Yefta ǝ̃ǝ za Israel jol Ammonien
1 Yefta dǝɓ Giliat, ako ye dǝɓ ruu sal maswah ahe, amma na mawin tǝkoi yo. Giliat ye byaŋ Yefta. 2 Mawin syak Giliat bem wee wǝǝ nyi ko ta. Ne cok wee mawin mo joŋra zaluu o, nĩira Yefta ɓoo. Faara nyi ko: Mo ka re yaŋ pa man a, mor mo ye na mawin ki. 3 Yefta ɗuu gin wo wee pah ah kalle, ge kaa sǝr Toɓ. Tǝlim manyeeki ah taira wo Yefta. Pǝ̃ǝra kal ne ki.
4 So fahfal ah nje, Ammonien gera ka ruu sal ne za Israel. 5 Ne cok Ammonien mo tǝ ruura sal ne za Israel, zaluu Giliat kal ge kyeɓra Yefta pǝ sǝr Toɓ. 6 Faara nyi Yefta: Mo ge ka mo joŋ dǝɓlii sal ɓuuru, mor ka na ruu sal ne Ammonien. 7 Amma Yefta zyii faa nyi zaluu Giliat: Awe syiŋ me, we nĩi me gin yaŋ pa ɓe ɓoo ya ne? Mor fẽe we so ge wo ɓe zǝzǝ̃ǝ ne cok mai we pǝ bone ne? 8 Zaluu Giliat faara nyi Yefta: Mor ah ako ye joŋ ru ge ɓo wo ɓo zǝzǝ̃ǝko, ka mo ge ne ru, ka mo ruu sal ne Ammonien, ka mo kaa dǝɓlii ɓuu za Giliat daŋ. 9 Yefta faa nyi zaluu Giliat: We ge yaŋ ne me, ka me ruu sal ne Ammonien, so Dǝɓlii mo ge soɓ ra nyi me ta ɓe, me ga kaa dǝɓlii ɓii 'manna ne? 10 Zaluu Giliat zyii faara nyi Yefta: Dǝɓlii ye mo yea pa syedowal kǝsyil mana. 'Manna ru ga joŋ tǝgbana mo faa ɓo.
11 So Yefta ur kal ne zaluu Giliat, za ge ɓaŋra ko kan dǝɓlii ɓǝǝ ne tǝkine swah sal ɓǝǝra. Yefta so faa ɓǝ zah ah daŋ pel Dǝɓlii Mispa.
12 Yefta pee zapee ge wo goŋ Ammonien, ge faara nyi ko: Ɓǝ fẽe kǝsyil man ŋhaa ka mo ge mo ruu sal ne sǝr ɓe ne? 13 Goŋ Ammonien faa nyi zapee Yefta: Ne cok za Israel mo gera gin sǝr Egiɓ ge, ge bǝǝra sǝr ɓe daga el Arnon ŋhaa ge dai el Jabok ne el Yordan. Zǝzǝ̃ǝ mo jin ko nyi me ne jam.
14 So Yefta pee za ge wo goŋ Ammonien faɗa, faa: 15 We ge ree nyi ko Yefta faa sye: Za Israel nyiŋra sǝr Moab wala sǝr Ammonien ɗǝ ya. 16 Amma ne cok mo pǝ̃ǝra gin sǝr Egiɓ, za Israel syeera kǝsyicok ŋhaa ge daira mabii Syẽ, so ge daira Kades. 17 Za Israel peera zapee ge wo goŋ Edom, faara nyi ko: Mo soɓ ru pǝ̃ǝ pǝ sǝr ɓo kal ɗao. Amma goŋ Edom zyii laa ɓǝ faa ɓǝǝr a. So peera pee ge wo goŋ Moab, amma zyii ya ta, ŋhaa joŋ za Israel so nǝnra Kades. 18 So syeera kal ge kǝsyicokki, kiŋra kah sǝr Edom ne sǝr Moab, ge daira kah sǝr Moab nǝfah kǝmorcomzah'nan ahe, ge ɗǝrra kah el Arnon nǝzakǝŋhaa, maara ɓal ɓǝǝ ge tǝ sǝr Moab ya, mor zahsyee Moab ge kan ɓo ne el Arnon. 19 Za Israel so peera zapee ge wo Sihon goŋ Amorien mai mo kaa goŋ ɓo Hesbon. Faara nyi ko: Ru pǝǝ mo, mo soɓ ru pǝ̃ǝ pǝ sǝr ɓo ka ga cok mai ru tǝ ga gŋ sa. 20 Amma Sihon zyii ka za Israel mo ge pǝ̃ǝra pǝ sǝr ah kal a. Sihon tai sooje ah daŋ ge gbahra jul sal ɓǝǝ Jahaza, so ruura sal ne za Israel. 21 Dǝɓlii Masǝŋ Israel soɓ Sihon ne sooje ah daŋ ge mor jol za Israel, ikra ra. Za Israel nyiŋra sǝr Amorien mai mo kaara ɓo cok ah daŋ naiko. 