Satan kǝǝ Yesu
(Mt 4:1-11Mk 1:12-13)1 Yesu pii soo gin kah el Yordan, Tǝ'yak Matǝdaŋdaŋ baa zahzyil ahe. So Tǝ'yak zaŋ ko kal ge cok ne ko. 2 Satan kǝǝ ko gŋ zah'nan jemma nai, tǝgǝǝ zah'nan nyẽe daŋ re fan ki ge zah ah ya. So koŋ i ko.
3 Satan faa nyi ko: Amo ye We Masǝŋ ɓe, mo faa nyi tǝsal mai, mo ciŋ farel ɗao. 4 Yesu zyii faa nyi ko: Ɗerewol faa: “Dǝfuu ka yea ne cee mor a ren farel no to ya”.
5 Satan zaŋ ko yee ge tǝ waa mawah ne ko. Ne cok ah sǝ, Satan cuu yǝk goŋ sǝr nyi, 6 so faa nyi ko: Me ga nyi swah sǝr mai ne joŋ ah tǝkine goŋ ah daŋ nyi mo, fan ah daŋ ame ye ɗǝǝ ɓo, me gak nyi nyi dǝɓ mai me 'yah nyi ah nyi ko. 7 Mo kea ge sǝŋ pel ɓe ɓe, fan ah daŋ a ga ciŋ ma ɓo. 8 Yesu zyii faa nyi ko: Ɗerewol faa: “Mo juupel wo Dǝɓlii Masǝŋ ɓo, mo syee laŋ mor ah syak ah to”.
9 So Satan zaŋ Yesu kal ge yaŋ Jerusalem ne ko, ge kan ko tǝtǝl yaŋ Masǝŋ sǝŋ, so faa nyi ko: Amo ye We Masǝŋ ɓe, mo zoo tǝ ge sǝŋ ɗao. 10 Mor Ɗerewol faa: Masǝŋ ga faa nyi angeloi ah ra ka mo byakra mo, 11 ga ɓaŋra mo tǝ jolle, ka mo i ɓal tǝ tǝsal ka. 12 Yesu zyii faa nyi ko: Ɗerewol faa: “Mo lii Dǝɓlii Masǝŋ ɓo ka”. 13 Ne cok Satan mo lii Yesu ne yella camcam daŋ o, so zol gin wol ah soɓ cok nyi ko nje.
Yesu tǝŋ yeɓ ah sǝr Galile
(Mt 4:12-17Mk 1:14-15)14 Yesu pii soo ge sǝr Galile, swah Tǝ'yak Matǝdaŋdaŋ no ne ki. Ɓǝ ah myah sǝr ah daŋ. 15 A cuu fan pǝ yaŋ kee ɓǝ Masǝŋ ɓǝǝra, za daŋ a yiira ko. Ɗerewol ma cẽe ahe
Yesu ge yaŋ Nazaret
(Mt 13:53-58Mk 6:1-6)16 Yesu ge Nazaret yaŋ mai mo giŋko dǝɓlii gŋ, kal ge yaŋ kee ɓǝ Masǝŋ tǝgbana mai moo joŋko ne com 'yak daŋ. So ur sǝŋ ka kee Ɗerewol Masǝŋ. 17 Za nyi ɗerewol profeto Esaia nyi ko. Mo gbǝr ɗerewol ah lwaa cok mai mo faa:
18 Tǝ'yak Dǝɓlii no tǝ ɓe,
Masǝŋ nǝǝ me ka cuu Ɓǝ'nyah nyi za syakke,
Pee me ka cuu ɓǝ wǝǝ za daŋgai nyi za pǝ daŋgai,
Tǝkine gbǝr nahnǝn nyi rǝ̃ǝ,
Ka wǝǝ za ma cuu syak ka mo lwaara tǝtǝl suu ɓǝǝra,
19 Ka cuu syii mai Dǝɓlii mo ga ǝ̃ǝ zan ah ne ko.
20 So Yesu coo ɗerewol ge tǝki nyi ge nyi dǝɓ ma joŋ yeɓ yaŋ kee ɓǝ Masǝŋ, so kaa ge sǝŋ. Za mai mo taira ɓo yaŋ kee ɓǝ Masǝŋ daŋ woora nahnǝn rǝk ge wol ahe. 21 So kal ne faa nyi ra: Ɓǝ mai we kee pǝ ɗerewol ge joŋ tǝ'nah we laa ne sok ɓii ɓe.
22 Za daŋ a joŋra syedowal sãh tǝ Yesu, a kaara gǝriŋ tǝ ɓǝ 'nyah ma pǝ̃ǝ pǝ zah ahe, a faara: We sye mai we Yuseɓ ye ka ne?
