2 SAMUEL 3 - Bible Moundang (MUA)

1 Sal so nǝn kǝsyil za Saul ne za David ge liilii. Amma David lwaa swah ge pelle ge pelle, so swah za Saul tǝŋ tǝr ga falle.

Wee David mai mo bemra Hebron

2 David bem wee wǝǝ yaŋ Hebron. Wel ah malii a ɗii ne Amnon, byaŋ ne Akinoam Jezereeliyo. 3 Patǝ gwa ah a ɗii ne Kiliyaɓ, byaŋ ne Abigail ma Karmel mawin Nabal. Sai ah ɗii ne Absolon, byaŋ ne Maaka mǝlaŋ Talmai goŋ Gesur. 4 Nai ah a ɗii ne Adonija, byaŋ ne Haggit. Dappe ah ɗii ne Sefatia, byaŋ ne Abital. 5 Yea ah ɗii ne Jitream, byaŋ ne Egla. Wee marai daŋ David bem ra yaŋ Hebron.

Abner 'yah gban zah ne David

6 Ne cok sal mo kǝsyil za Saul ne za David, Abner uu pǝswah kǝsyil za Saul.

7 Mabyak Saul no a ɗii ne Rispa mǝlaŋ Aja yo. Comki Isboset faa nyi Abner: Mo ge swǝ ne mabyak pa ɓe sye zahmor ah ɗǝne ? 8 Abner ɓaŋ kpãh tǝ ɓǝ mai Isboset mo faa nyi ko pǝlli, so faa: Ame ye goo kǝsyil za Yuda ne? Me tǝ joŋ ɓǝ 'nyah wo za yaŋ pa ɓo Saul ŋhaa tǝ'nahko tǝkine wo wee pam ne palyaŋ ah ra. Me zyii soɓ mo laŋ ga jol David ya. Amma tǝ'nah mo tǝ kyeɓ ɓǝɓe' ne me tǝ ɓǝ mawin mai o ya ne? 9 Me ka joŋ wo David tǝgbana mai Dǝɓlii mo faa ɓo nyi ya ɓe, ka Masǝŋ mo i me pǝ wulli. 10 Mor Masǝŋ faa: Me ga fer goŋ gin tǝ yaŋ Saul, me ga kan fakal goŋ David tǝ za Israel ne za Yuda, daga Dan ŋhaa Beerseba. 11 Isboset gak zyii ɓǝ zah Abner koo vaŋno yao, mor a ɗuu gal ahe.

12 Abner pee zan ah ge wo David faa: Sǝr sye mǝ zu ye ne? So faa: Mo gbǝ zah ne me, me ga gbah jol ɓo, me fer za Israel daŋ ga mor ɓo. 13 David zyii faa: Pǝsãhe, me ga gbǝ zah ne mo. Amma me ga fii fan vaŋno wo ɓo, mo ka kwo zahpel ɓe ya, ne cok mo ga zyaŋ zahpel ne me ɓe, sai ka mo gee me ne Mikal mǝlaŋ Saul ɓe. 14 David pee za wo Isboset we Saul faa: Mo nyi mawin ɓe Mikal mai me 'yah ne zahfar gãhnyah Filistien temere nyi me. 15 Isboset pee za ge zaŋ yaŋ wor ah Paltiel we Lais ge ne ko. 16 Wor ah syee mor ah ne yee ŋhaa ge dai Bakurim. Abner faa nyi wor ahe: Mo pii soo mo gyo. So pii soo kal o.

17 Abner zyeɓ ɓǝ ne zaluu Israel faa nyi ra: Daga ɓaaɓe we tǝ 'yah ka David mo kaa goŋ ɓiiri. 18 Zǝzǝ̃ǝko we joŋ o, mor Dǝɓlii faa nyi David: Me ga ǝ̃ǝ za ɓe Israel gin jol Filistien tǝkine za ma syiŋ ɓǝǝ daŋ ne jol dǝɓ yeɓ ɓe David. 19 Abner faa nyi za Benyaamin nai ta. So Abner ur kal ka ga faa ɓǝ mai mo 'nyah suu za Israel ɓo ne za Benyaamin daŋ nyi David yaŋ Hebron.

20 Abner ge wo David yaŋ Hebron ne za jemma gwa. David joŋ fĩi nyi Abner ne za ma ne ki. 21 Abner faa nyi David: Me ur me ga tai za Israel daŋ ge wo dǝɓlii ɓe goŋ ne ko, mor ka mo gbǝra zah ne mo. Ka mo kaa goŋ tǝ fan daŋ tǝgbana zahzyil ɓo mo 'yahe. David so nyi fahlii nyi Abner kal jam.

