyii ɗii ah ka ga gŋ ɓe, ka we re farel mai mo ge kan pel ɓii daŋ bai fii ɓǝ ahe, mor ɓǝ fatan zahzyilli. 28 Dǝɓ ki mo ge faa nyi we: Nǝǝ mai ŋgoŋra joŋ syiŋ ɓo wo masǝŋ ki ra ne ko ɓe, ka we re farel ah ka, mor ɓǝ dǝɓ mai mo faa ɓo nyi we tǝkine ɓǝ fatan zahzyilli. 29 Me faa ɓǝ ah nai mor ɓǝ fatan zahzyil ma ɓii ya, amma mor ɓǝ fatan zahzyil mǝ dǝɓ ahe.
Amma za ki fiira fii faa: Mor fẽe fan mai me ne fahlii ah fatan zahzyil za ki so yee zah ɓe tǝl ah ne? 30 Me joŋ osoko nyi Masǝŋ tǝ fan mai me tǝ ren ɓe, mor fẽe a so faara ɓǝɓe' tǝ ɓe tǝ ɓǝ farel mai me joŋ osoko nyi Masǝŋ tǝl ah ne?
31 Mor ahe, koo we tǝ ren fanne, koo we tǝ zwan fanne, koo we tǝ joŋ fẽene, we joŋ daŋ mor ka yii yǝk Masǝŋ. 32 We yea tǝgbana fan ma ɓee tǝ ɓal tǝl ah wo Yahuduen ka, wo za mai mo ye ka Yahuduen a laŋ ka, koo wo eklesia Masǝŋ ka ta. 33 We joŋ tǝgbana me. Pǝ fan daŋ me tǝ joŋ ɓe, me ka kyeɓ ka joŋ fan ma 'nyah suu ɓe ya, amma fan ma 'nyah suu za pãa daŋ mor ka mo ǝ̃ǝra.
© Bible Moundang © Alliance Biblique du Tchad, 1996.