23 Yesu faa nyi ra: Me tǝ ɓe, we tǝ ga faa zahlii mai nyi me: Pa syiŋrĩ, mo laɓ suu ɓo. So we ga faa nyi me: Fan mai ru laa mo joŋ ɓo yaŋ Kapernaum daŋ, mo joŋ yaŋ byaŋ ɓo nyee nai ta. 24 So Yesu faa ɓǝ ki gee ra gŋ faɗa, faa: Me tǝ faa goŋga nyi we, profeto Masǝŋ makẽne za mo nyiŋ ko yaŋ byaŋ ah kǝka. 25 Me tǝ faa goŋga nyi we, ne cok zah'nan profeto Elias mo no ne yeɓ kǝsyil Israel, ŋwǝǝ wul no kǝsyil ɓǝǝ pǝlli, ne cok ah bam tǝ ya syii sai ne raita, koŋ wǝ wo sǝr daŋ. 26 So Masǝŋ pee Elias ge wo ɓǝǝ koo vaŋno ya, amma pee ge wo mawin wul maki ah yaŋ Sarepta pǝ sǝr Sidon. 27 So ne cok zah'nan profeto Elisa, tǝkpiŋ no kǝsyil za Israel pǝlli, amma dǝɓ vaŋno kǝsyil ɓǝǝ laɓ ya, sai laɓ Nooman dǝɓ sǝr Siria to.
28 Za mai mo pǝ yaŋ kee ɓǝ Masǝŋ mo laara ɓǝ mai, ɓaŋra kpãh pǝlli, 29 urra sǝŋ, kwakra ko pǝ̃ǝ ge fahfal yaŋ lal ne ki tǝgee mai yaŋ ɓǝǝ mo vuu ɓo tǝl ah ka woo ko ɓoo ga pǝ elle. 30 Amma Yesu pǝ̃ǝ kǝsyil ɓǝǝ kalle.
Dǝɓ ma ne coksyiŋrĩ
(Mk 1:21-28)31 Yesu so kal ge yaŋ Kapernaum sǝr Galile, cuu ɓǝ nyi za gŋ ne com 'yakke. 32 Kaara tǝ ɓǝ cuu ah gǝriŋ, mor a faa ɓǝ nyi ra tǝgbana dǝɓ mayǝk ahe. 33 Ne cok ah dǝɓ ki no pǝ cok tai yaŋ kee ɓǝ Masǝŋ, a ne coksyiŋ tǝl ahe. Dǝɓ ah ɓyaŋ ɓǝ ge sǝŋ faa: 34 Yesu ma yaŋ Nazaret, mo 'yah fẽe wo ɓuu ne? Mo ge tǝ ɓeɓ ru ne? 35 Yesu lai coksyiŋ ne swah faa nyi ko: Mo yea zah ɓo, mo pǝ̃ǝ gin tǝ dǝɓ ahe. Coksyiŋ ɓaŋ dǝɓ ah ɓoo ge sǝŋ kǝsyil zana, pǝ̃ǝ gin tǝl ahe, amma ɓeɓ ko ya. 36 Za daŋ kaara tǝ ɓǝ ah gǝriŋ, fiira ki tǝ ɓǝ ah faara: Ɓǝ fẽe ye mai ne? Dǝɓ mai a lai coksyiŋ ne swahe tǝkine kpãhe, a so pǝ̃ǝra gin tǝ zana. 37 Ɓǝ ah myah pǝ sǝr ah daŋ.
Yesu laɓ za pǝlli
(Mt 8:14-17Mk 1:29-34)38 Yesu pǝ̃ǝ gin yaŋ kee ɓǝ Masǝŋ kal ge yaŋ Simon, ka tǝtǝl tǝ 'wah magor Simon pǝlli, so syeara Yesu ka mo laɓ ko. 39 Yesu ge ɗǝŋ tǝl ahe, so lai syem tǝtǝl 'wah ah ne swahe, tǝtǝl 'wah ah ceere, ne pel sǝ ur sǝŋ kal tǝ joŋ fan nyi ra.
40 Ne cok ka com dan ɓe, za mai za ɓǝǝ mo ne zahban syem camcam woora ra ge wo Yesu ne ko, so kan jol tǝ ɓǝǝ vaŋno vaŋno daŋ, laɓ ra. 41 Coksyiŋ laŋ pǝ̃ǝra gin tǝ za pǝlli, a ɓyaŋra ɓǝ a faara: Amo ye We Masǝŋ. Amma Yesu lai ra ne swahe, cak ra bai faa ɓǝ, mor tǝra ko ako ye Kristu.
Yesu kyãh cuu ɓǝ pǝ sǝr Yudea
(Mk 1:35-39)42 Ne zah'nan pimpim, Yesu pǝ̃ǝ gin yaŋ kal ge cok mai za mo ka gŋ ya. Za so ur ne kyeɓ ko. Ne cok mo ge lwaara ko, a 'yahra ka cak ko ka mo kal soɓ ra ka. 43 Amma Yesu faa nyi ra: Me ga cuu Ɓǝ'nyah Goŋ Masǝŋ nyi za maki ah ra ta, mor Masǝŋ pee me ge ɓo mor ah ka me joŋ naiko. 44 Cuu ɓǝ pǝ yaŋ kee ɓǝ Masǝŋ sǝr Yudea daŋ. Jin ne dah pa gban syiŋ
© Bible Moundang © Alliance Biblique du Tchad, 1996.
