Tǝ'yak matǝ goŋga ne tǝ'yak maberre
1 Za 'yah ɓe, we nyiŋ ɓǝ za mai moo faara ru ne tǝ'yakke daŋ ka, amma we lii tǝ'yak ah ka tanne: Ge gin wo Masǝŋ ge ne? Mor profetoen maber pǝ̃ǝra ɓo pǝlli. 2 Fan mai moo ga cuu nyi we: Mai Tǝ'yak Masǝŋ yo a naiko: Koo zune mo faa Yesu Kristu ge ne suu na suu dǝfuu, ka dǝɓ ah a ne Tǝ'yak Masǝŋ. 3 Tǝ'yak mai mo faa Yesu Kristu ge ne suu na dǝfuu ya, ka gee wo Masǝŋ ge ya, tǝ'yak Pa Syiŋ Kristu yo, mai we laa ɓǝ ah a ga ge ko yo, zǝzǝ̃ǝ laŋ ge wo sǝr ɓe.
4 Amma wee ɓe, awe wee Masǝŋ, awe kaa swah tǝ profetoen maber ɓe, mor Tǝ'yak Masǝŋ mai mo pǝzyil ɓii a pǝswah kal tǝ'yak mai mo pǝzyil za mai ara ye mo mǝ sǝr ɓe. 5 Ara ye mǝ sǝrri, mor maiko a faara ɓǝ na za sǝrri, so za sǝr laara ɓǝ faa ɓǝǝra. 6 Amma ana, na ye mǝ Masǝŋ, dǝɓ mo tǝ Masǝŋ ɓe, a laa ɓǝ faa mana, dǝɓ mo ye ka mǝ Masǝŋ ya ɓe, ka laa ɓǝ faa man a. Ne mai na gak tǝ, Tǝ'yak matǝ goŋga ne tǝ'yak maber a camcam.
Masǝŋ 'yah yo
7 Za 'yah ɓe, na 'yah ki, mor 'yah gee wo Masǝŋ ge, koo zune mo ne 'yahe, ka we Masǝŋ yo, tǝ Masǝŋ ɓe. 8 Dǝɓ mo ka ne 'yah ya ɓe, ka tǝ Masǝŋ ya, mor Masǝŋ 'yah yo. 9 Masǝŋ cuu 'yah ah nyi na naiko: pee Wel ah matǝ vaŋno ge wo sǝr ka na lwaa cee mor ahe. 10 'Yah a naiko: ana ye ka 'yah Masǝŋ ya, amma ako ye 'yah na, pee Wel ah ge wǝ mor man ka faɓe' man mo rwah ge lalle.
11 Za 'yah ɓe, Masǝŋ mo 'yah na ɓo nai ɓe, pǝram na 'yah ki ta. 12 Dǝɓ ma kwan Masǝŋ kǝka, amma na tǝ 'yah ki ɓe, ka Masǝŋ kaa ɓo pǝzyil mana, ka 'yah ah baa ɓo pǝ zahzyil man cyõ.
13 Mor Masǝŋ nyi Tǝ'yak ah ɓo nyi na, mor ah na tǝ ɓe, na no pǝzyil ahe, ako no pǝzyil man ta. 14 Ru kwo ɓe, ru tǝ joŋ syedowal ah nyi za ki, Pam pee Wel ah ge mor ka ǝ̃ǝ za sǝrri. 15 Koo zune mo faa Yesu We Masǝŋ yo, ka Masǝŋ kaa ɓo pǝzyil ahe, ako no pǝzyil Masǝŋ ta. 16 Ana, na tǝ 'yah mai Masǝŋ mo tǝ 'yah na ɓe, na nyiŋ ɓǝ ah ɓo ta. Masǝŋ 'yah yo, dǝɓ mo ne 'yahe, ka kaa ɓo pǝzyil Masǝŋ, Masǝŋ no pǝzyil ah ta.
17 'Yah mo baa ɓo pǝ zahzyil man 'manna ɓe, ne zah'nan kiita ɓe, na ka ɗuu gal a, mor kal man na kaa ɓo wo sǝr nyee a tǝgbana mǝ Yesu Kristu. 18 Gal ka tai ki ne 'yah ya, amma 'yah matǝ goŋga a nĩi gal ga lalle, mor gal a gin mor ɗuu kiita. Dǝɓ mo tǝ ɗuu gal ɓe, ka ka ne 'yah matǝ goŋga ya.
19 Na ne 'yahe, mor Masǝŋ ye 'yah na kǝpelle. 20 Dǝɓ mo faa zye 'yah Masǝŋ, mo so tǝ syiŋ naa pah ah ɓe, ka pa ber o. Mor dǝɓ mo ka tǝ 'yah naa pam mai mo tǝ kwan ko ya ɓe, a gak 'yah Masǝŋ mai mo kwo ko ya ɗǝne? 21 Ɓǝ lai mai Kristu mo nyi ɓo nyi na a naiko: Dǝɓ mo tǝ 'yah Masǝŋ ɓe, mo 'yahko naa pah ah ta.
© Bible Moundang © Alliance Biblique du Tchad, 1996.
