Kafahe Dǝɓlii
1 Dǝɓlii faa nyi me: 2 We dǝfuu, mo faa ɓǝ tǝtǝl yaŋ Jerusalem, mo faa ɓǝ tǝ cok mai za moo juura pel gŋ, mo lai sǝr Israel, 3 mo faa, ame Dǝɓlii me faa sye: Ame ye pa syiŋ ɓii o. Me ga nǝǝ kafahe, me ga cee we ne pǝ wulli, za maɓea ah ne za masãh ah daŋ. 4 Me ga joŋ fan wo za ne kafahe ɓe, me tǝŋ daga fahsǝŋ ŋhaa ga dai fah morkǝsǝŋ. 5 So zune daŋ a ga tǝ, ame Dǝɓlii me nǝǝ kafahe ɓe ɓo gin pẽere, me ka so maa ga gŋ ya.
6 We dǝfuu, mo ɓyaŋ ɓǝ tǝgbana zahzyil ye nǝǝ mo ɓo, mo yeyee ne swaa ɓǝ, mor ka za daŋ mo ẽera mo. 7 Ne cok mo fiira mo, mo yeyee mor fẽe nai ne ɓe, ka mo faa nyi ra, me tǝ yeyee mor ɓǝ mai me laa ɓo mo tǝ yah ginni. Ne cok ɓǝ ah mo ge ɓe, zahzyil ga nǝǝ ra ne galle, jol ɓǝǝ ga wok sǝnak sǝnak, swah ka ga yea wo ɓǝǝ ya, zahciŋɓal ɓǝǝ ga coo geri geri. Cok ah ge ɓe, ako ye nyẽeko. Ame Dǝɓlii Masǝŋ me faa naiko.
8 Dǝɓlii faa ɓǝ nyi me: 9 We dǝfuu, mo faa ɓǝ, mo faa nyi za ame Dǝɓlii me faa sye: Kafahe, kafahe, syel ah syiŋ ɓo, a sǝsãhe. 10 Syel ah syiŋ ɓo ka ik wulli, fõo ɓo ka sãh tǝgbana sãh bamme. Laa pǝ'nyah ka ga yea ya, mor za ɓe syẽara lai mai daŋ me lai ra ɓo ne ko. 11 Kafahe a sǝsãhe, zyeɓra ɓo ka joŋ yeɓ ne ko, syel ah syiŋ ɓo a sǝsãhe, mor ka nyi ga nyi pa ik wul jolle. 12 We dǝfuu, mo yeyee, ne dahgorre, mor kafahe mai ge ɓo tǝtǝl za ɓe, ne zaluu ɓǝǝ daŋ. A ga ikra ra pǝ wul ne tǝcoŋ za ɓe ra daŋ. Mo kǝ̃ǝ zahbii ne swaa ɓǝ! 13 Ame tǝ lii za ɓe, mo zyiira toobii ya ɓe, fan marai daŋ a gin joŋ wo ɓǝǝra.
14 Zǝzǝ̃ǝko we dǝfuu, mo faa ɓǝ, ka mo kǝ̃ǝ jol ge wo ki, kafahe ga joŋ yeɓ ɓǝrki ɓǝrki faɗa, kafahe ik wul o, kafahe ma ren gal za moo ik za ne pǝ wul o. 15 A ga joŋ zahzyil nǝǝ za ɓe, a leara ga sǝŋ. Me kan kafahe mai moo sãh tǝgbana bam ryaŋ zah yaŋ ɓǝǝ ɓo ne ko, zyeɓ suu kaa ɓo ne ka in wulli. 16 Kafahe ma ne syel tǝ ŋhǝrẽm, mo ik za ge nǝjokǝsãh nǝjokǝlǝɓai gwa daŋ. 17 Ame laŋ me ga kǝ̃ǝ jol ga wo ki, ka kpãh ɓe me ɓaŋ ɓo mo wuu. Ame Dǝɓlii me faa naiko.
