Juupel ma ne lilli
1 Lǝŋ David.
Dǝɓlii, me tǝ yeyee ɗii mo,
Mo gbah jol ɓe zǝzǝ̃ǝko.
Ne cok me yeyee ɗii mo ɓe, mo laa yee ɓe.
2 Mo nyiŋ woo jol mai mee woo ga sǝŋ tǝgbana syiŋ ma joŋ ne lilli.
3 Dǝɓlii, mo byak zah ɓe,
Mo byak tǝkpuuzah ɓe.
4 Mo byak me ka me yea ne 'yah joŋ faɓe' wala ka tai ki ne za faɓe' pǝ fan joŋ ɓea ɓǝǝ ka.
Ka me joŋ fĩi ɓǝǝ ne ra ka syaŋsyaŋ.
5 Dǝɓ sãh mo ŋgoŋ kiita tǝ ɓe tǝkine lai me ne 'yah ɓe, me nyiŋ ɓǝ ahe.
Amma me ka soɓ dǝɓ ɓe' syee nǝm ga tǝtǝl ɓe ya,
Mor cẽecẽe me juupel ka cak fan joŋ ɓe' ɓǝǝra.
6 Ne cok mo waara zaluu ɓǝǝ tǝ tǝsal mawah ah ge sǝŋ ɓe,
Za ga faara ɓǝ faa ɓe goŋga yo.
7 A ga myahra woiŋ ɓǝǝ zah pal tǝgbana kpuu mai za moo jak ɓǝri ɓǝri.
8 Amma ame, Masǝŋ Dǝɓlii ɓe, me soɓ suu ɓe wo ɓo,
Me kyeɓ ka amo ye mo byak me, mo soɓ me wǝ ka.
9 Mo byak me wo mǝmmǝǝ tǝkine kpǝram mai za faɓe' mo saara ɓo pel ɓe.
10 Mo soɓ mǝmmǝǝ za faɓe' mo jin gbah ra,
Amma mo soɓ me pǝ̃ǝ kal bai fan ki mo juu me.
© Bible Moundang © Alliance Biblique du Tchad, 1996.
