Ɓǝ joŋ syiŋ ma ɓaŋ faɓe' ga lalle
1 Mor ɓǝ syiŋ ma joŋ mor ɓaŋ faɓe' ga lal a naiko:
Mo ɗiira dǝɓ ki ge cok kiita, ka mo joŋko syedowal tǝ fan mai mo kwoko, wala mai mo laako ɓǝ ahe, mo zyiiko ka joo ɓǝ ah ya ɓe, ka a ne kiita tǝtǝl ahe.
2 Dǝɓ mo joŋ yella ya, mo juu fan mai Masǝŋ moo kwan na a ne 'nahm daŋ, tǝgbana wul nǝǝ cokki, koo mo wul fan ma syee ne ɓal ma yaŋ yo, wala mo wul fan manyee ma keker ah ra yo, ne cok mo tǝko ɓǝ ah ɓe, ka a ne 'nahm o ta, so ka ciŋ pa joŋ ɓǝɓe' ɓe.
3 So dǝɓ mo joŋ yella ya, mo juu fan ma ne 'nahm ah ra mo wo dǝfuu, ne cok mo so tǝko ɓǝ ah ɓe, ka a ne 'nahm o ta, so ka ciŋ pa joŋ ɓǝɓe' ɓe.
4 Dǝɓ mo joŋ yella ya, mo haa zah koo mo mafẽene ah yo tǝ ɓǝ ka joŋ fanne, ne cok mo so ge tahnko ɓǝ ahe, ka ciŋ pa joŋ ɓǝɓe' ɓe.
5 Ne cok dǝɓ mo ciŋ pa joŋ ɓǝɓe' pǝ ɓǝ marai ɓe, sai mo keeko ɓǝ faɓe' ah ge lalle, 6 ka mo gbǝko pǝsãhm matam ah wala sǝgwii matam ah ge pel Dǝɓlii ne ko, ka pa joŋzahsyiŋ mo joŋ syiŋ mor dǝɓ ah ne ka ɓaŋ faɓe' ah ga lalle.
7 Dǝɓ ah mo gak ka lwaa pǝsãhm wala sǝgwii ya ɓe, ka mo geko ne matǝvaawandala gwa, wala matǝvaakol gwa, vaŋno mor ka joŋ syiŋ ma ɓaŋ faɓe' ga lalle, maki ah laŋ mor ka joŋ syiŋ suŋwii ne ko. 8 Sai mo nyiko nyi pa joŋzahsyiŋrĩ, ka pa joŋzahsyiŋ mo joŋko syiŋ ne matǝvaa ma mor ɓaŋ faɓe' ga lal kǝpelle. Mo haoko sol matǝvaa ahe, amma mo ŋgoŋko tǝtǝl ah ge lal ka. 9 So mo meeko syim ah biŋ ge kah cok joŋ syiŋrĩ, ka mo so sǝǝko tǝcoŋ syim ah ge tǝ sǝr kah cok joŋ syiŋrĩ. Syiŋ ma mor ɓaŋ faɓe' ga lal o. 10 So ka mo joŋko syiŋ suŋwii ne matǝvaa patǝ gwa ahe, tǝgbana mai ɓǝ ah mo faa ɓo. Pa joŋzahsyiŋ mo joŋko syiŋ ma ɓaŋ faɓe' dǝɓ ah ga lal naiko, so faɓe' dǝɓ ah ga rwah ga lalle.
11 Dǝɓ mo gak lwaa matǝvaawandala gwa, wala matǝvaakol gwa ya ɓe, ka mo geko ne sum tahsah vaŋno, fan nyi ma mor ɓaŋ faɓe' ga lal o. Mo rǝkko nǝm ge tǝtǝl ah ka, mo rǝkko ɓǝrdi ge gŋ ka ta. Mor fan nyi ma farel ye ka, fan nyi ma mor joŋ syiŋ ma ɓaŋ faɓe' ga lal o. 12 Ka mo geko nyi pa joŋzahsyiŋ ne sum ahe, ka pa joŋzahsyiŋ mo fõoko sum ah baa jolle, ka cuu, fan ah daŋ nyi ɓo mor Dǝɓlii, ka mo syakko tǝ cok joŋ syiŋ tǝgbana fan nyi ma farelle. Syiŋ ma mor ɓaŋ faɓe' ga lal o. 13 Pa joŋzahsyiŋ mo joŋko syiŋ mor faɓe' dǝɓ ah naiko, so faɓe' dǝɓ ah ga rwah ga lalle. Tǝcoŋ sum ah mǝ pa joŋzahsyiŋ yo, tǝgbana mǝ fan nyi ma farel ta.
Syiŋ ma mor soo tǝ faɓe'
14 Dǝɓlii faa nyi Mosus: 15 Dǝɓ mo joŋ yella ya, mo joŋ faɓe', mo joŋko ɓo ka kee ya, mo gakko nyi fan mai mo mǝ Dǝɓlii yo nyi ko ya ɓe, sai mo gbǝko kǝbǝr wala kǝdai mai suu ah mo ka pǝɓe' ya gee Dǝɓlii ne ko, ka joŋ syiŋ ne mor ka soo tǝ faɓe' ahe, sai gwii ah mo yea nǝn lak mai mo cuura ɓo. 16 Sai mo sooko soo tǝ ɓǝ fan mai mo gakko ka nyi ya ko, sai mo so ɓooko ge gŋ nǝn jemma gwa ma pǝzyil temere, mo nyiko fan ah daŋ nyi pa joŋzahsyiŋrĩ. So ka pa joŋzahsyiŋ mo joŋko syiŋ ne gwii ah mor ka soo tǝ faɓe' dǝɓ ahe, so faɓe' dǝɓ ah ga rwah ga lalle.
17 Dǝɓ mo joŋ yella ya, mo joŋ faɓe', mo kal zǝǝ tǝ ɓǝ lai Dǝɓlii vaŋno ɓe, ka ciŋ pa joŋ faɓe' ɓe, sai mo sooko ɓǝɓe' ahe. 18 Mo gbǝko pǝsãhm wala sǝgwii matam ah mai suu ah mo ka pǝɓe' ya ge wo pa joŋzahsyiŋ ne ko, ka soo tǝ faɓe' ahe. Sai lak lee gwii ah mo yea nǝn lak mai mo cuura ɓo. Ka pa joŋzahsyiŋ mo joŋ syiŋ ne mor faɓe' dǝɓ ahe, so faɓe' dǝɓ ah ga rwah ga lalle. 19 Fan ah fan ma nyi mor soo tǝ faɓe' mai dǝɓ ah mo joŋ ɓo wo Dǝɓlii yo .
© Bible Moundang © Alliance Biblique du Tchad, 1996.
