Ezekias nyiŋ zapee goŋ Babilon
(2 ZaG 20:12-19)1 Ne cok ah Marduk-Baladan we Baladan goŋ sǝr Babilon pee leetǝr tǝkine fan haozah wol wo Ezekias, mor laa Ezekias yea ne syemme. 2 Fan mai goŋ Babilon mo joŋni, ɓǝ ah 'nyah suu Ezekias. So cuu yaŋ rǝk fan ah ma vãm solai ne ma rǝk vãm kaŋnyeeri ne mǝ ɓǝrdi, ne mǝ nǝm mai moo lee pǝsyemme, ne yaŋ rǝk fan sal ahe, tǝkine fan mai mo ɓǝr yaŋ rǝk fan ah daŋ nyi zapee goŋ Babilon. Fan mai mo ɓǝr yaŋ ah ne mai mo pǝ sǝr goŋ ah daŋ Ezekias mo cuu nyi zai ya kǝka. 3 So profeto Esaia ge wo goŋ Ezekias, faa nyi ko: Za mai faara ɓǝ fẽe nyi mo ne? Gera gin kẽe ge ne? Ezekias faa: Gera gin sǝr maɗǝk ah ge ɓo wo ɓe, gera gin Babilon ge ɓo. 4 Esaia fii ko faa: Kwora fẽe ɓǝr yaŋ goŋ ɓo taataa ne? Ezekias zyii faa: Kwora fan mai mo ɓǝr yaŋ rǝk fan ɓe daŋ, coŋ fan ki ya.
5 So Esaia faa nyi Ezekias: Mo laa ɓǝ faa Dǝɓlii mo faa ɓo ɗao. 6 Mo ẽe ɗǝ, zah'nan ah no ginni, a ga woora fan mai mo ɓǝr yaŋ ɓo daŋ ne fan mai daŋ pa ɓo lii ra mo taira ɓo daga ɓaa daŋ kal ga sǝr Babilon ne ko, fan ki ka ga coŋ ya syaŋsyaŋ. 7 A ga woora wee ɓo manyeeki ah mai mo bem ne suu ɓo, a ga ciŋra syẽe, a joŋra yeɓ yaŋ goŋ Babilon. 8 Ezekias faa nyi Esaia: Ɓǝ faa Dǝɓlii mai mo faa, a pǝsãhe. Mor Ezekias foo ɓo: pǝ zah'nan 'min jam tǝkine ɓǝ sãh ga yea no, kii ɓe.
© Bible Moundang © Alliance Biblique du Tchad, 1996.
