Haozah woli
1 Ame Paulus, dǝɓ daŋgai mor Yesu Kristu, ne naa pa man Timoteus. Ru ŋwǝǝ leetǝr mai wo ɓo pa 'yah ɓuu Filemon, dǝɓ ma joŋ yeɓ ne ru, 2 ne wo eklesia mai moo taira yaŋ ɓo, ne wo Afia naa pa man mawinni, tǝkine Arkipus dǝɓ ma ruu sal vaŋno ne ru.
3 Masǝŋ Pa man ne Dǝɓlii Yesu Kristu, mo joŋ gboŋgboŋ wo ɓii tǝkine nyi jam nyi we.
'Yah Filemon ne iŋ ahe
4 Pa 'yah ɓe Filemon, ne cok daŋ me tǝ juupel ɓe, me foo ɓǝ ɓo gŋ, me joŋ osoko nyi Masǝŋ ɓe, 5 mor me tǝ laa ɓǝ 'yah ɓo moo 'yah za Masǝŋ, tǝkine ɓǝ iŋ ɓo mo nyiŋ Dǝɓlii Yesu ɓo. 6 Me tǝ fii Masǝŋ ka tai mai na tai ki ɓo na za iŋni, mo lee syẽm tan ki masãh ah mai na ne pǝzyil man tǝ fahlii Kristu. 7 We pa ɓe, ɓǝ 'yah ɓo joŋ me laa ɓo pǝ'nyah pǝlli, swaa zahzyil ɓo nyi me no cam, mor mo wuu zahzyil ɓo nyi za Masǝŋ pǝlli.
Paulus fii Filemon mor Onesimus
8 Mor maiko, koo Kristu mo nyi fahlii ɓo me ka me gak cuu ɓǝ fan mai ka mo joŋ nyi moo ko laŋ, amma me 'yah fii mo pǝ tǝɗii 'yahe. 9 Ame Paulus, dǝɓ ma tamme, so zǝzǝ̃ǝko me ye dǝɓ daŋgai mor Yesu Kristu, 10 me tǝ fii mo mor Onesimus. Ako ye we ɓe ma pǝzyil Kristu, me ciŋ pah ah ma pǝ tǝ'yak ɓo pǝ daŋgai nyeeko. 11 Ɓaaɓe ka ne yeɓ wo ɓo ya, amma zǝzǝ̃ǝko a ne yeɓ wo ɓo tǝkine me daŋ.
12 Me pee ko ɓo ka mo jinko ge wo ɓo zǝzǝ̃ǝko, a tǝgbana suu ɓe. 13 Me 'yah kǝnah mo kaako wo ɓe ne cok me pǝ daŋgai nyee mor Ɓǝ'nyahre, mor ka mo gbahko jol ɓe pǝ cok ɓo. 14 Amma me 'yah joŋ mo ne doole ka gbah jol ɓe ya, me 'yah mo joŋ ne 'yah zahzyil ɓo. Mor ah me ka ga joŋ fan ki tǝ ɓǝ ah ya, sai ka mo zyii ɓe.
15 Maki Onesimus woŋ ki ɓo ne mo nje, mor ka mo so lwaa ko kaa ne ki ga lii o. 16 Mor zǝzǝ̃ǝko, ka tǝgbana byak to nai sǝ ya, amma kal byak ɓe, ako ye we pam mai mo ye pa 'yah pǝzyil Kristu. Pa 'yah ɓe malii ah yo, amma a ga yea wo ɓo ka kal ma ɓe, a ga yea wo ɓo tǝgbana byak ɓo, tǝgbana we pam tǝ fahlii Dǝɓlii gwa daŋ.
17 Mo kwo me ɓo tǝgbana patǝ gwa ɓo ɓe, mo nyiŋ ko tǝgbana moo gak nyiŋ me. 18 Mo joŋko ɓǝɓe' wo ɓo ɓe, wala fan ɓo mo jol ah ɓe, mo soɓ ɓǝ ah ge tǝ ɓe. 19 Ame Paulus, me ye ŋwǝǝ ɓǝ mai ne jol ɓe, me ga soo fan ahe. (Ame ka faa nyi mo sõone amo ne suu ɓo laŋ mo ye ma ɓe ya.) 20 Oho, we pa ɓe, me tǝ pǝǝ mo ka mo joŋ ɓǝ 'nyah mai wo ɓe mor 'yah Dǝɓlii. Mo wuu zahzyil nyi me tǝgbana we pam mai mo tǝ fahlii Kristu.
21 Ne cok me tǝ ŋwǝǝ leetǝr mai me tǝ belbel mo ga joŋ fan mai me tǝ fii mo mor ahe, me so tǝ laŋ ɓe, mo ga joŋ kal tǝl ah ta. 22 So faɗa, mo zyeɓ yaŋ mor ɓe ta, mor me tǝ byakke, Masǝŋ ga laa juupel ɓii daŋ, a ga wǝǝ me nyi we.
Haozah wol ma fahfal tǝ lii
23 Epafras mai mo daŋgai ne me mor Yesu Kristu, haozah wo ɓo. 24 Markus, Aristarkus, Demas, tǝkine Lukas mai mo tǝ joŋra yeɓ ne me haora zah wo ɓo ta.
25 Dǝɓlii Yesu Kristu mo ẽe we daŋ.
© Bible Moundang © Alliance Biblique du Tchad, 1996.
