Tǝɗii we profeto
1 So Dǝɓlii faa nyi me: Mo ɓaŋ fan ŋwǝǝ fan malii ah mai dǝɓ moo ŋwǝǝ fan tǝl ahe, mo ŋwǝǝ fan tǝl ah ne syel masin maluuri, faa: Maher-Syalal-Has-Baz, tǝgba faa: Za syiŋ ɓii ga woora fan ɓii kal ne gwari. 2 Mo kyeɓ za matǝ goŋga ah gwa, pa joŋzahsyiŋ Urias ne Zakarias we Berekia, ka mo yeara na za syedowal.
3 Comki fahfal ah me kaa ne mawin ɓe, gbǝ ɓilli, byaŋ we worre. Dǝɓlii so faa nyi me: Mo ɗii ko ne Za-Syiŋ-Ɓii-Ga-Woora-Fan-Ɓii-Kal-Ne-Gwari. 4 Ka wel ah joŋ dǝɓlii nǝn gak ɗii Mammǝǝ ne Daddǝ ya ba, goŋ Asiria ga woo joŋ yaŋ Damaskus ne fan ma lwaa zah sal yaŋ Samaria daŋ kal ne ko.
Goŋ Asiria tǝ ginni
5 Dǝɓlii so faa ɓǝ nyi me faɗa, 6 faa: Za mai soɓra bii Siloa mai moo ɗuu syeesyee, so kal tǝ coora ne gal pel goŋ Rezin ne goŋ Peka. 7 Mor ahe, ame Dǝɓlii, me ga pee goŋ Asiria ne sooje ah daŋ ka mo ge ruu sal ne Yuda. A ga baara cok tǝgbana bii Efrat moo baa ne zahcii ah daŋ. 8 A ga ɓaŋra sǝr Yuda tǝgbana bii, a ga baa cok daŋ ŋhaa dai solle, a woo fan kal ne daŋ.
Masǝŋ no ne na! Yee ah a pǝ'ahe, a ga rǝǝ tǝ sǝr ka byak na daŋ.
9 Awe za sǝrri, we tai ge wo ki ne ɗuu galle! Za mai we kaa ɓo wo sǝr pǝ cok maɗǝk ahe, we syii sok we laa! We zyeɓ suu ka ruu salle, amma we ɗuu galle! 10 We zyeɓ ɓǝ ɓii mai we tǝ ga joŋ! Amma ɓǝ ah a ga yea tǝkolle. We faa ɓǝ mai zahzyil ɓii mo 'yah daŋ! Amma ka ga yea ne yeɓ ya, mor Masǝŋ no ne ru.
Dǝɓlii lai profeto ahe
11 Dǝɓlii lai me ne swah ah faa: mo syee tǝ fahlii mai zai moo syeera gŋ ka. So faa: 12 Mo tai zah ne zai ka, mo ɗuu gal fan mai moo ɗuura gal ah ka. 13 Mo foo, ame Dǝɓlii ma ne swah daŋ, ame daŋdaŋ. Ame ye Dǝɓ mai ka mo ɗuu gal ah vaŋno to. 14 Mor daŋdaŋ ɓe me ne ko, ame tǝgbana tǝsal mai za moo ɓee tǝ ɓal tǝl ahe, ame tǝgbana mǝmmǝǝ mai moo ga gbah za ma pǝ sǝr goŋ Yuda ne mǝ goŋ Israel tǝkine za yaŋ Jerusalem daŋ. 15 Za pǝlli ga ɓeara tǝ ɓal a leara ga sǝŋ. A ga danra pǝ mǝmmǝǝ, a ga leara ga sǝŋ, a hahra suu nahmnahm.
Lai tǝ ɓǝ fii wulli
16 Ame 'yah ka za syee mor ɓe mo byakra ɓǝ mai Masǝŋ mo nyi nyi me pǝsãhe. 17 Dǝɓlii soɓ suu ah ɓo ka ka zan ah mo kwora ko taŋraŋ ya, amma ne daŋ laŋ, me soɓ suu ɓe ɓo wol ahe, ɓǝ foo ɓe uu ɓo tǝl ahe.
18 We ẽe ɗǝ, me no ne wee mai Dǝɓlii mo nyi ra ɓo me. Dǝɓlii ma ne swah daŋ, mai fakal goŋ ah mo tǝwaa Sion, joŋ na ɓo na fan ma cuu fan nyi za Israel.
19 Za ga faara nyi we ka we fii ɓǝ zah za ma faara ɓǝ ne za ma wulli, tǝkine za ma joŋ kǝndaŋne. Ara ye za mai moo faara ɓǝ ne kyaŋ laŋ tǝgbana juu. A ga faara, za daŋ mo fiira ɓǝ gin zah coksyiŋrĩ, mo fiira za ma wul mor za mai mo no sǝŋ. 20 Ka we zyii zah ɓǝǝ faa: Pǝram we laa ɓǝ mai Dǝɓlii mo tǝ cuu nyi we! We laa ɓǝ kol ɓǝǝ mai mo tǝ faara nyi we ka, ɓǝ ah ka ga joŋ we pǝsãh ya.
Zah'nan gaɓɓe
21 Za ga myahra pǝ sǝr ahe, swah ka ga yea wo ɓǝǝr a, a ga yeara ne koŋne. Ne cok koŋ mo i ra ɓe, a ɓaŋra kpãhe, a ga tǝǝra goŋ ɓǝǝ tǝkine Masǝŋ ɓǝǝra. A ga ẽera cok ga coksǝŋ, 22 wala a ga ẽera cok ga tǝ sǝrri, amma ka ga kwora fan ki ya, sai gaɓ ne bone, tǝkine cokfuu ma ren gal mai mo danra ɓo gŋ. Ka ga lwaara fahlii ka ɗuu ǝ̃ǝ pǝ zah'nan gaɓ mai ya.
© Bible Moundang © Alliance Biblique du Tchad, 1996.