22 Rera sǝr Amorien daŋ, tǝŋ daga kah el Arnon ŋhaa ge dai el Jabok, so daga kǝsyicok ŋhaa ge dai el Yordan. 23 Dǝɓlii Masǝŋ Israel ye nĩi Amorien pel zan ah Israel. Zǝzǝ̃ǝko mo 'yah ka nĩi ru ne? 24 Fan mai masǝŋ ɓo Kemos mo nyi mo ka mo re ɓe, mo ka re ya ne? Nai ta, fan mai Dǝɓlii Masǝŋ ɓuu mo nĩi pel ɓuu daŋ ru re fan ahe. 25 Amo sye mo kal Balak we Sippor goŋ Moab ɓe ne? Kyeɓ bal ne za Israel taa ɓe ne? Ruu sal ne za Israel ɓe ne? 26 Ne cok za Israel mo kaara Hesbon ne yaŋ ah maluu ra, Aroyer ne yaŋ ah maluu ra, tǝkine yaŋ manyee ah ma ga tǝ fahlii Arnon daŋ syii temere sai ko, mor fẽe we nyiŋ ne cok ah ya ne? 27 Ma ɓe, me joŋ faɓe' wo ɓo ya, amma ma ɓo, mo tǝ joŋ wo ɓe pǝɓe' ne mai mo tǝ ruu sal ne mee ko. Dǝɓlii mai ako ye mo pa kiita mo ŋgoŋko kiita kǝsyil za Israel ne Ammonien tǝ'nahko. 28 Amma goŋ Ammonien zyii laa ɓǝ mai Yefta mo pee ge nyi ko ya.
29 So Tǝ'yak Dǝɓlii ge tǝ Yefta, ur kyãh pǝ sǝr Giliat ne Manasse, kal ge Mispa ma Giliat, ur gin Mispa Giliat pǝ̃ǝ kal ge sǝr Ammonien. 30 Yefta haa zah pel Dǝɓlii faa: Mo soɓ Ammonien ge mor jol ɓe 'manna ɓe, 31 so me pii soo gin cok ruu sal ne wee Ammonien ge jam ɓe, koo zune moo ga pǝ̃ǝ gin zahfah yaŋ ɓe mor ka gin zyaŋ tǝ ɓe daŋ, ka dǝɓ ah mǝ Dǝɓlii yo. Me ga joŋ syiŋ suŋwii ne ki.
32 So Yefta pǝ̃ǝ ka ruu sal ne Ammonien, Dǝɓlii soɓ ra ge mor jol ahe. 33 Tǝŋ ik ra daga Aroyer ŋhaa ge dai Minnit, yaŋ maluu jemma gwa, ŋhaa so ge dai Abel-Keramim gbǝm. Ik za pǝlli, Ammonien wuura pel za Israel wãkkǝkǝ.
Mǝlaŋ Yefta
34 Ne cok Yefta mo tǝ pii soo gin yaŋ ah Mispa, mǝlaŋ ah pǝ̃ǝ mor ka ga zyaŋ tǝl ah ne fan kyẽm tǝkine daa. Mǝlaŋ ah a jol ah vaŋno sǝ, ka ne we maki ah ya, koo we worre wala mǝlaŋ winni, ka ne ya. 35 Ne cok mo kwo mǝlaŋne, ŋgǝ̃ǝ mbǝro wo suu ah faa: Kaiya mǝlaŋ ɓe, mo dan me pǝzyil ɓǝ foo pǝ'man ɓe, mo dan me pǝ gaɓ mai nai mor fẽene? Mor me haa zah ɓo pel Dǝɓlii, me ka gak soɓ ya.
36 Mǝlaŋ faa nyi ko: Daddǝ, mo haa zah ɓo pel Dǝɓlii ɓe, mo joŋ wo ɓe tǝgbana ɓǝ faa ɓo. Mor Dǝɓlii faŋ val nyi mo tǝ za syiŋ ɓo Ammonien ɓe. 37 So faa nyi pamme: Me 'yah mo joŋ fan mai me tǝ ga fii nyi me. Mo soɓ me fĩi gwa, ka me ur me ge tǝgǝǝ waare, mor ka me ge yeyee wul woi suu ɓe ne bai ɓe ra gŋ. 38 Pam faa nyi ko: Mo gyo. Soɓ ko fĩi gwa. So ur kal gŋ ne bai ah ra ge yeyee wul suu ahe, mor tǝ ga wǝ bai kan wor ne bai byaŋ welle. 39 Ne cok fĩi gwa ah mo vǝrri, pii soo ge wo pah ahe, pam so joŋ ne ki tǝgbana haazah ah mo haa ɓo. Amma mǝlaŋ ah tǝ za wǝǝr a.
Ɓǝ ah so ciŋ zahsyiŋ za Israel o. 40 Ne syii daŋ wee za Israel maŋwǝǝ a ga yera yee mǝlaŋ Yefta dǝɓ Giliat zah'nan jemma nai ka foo ɓǝ ahe.
© Bible Moundang © Alliance Biblique du Tchad, 1996.
