Ɓaŋ Elias ga sǝŋ
1 Ne cok Dǝɓlii mo tǝ 'yah ka ɓaŋ Elias ga sǝŋ ne zyak mǝǝzuwuŋrĩ, Elias ne Elisa urra gin yaŋ Gilgal tǝ gara mor ki. 2 Elias faa nyi Elisa: Mo ɗah kaa nyeeno, mor Dǝɓlii pee me ga Betel. Amma Elisa zyii faa: Me haa zah nyi mo ne tǝɗii Dǝɓlii, me ka soɓ mo ya. Syeera mor ki kalra ge Betel. 3 Profetoen mai mo yaŋ Betel pǝ̃ǝra ge zyaŋ tǝtǝl Elisa faara nyi ko: Tǝ'nah Dǝɓlii tǝ ga ɓaŋ dǝɓlii ɓo Elias ga sǝŋ ne ko, mo tǝ ɓǝ ah ɓe ne? A ga soɓ mo wo sǝrri. Zyii faa: Ame laŋ me tǝ ɓe, we yea zah ɓii o.
4 So Elias faa nyi Elisa: Mo ɗah kaa nyeeno, mor Dǝɓlii pee me ga yaŋ Jeriko. Amma zyii faa: Me haa zah nyi mo ne tǝɗii Dǝɓlii, me ka soɓ mo ya. So kalra ge Jeriko mor ki. 5 Profetoen mai mo kaara ɓo yaŋ Jeriko gera wo Elisa, faara nyi ko: Tǝ'nah Dǝɓlii tǝ ga ɓaŋ dǝɓlii ɓo Elias ga sǝŋ ne ko, mo tǝ ɓǝ ah ɓe ne? Zyii faa: Ame laŋ me tǝ ɓe, we yea zah ɓii o.
6 So Elias faa nyi Elisa: Mo ɗah kaa nyeeno, mor Dǝɓlii pee me ga kah el Yordan. Amma zyii faa: Me haa zah nyi mo ne tǝɗii Dǝɓlii, me ka soɓ mo ya. Syeera mor ki gwa daŋ kalra. 7 Za jemma dappe kǝsyil profetoen kalra ge ta, ge uura kah ɓǝǝ lal pǝɗǝk nje. Ara gwa daŋ kalra ge pǝ el Yordan. 8 Elias ɓaŋ yerri ah malii, so cẽe ɓaŋ i bii ne ko. Bii woŋ kǝsyil gwa, yeera gŋ tǝ sǝr yakke.
9 Ne cok mo yeera o, Elias faa nyi Elisa: Mo fii fan mai mee gak joŋ nyi mo kǝpel ka me ɓah kal soɓ mo ya ba. Elisa zyii faa: Me 'yah me lwaa swah joŋ yeɓ ɓo zahlǝŋ gwa. 10 Elias faa: Amo fii fan magaɓ ah ɓo. Mo kwo mo ɓaŋra me wo ɓo kal ga ne ko ɓe, mo ga lwaa fan ahe. Mo ka nai ya ɓe, ka gak joŋ ya.
11 Ne cok mo tǝ gara, a faara ɓǝ ga ne ko, so muŋta wii ne pǝr wii ge cee kǝsyil ɓǝǝra, Elias yee kal ge sǝŋ ne zyak mǝǝzuwuŋrĩ. 12 Elisa mo kwo naiko, ɓyaŋ ɓǝ faa: Daddǝ, Daddǝ, muŋta Israel ne za ma yee tǝl ahe! Fahfal ah so Elisa kwo ko yao, so gbǝ mbǝro wo suu ah ŋgǝ̃ǝ kǝsyil gwa.
13 So ɓaŋ mbǝro Elias mai mo soɓ lee ge sǝŋ, pii soo ne ko, ge dai zahbii Yordan. 14 Ɓaŋ mbǝro Elias mo soɓ lee ge sǝŋ i bii ne ko faa: Dǝɓlii Masǝŋ Elias kẽne? Ne cok mo iko bii ne naiko, bii woŋ kǝsyil gwa uu nǝjokǝsãh nǝjokǝlǝɓai gwa daŋ, so Elisa yeeni. 15 Profetoen mai mo yaŋ Jeriko mo uura ɓo lal nje mo ẽera ko ge, faara: Swah Elias no tǝtǝl Elisa. Gera ka zyaŋ tǝl ahe, ɗǝmra ge sǝŋ pel ahe. 16 Faara nyi ko: Mo ẽe ɗǝ, za maswah ah kǝsyil ɓuu no, ara jemma dappe, mo soɓ ra ka mo ge kyeɓra dǝɓlii ɓo Elias, ɗah maki Tǝ'yak Dǝɓlii ɓaŋ ko ge kan ɓo tǝwaa maki ahe, wala pǝ el maki ah ne? Faa nyi ra: We pee ra ge ka. 17 Pǝǝra ko pǝlli ŋhaa so zyii gbal, faa nyi ra: We pee ra gyo. Peera za jemma dappe kalle, ge kyeɓra ko zah'nan sai, amma lwaara ko ya. 18 So pii soora ge wo Elisa, ka kaa ɓo yaŋ Jeriko ba. Faa nyi ra: Me faa nyi we, we ge ka ya ne?
Bii maɓe' fer ciŋ bii masãhe
19 Za yaŋ Jeriko so faara nyi Elisa: Mo ẽe cok kal yaŋ mai a pǝsãhe, amo laŋ mo kwo ne suu ɓo ɓe. Amma bii ah ka pǝsãh ya, sǝr ah ka joŋ fan a. 20 Faa nyi ra: We ɓaŋ tahsah mafuu ah gee me ne ko, we rǝk tǝm ge ɓǝr ahe. Ɓaŋra tahsah ge nyi ne ko. 21 So pǝ̃ǝ kal ge pǝ cok mai bii moo ɗuu gŋ ginni, rǝk tǝm ge gŋ faa: Dǝɓlii faa: Me zyeɓ bii mai ɓe, ga pel mai bii ah ka fǝ̃ǝ i fan pǝ wul yao, ka sye ɓil ɓǝr ŋwǝǝ ga lal ao ta. 22 Bii ah zyeɓ ɓo daga pǝ cok ah sǝ ŋhaa tǝ'nahko, tǝgbana ɓǝ mai Elisa mo faa.
Masǝŋ ŋgoŋ kiita tǝ wee tǝbanna mai mo syakra Elisa
23 Elisa ur gin gŋ kal ge Betel. Ne cok mo ɓaŋ fahlii ɓo tǝ ganne, wee tǝbanna manyeeki pǝ̃ǝra gin tǝgǝǝ yaŋ ah syakra ko, faara: Mo syee ge nyeeno, dǝɓ ma tǝtǝl roɓ no! mo syee ge nyeeno, dǝɓ ma tǝtǝl roɓ no! 24 Elisa ɓaŋ nahnǝn ẽe ra, so ɓoo zahyee nyi wee ah pǝ tǝɗii Dǝɓlii. Ɓol gwa pǝ̃ǝra gin pǝzyil gǝ̃ǝ ge ik wee jemma nai tǝtǝl gwa gin kǝsyil ɓǝǝra. 25 So Elisa ur gin pǝ cok ah kal ge tǝwaa Karmel. So pii soo gin gŋ kal ge yaŋ Samaria.
© Bible Moundang © Alliance Biblique du Tchad, 1996.