Joaɓ i Abner pǝ wulli

22 Fahfal ah za yeɓ David ne Joaɓ pii soora gin zah sal ge. Gera ne fan ma woo zah sal pǝlli. Amma ka Abner ka wo David yaŋ Hebron yao, mor David nyi fahlii nyi ko kal jam ɓe. 23 Ne cok ah Joaɓ ne za ma ne ki daŋ mo ge daira yaŋ, ge keera ɓǝ ah nyi Joaɓ faara: Abner we Ner ge wo goŋ nyeeko, amma goŋ soɓ ko kal jam. 24 Joaɓ ge wo goŋ faa: Mo joŋ ɗah ɓǝ fẽe ɓo mai ne? Mo ẽe Abner ge wo ɓo, mo so soɓ ko kal mor fẽene? 25 Mo tǝ ɓe, Abner we Ner ge tǝ vǝl mo, ka mo tǝko fahlii kal ɓo tǝkine fan joŋ ɓo daŋ.

26 Fahfal ah Joaɓ pǝ̃ǝ ge wo goŋe. So pee za kal ge mor Abner. Pii soora ge ne ki daga zah lak bii Sira, amma David tǝ ɓǝ ah ya. 27 Ne cok Abner mo ge dai yaŋ Hebron, Joaɓ cak ne ki ge kah zahfah tǝgbana tǝ 'yah ka faa ɓǝ ne ki 'yaŋ, so cuŋ ɓǝr nyi gŋ pǝ wul zahwaa naa mah ah Asayel. 28 Ne cok David mo laa ɓǝ ah faa: Ame ne za sǝr ɓe daŋ ru ka ne ɓǝɓe' pel Dǝɓlii tǝ ɓǝ wul Abner we Ner ya ŋhaa ga lii. 29 Syim ah mo pii soo ge tǝ Joaɓ tǝkine za yaŋ pah ah daŋ. Za ma ne fabaani, wala za ma ne fan suu ne za ma ɗǝm tǝ kǝndaŋne, za mai za mo ik ra zah salle, tǝkine za ma bai lwaa farel daŋ mo pee gin yaŋ Joaɓ ka syaŋsyaŋ. 30 Joaɓ ne Abisai ira Abner pǝ wul nai mor Abner i naa ma ɓǝǝ Asayel pǝ wul zah sal Gibeon.

Ciira wul Abner

31 So David faa nyi Joaɓ ne za ma ne ki daŋ: We ŋgǝ̃ǝ mbǝro sol ɓiiri, we ɓaa mbǝro dahsuu, we yeyee wul Abner. So goŋ David syee fahfal fan ɓaŋ wulli. 32 Ciira Abner yaŋ Hebron. Goŋ ɓyaŋ yee ge sǝŋ pǝ'man tǝ pal Abner. Za daŋ yera yee ta. 33 Goŋ ɗǝǝ lǝŋ yee wul Abner faa:

Abner wǝwul tǝgwĩi ɓo tǝgbana tǝgwĩi moo wun ne?

34 Bamra jol ɓo ya,

Ɓal ɓo ra laŋ maa ge ɓo ka pǝ ŋgǝyam ya ta.

Mo lee ge sǝŋ tǝgbana dǝɓ moo lee kǝsyil za kaafuu.

Za so yera yee ah ge pelle. 35 So za daŋ taira ge wo David faara nyi ko ka mo reko farelle, mor ka com ɓah dan a ba. David haa zah faa: Me kal re wolle wala farel maki ah ge zah bai com mo dan ɓe, Masǝŋ mo i me pǝ wulli. 36 Za daŋ mo kwora naiko, laara pǝ'nyahre. Fan mai goŋ mo joŋ daŋ 'nyah suu ɓǝǝ pǝlli. 37 Za David tǝkine za Israel daŋ tǝra daga com ah sǝ, ɓǝ in Abner we Ner pǝ wul ur gin wo goŋ ya. 38 David faa nyi za yeɓ ahe: We tǝ sõone dǝɓlii ne dǝɓ ma'man ah ye wǝ ɓo kǝsyil za Israel tǝ'nah ya ne? 39 Amma koo mo syeera nǝm ge ɓo tǝ ɓe ame ye me goŋ ko laŋ, tǝ'nah me pǝtǝtǝ̃ǝre. Wee Seruja rai tǝtǝl yak ɓǝǝ kal swah ɓe ɓe. Dǝɓlii mo faŋ val tǝ dǝɓ ma joŋ faɓe' tǝgbana faɓe' ah mo joŋko.