Haozah woli
1 Ame Simon Petar, dǝɓ yeɓ tǝkine papee Yesu Kristu, me ŋwǝǝ leetǝr mai wo ɓii za mai we ɗǝǝ iŋ masyem ah ɓo tǝgbana ma ɓuuru, mor njaŋ Masǝŋ man tǝkine Yesu Kristu pa ǝ̃ǝ mana.
2 Masǝŋ mo joŋ gboŋgboŋ wo ɓii pǝlli tǝkine nyi jam nyi we ne tan Masǝŋ ne Yesu Dǝɓlii mana.
Ɗii Masǝŋ tǝkine syen ahe
3 Swah Masǝŋ ah nyi fan mai na ne 'yah ah daŋ nyi na, mor ka na kaa ne ko ne ɗuu Masǝŋ tǝkine joŋ na ka na tǝ Dǝɓ mai mo ɗii na ka na ge kaa pǝ yǝk ah tǝkine ɓǝ sãh ahe. 4 Mor ah gbǝ zah mayǝk ah ne malii ɓo ne na, mor ka we ɗǝǝ fan mai mo gbǝ zah ɓo ne we tǝ ɓǝ ah ɓe, ka we gak ǝ̃ǝ pǝ fan cwaa ma muŋ dǝɓ mai mo no wo sǝrri, ka we yea ne kpak mǝ Masǝŋ. 5 Mor ahe, we kyeɓ ne swahe, ka we syee ɓal syel masãh ah tai iŋ ɓii ne ko. Ne syel masãhe, we so ɓaŋ fatan tai ne ko. 6 Ne fatan ah ka we ɓaŋ cak suu tai ne ko. So ne cak suu, we yea ne byak ahe. So ne byak ahe, we yea ne ɗuu Masǝŋ. 7 So ne ɗuu Masǝŋ, we yea ne 'yah wee pamme. Ne 'yah wee pamme, we yea ne 'yah pǝlli. 8 Fan mai we ne 'yah ah ka we yea ne ako ye raiko. Fan marai mo wo ɓii pǝlli ɓe, a ga joŋ we na za yeɓɓe, tǝkine lee syẽm ne tan Dǝɓlii man Yesu Kristu. 9 Amma dǝɓ mo bai fan marai ɓe, ka kwan cok ga pǝɗǝk ya, a tǝgbana rǝ̃ǝ, ka yaŋ ɓǝ mai faɓe' ah mo rwah ge ɓo lal ɓe.
10 Mor ahe, wee pa ɓe, we joŋ suu ɓii ne swahe, ka we uu pǝyak pǝ ɗii mai Masǝŋ mo ɗii we ɓo, mor syen we ɓo. So we tǝ joŋ nai ɓe, we ka ga lee ya syaŋsyaŋ. 11 Ne fahlii mai we ga lwaa cok pǝsãh ka dan pǝ Goŋ Dǝɓlii man ne pa ǝ̃ǝ man Yesu Kristu.
12 Mor ahe, koo we tǝ ɓǝ ah ɓo, we so uu ɓo pǝswah pǝ goŋga mai we lwaa ɓo mgbaŋ laŋ, me so 'yah ur ɓǝ ah wo ɓii cẽecẽe. 13 Me foo a pǝsãh ka me kpiŋ we ne ɓǝ faa ɓe, ne cok mai me no sǝŋ ba. 14 Mor me tǝ ɓe, me ga soɓ suu ma wul mai gwari, tǝgbana mai Dǝɓlii man Yesu Kristu mo faa nyi me. 15 Me ga kyeɓ ne fahlii camcam daŋ ka fahfal wul ɓe we foo ɓǝ fan marai cẽecẽe.
Za mai mo kwora yǝk Kristu
16 Mor aru uu ɓo ka tǝ ɓǝ sam ma lǝlǝŋ ah mor ka cuu ɓǝ gin Dǝɓlii man Yesu Kristu ne swah ah nyi we ne ya, amma ru kwo yǝk ah ne nahnǝn ɓuuru. 17 Aru no pǝ cok mai Masǝŋ Pam mo yii ko pǝyǝkki. Ne cok ah kyaŋ cii gin pǝ Yǝk Malii faa ɓǝ ge nyi: Mai We 'yah ɓe yo, me laa pǝ'nyah ne ki no cam. 18 Ru laa kyaŋ mai mo gee coksǝŋ ge ɓe, ne cok ah ka ru no ne ki tǝ waa matǝdaŋdaŋ.
19 Zǝzǝ̃ǝko aru tǝ ryakryak ɓǝ mai profetoen mo faara ɓe. We syii sok mor ɓǝ ah pǝsãhe, mor a tǝgbana pitǝrla mai moo sǝǝ pǝ cokfuu ŋhaa ka zah'nan mo ge cee, ka ŋwǝǝmǝŋgai zahmor'nan mo sǝǝ pǝ zahzyil ɓiiri. 20 Kǝpel ah daŋ we foo ɓǝ maino: koo dǝɓ vaŋno ka gak kee mor ɓǝ faa profetoen mo pǝ Ɗerewol gin lal ne suu ah ya. 21 Mor ɓǝ mai Masǝŋ mo cuu ɓo, koo vaŋno laŋ ge ne 'yah dǝɓ vaŋno ya, amma Tǝ'yak Matǝdaŋdaŋ ye cuu nyi ra, zan ah so faara ɓǝ mai mo gee wo Masǝŋ ge.
© Bible Moundang © Alliance Biblique du Tchad, 1996.