Kafahe goŋ Babilon
18 Dǝɓlii faa nyi me : 19 We dǝfuu, mo ɗea fahlii gwa, ka goŋ Babilon mo syee gŋ ge ne kafahe ahe. Fahlii ah gwa daŋ mo tǝŋ pǝ sǝr tǝ vaŋno, ka mo pee lamba ma cuu fahlii tǝ fahlii ah ra. 20 Maki ah vaŋno a ga cuu fahlii ma ga yaŋ Ammonien malii ma ɗii ne Rabba nyi goŋ Babilon, maki ah laŋ a ga cuu fahlii ma ga sǝr Yuda, ka ga yaŋ Jerusalem mai mo ne ɓaale nyi ko. 21 Goŋ Babilon ga uu tǝwoŋ fahlii kah lamba ma cuu fahlii. Mor ka tan fahlii mai moo ga ɓaŋko, a ga dahɓ guu ah ra, so a ga fii masǝŋ ah ra, so a ga ẽe zyii nǝǝ joŋ syiŋ mai mo ŋgoŋra ɓo ta. 22 So guu ma cuu yaŋ Jerusalem nyi ko ga lee ga jokǝsãh ahe. Guu ah ga faa nyi ko, mo geko gŋ, ka mo ge rǝkko fan ma dah ɓaale yaŋ ah kah ahe, ka mo dǝǝko gor salle, mo so peeko fan maki ah ra ka ga dah zahfah ah ra ne ko, ka mo so worko sǝr ge sǝŋ mo mgbãa ɓaale ahe. 23 Za mai mo kaara ɓo yaŋ Jerusalem ga kwora ɓǝ ah na ɓǝ kolle, mor ɓǝ gbanzah mai mo gbǝra ɓo kǝsyil ki, amma goŋ Babilon ga cuu faɓe' ɓǝǝ nyi ra, so a ga lai ra faa, zye ga gbah ra kal ne ko. 24 Mor ahe, ame Dǝɓlii Masǝŋ me faa: Faɓe' ɓii ra joo ge lal ɓe, zune daŋ tǝ ɓǝɓe' ɓii ɓe. Awe tǝ cuu faɓe' ɓii gin lal pǝ yeɓ ɓii daŋ wee joŋni. Kiita gbǝ we ɓe, me ga soɓ we ga mor jol za syiŋ ɓiiri.
25 Amo goŋ Israel dǝɓ ɓe' no , pa joŋ faɓe', zah'nan kiita ɓo no ginni, ɓǝ ɓo ga vǝr ne ko. 26 Ame Dǝɓlii Masǝŋ me ye faa ɓo. Mo nǝǝ njok goŋ ɓo, ne zyim zahtǝtǝl daŋ ge lalle. Fan daŋ a ga ferre. Za mai mo yeara pǝsyakke, a ga ferra yea pǝyǝkki, za mai mo yeara pǝyǝk laŋ, a ga ferra yea pǝsyakke. 27 Gboŋni, gboŋni! Oho, me ga joŋ yaŋ malii ciŋ gboŋni. Amma fan ah ka joŋ ya ba, ŋhaa sai ka dǝɓ mai me nǝǝ ɓo ka ŋgoŋ kiita tǝ yaŋ malii ko ge ɓe. So me ga soɓ yaŋ ah ga jol ahe.
Kafahe ne Ammonien
28 We dǝfuu, mo faa ɓǝ ɓe, mo faa ɓǝ mai ame Dǝɓlii Masǝŋ me tǝ faa nyi Ammonien mai mo tǝ tǝǝra za Israel, mo faa nyi ra sye: Kafahe zyeɓ kan ɓo ka ik we pǝ wulli, syiŋ kan ɓo ka ik wulli, a sãh tǝgbana bamme. 29 Fakwan mai we kwo, goŋga ye ka, za mai moo faara ɓǝ nyi we, a gwahra berre. Awe ye za ɓeare, we joŋ faɓe', zah'nan ah no ginni, ɓǝɓe' ɓii wee joŋ daŋ a ga i zah ne ko. Kafahe ga cee sol nyi we.
30 Zǝzǝ̃ǝko, we maa kafahe ɓii ra ge pẽere, me ga ŋgoŋ kiita tǝ ɓii pǝ cok mai mo joŋra we gŋ, pǝ sǝr mai we bem gŋ. 31 Me ga ɓaŋ kpãh tǝ ɓii pǝcwak na wii, me ga soɓ we ga mor jol za magaɓ ahe, za mai mo tǝra fahlii ɓeɓ fan ɓo. 32 Wii ga sye we, syim ɓii ga ɗuu tǝ sǝr ma ka syak ɓiiri. Fahfal ah koo dǝɓ vaŋno ka ga foo ɓǝ ɓii faɗa yao. Ame Dǝɓlii me faa naiko.
© Bible Moundang © Alliance Biblique du Tchad, 1996.
