Yuda ne Tamar
1 Ne cok ah Yuda soɓ wee pah ahe, kal ge wo dǝɓ Adullam maki no a ɗii ne Hira. 2 Yuda kwo mǝlaŋ dǝɓ Kanaanien ma ɗii ne Sua gŋ, ɓaŋ ko kanne. 3 Gbǝ ɓilli, byaŋ we worre, Yuda ɗii ne Er. 4 So gbǝ ɓil kpǝ, byaŋ we worre, ɗii ko ne Onan. 5 So byaŋ we wor faɗa, ɗii wel ah ne Sela. Amma ne cok mo byaŋko ka Yuda no Kijiɓ.
6 Yuda 'yah mawin nyi Er wel ah malii, a ɗii ne Tamar. 7 Amma we Yuda malii mo ɗii ne Er a pǝɓe' pel Masǝŋ, so Masǝŋ i ko pǝ wulli. 8 So Yuda faa nyi Onan: Mo ɓaŋ mawin naa ma ɓo kanne, ka mo joŋ fan mai naa wor moo joŋ wol ahe, ka mo kan nah naa ma ɓo . 9 Amma Onan tǝ ɓe, wel ah mo byaŋ ɓe, morsǝ̃ǝ ah ye ka. Mor ah ne cok daŋ mo tǝ kaa ne mawin naa mah ah ɓe, a soɓ suu ga sǝŋ, mor ka mo kanko nah naa mah ah ka. 10 Fan mai mo joŋko a pǝɓe' pel Masǝŋ, so Masǝŋ i ko pǝ wul ta. 11 So Yuda faa nyi gor ah Tamar: Mo ge kaa mawin wul suu ɓo yaŋ pa ɓo ŋhaa ka na ɓe Sela mo joŋko dǝɓlii ɗao. Faa nai mor a ɗuu gal ka Sela mo wǝ na wee mah ah ra ka. Tamar kal ge kaa yaŋ pah ahe.
12 Fahfal ah zah'nan joŋ pǝpãare, mawin Yuda mǝlaŋ Sua wuu. Fahfal mo yee wul mawin ah vǝr o, so kal ge Timnat ka saŋ syiŋ pǝsǝ̃ǝ ah ne palyaŋ ah Hira dǝɓ Adullam. 13 Ge faara nyi Tamar: Gor ɓo tǝ ga Timnat ka saŋ syiŋ pǝsǝ̃ǝ ahe. 14 Tamar wǝǝ mbǝro ma gban yel ah ge lalle, ɓaŋ mbǝro mai moo ɓoo pǝtãa ɓoo, so jǝŋ fan tǝtǝlli, kal ge kaa zahfah Enaim ma ga Timnat, mor kwo Sela joŋ dǝɓlii ɓe, so soɓra ko kan a. 15 Yuda kwo ko na mawin tǝkoi mor jǝŋ fan ɓo tǝtǝlli. 16 Cak gin tǝ fahlii kal ge wol ah faa: Mo soɓ me kaa ne mo. Mor tǝ sõone gor ah ye ya. Faa nyi ko: Mo ga nyi fẽe nyi me ka mo kaa ne me ne? 17 Zyii faa nyi ko: Me ga pee we tǝparswak kǝsyil gwii ɓe gee mo. Tamar faa: Pǝsãhe, mo ɗah soɓ fan ki kan wo ɓe pǝ cok ah ŋhaa com mai moo ga pee ge ne? 18 Faa nyi ko: Me ɗah kan fẽe wo ɓo pǝ cok ah ne? Zyii faa: Mo kan tǝgaa ɓo, sal ɓo tǝkine kǝndaŋ mai mo jol ɓo wo ɓe. So Yuda nyi nyi ko, kaa ne ki, so gbǝ ɓilli. 19 Tamar ur kalle, ge wǝǝ mbǝro matǝkoi ah ge lalle, so ɓoo mbǝro ma gban yelle.
20 Yuda pee we tǝparswak ne jol palyaŋ ah dǝɓ Adullam ka nyiŋ fan ah jol mawin kŋ, amma ge lwaa ko ya. 21 So fii za yaŋ ah faa: Matǝkoi mai mo kaa kah fahlii Enaim a kẽne? Zyiira faa: Matǝkoi ge nyee taa ya. 22 Pii soo ge wo Yuda faa: Me lwaa ko ya. Za yaŋ ah laŋ faara matǝkoi ka nyee ya. 23 Yuda faa: Mo ɗah byakko fan ma jol ah o, ka swãa mo re na ka, me pee we tǝparswak kŋ laŋ ɓe, mo so lwaa ko ya.
24 Fahfal ah fĩi sai ge faara nyi Yuda: Gor ɓo Tamar a joŋ tǝkoi, so lwaa ɓil ɓo tǝ tǝkoi ahe. Yuda faa: We pǝ̃ǝ ge lal ne ki ka ɓoo wii tǝl ahe. 25 Ne cok mo pǝ̃ǝra ge lal ne ki pepee wo gor ah faa: Me gbǝ ɓil ɓo ne pah fan maraino. So faa: Mo ẽe ɗǝ, tǝgaa ne sal tǝkine kǝndaŋ mai mǝ zu ye ne? 26 Yuda tǝ fan ah faa: Tamar kal me ne goŋga ɓe, mor me soɓ we ɓe Sela nyi ko kan a.
27 Cok byaŋ ah mo ge o, jurkpiŋ ye ɓǝr ahe. 28 Ne cok mo tǝ byaŋni, maki ah nǝǝ jol ge lalle, mabyaŋ gbǝ jol ahe, so saa suu syẽ ge nyi jolle. So faa: Mai ye pǝ̃ǝ kǝpelle. 29 So pii soo ne jol ahe, naa mah ah pǝ̃ǝ ge. So mabyaŋ faa: Mo ŋgǝ̃ǝ cok ge ɗii ne? So ɗiira ko ne Peres. 30 Fahfal ah naa mah ah ma ne suu syẽ jol kŋ pǝ̃ǝ ge, ɗiira ko ne Zera.
© Bible Moundang © Alliance Biblique du Tchad, 1996.
