1 Ɓǝ mai Dǝɓlii faa nyi Malakias ka mo faako nyi za Israel.
Dǝɓlii ne 'yah zan ah Israel
2 Dǝɓlii faa: Ame 'yah we ɓo. Amma awe so faa: Amo 'yah ru ɓo ɗǝne? Dǝɓlii zyii faa: Esau ne Yakuɓ ara ye naa mǝǝ, amma me 'yah Yakuɓ ne morsǝ̃ǝ ahe, 3 so me syiŋ Esau ne morsǝ̃ǝ ah daŋ. Ame ɓeɓ sǝr Esau, me joŋ sǝr ah ciŋ cok mai nǝǝ cok moo kaa gŋ.
4 So Edomien mo faara: Yaŋ ɓuu maluu ɓeɓ ɓe, amma ru ga vuu yaŋ ah ra ɓe, Dǝɓlii ga zyii faa: We soɓ ra vuu, me so ga dah yaŋ ah ra ga sǝŋ faɗa. Za ga ɗiira sǝr ɓǝǝ ne sǝr maɓe' ahe, ne za mai Dǝɓlii mo ɓaŋ kpãh ɓo tǝ ɓǝǝ ga lii.
5 We ga kwo fan ah ne nahnǝn ɓiiri, so we ga faa: Dǝɓlii a pǝyǝk koo ne pǝ sǝr mai mo sǝr Israel ye ka daŋ.
Dǝɓlii lai za joŋzahsyiŋrĩ
6 Dǝɓlii ma ne swah daŋ faa nyi za joŋzahsyiŋrĩ: Wel a yii pamme, dǝɓ yeɓ a yii dǝɓlii ahe. Ame ye pa ɓiiri, we ka yii me ya mor fẽene? Ame ye dǝɓlii ɓiiri, we ka ɗuu me ya mor fẽene? Awe syẽa me, so awe faa ru syẽa mo nekẽne? 7 Awe syẽa me, ne mai wee joŋ syiŋ ne farel ma ne 'nahm ah tǝ cok joŋ syiŋ ɓe. So awe faa: Ru syẽa mo ne fahlii fẽene? Awe syẽa me ne mai wee faa cok joŋ syiŋ Dǝɓlii cok kol o. 8 Ne cok mai wee ɓaŋ faɓal marǝ̃ǝ ah joŋ syiŋ wo ɓe ne ko, awe lǝŋ we tǝ joŋ pǝsãh ne? Ne cok wee ɓaŋ faɓal malem ah wala ma ne syem ah joŋ syiŋ wo ɓe ne ko, awe lǝŋ we joŋ pǝsãh ne? We nyi fan ma morãi nyi goŋ ɓii ɗao, a 'nyah suu ah ne? Wala a ga laa pǝ'nyah ne we no ne?
9 Zǝzǝ̃ǝko awe za joŋzahsyiŋrĩ, we laɓ fii Masǝŋ ka mo joŋko ɓǝ sãh wo man ɗao, ka ga laa juupel ɓii ya, ko ka ɓǝɓe' ɓii yo. 10 Dǝɓlii ma ne swah daŋ faa: Me 'yah dǝɓ ki vaŋno kǝsyil ɓii mo cooko zahfah yaŋ ɓe, ka mo cak zah ɓii ne ga cok wii mai mo ka ne yeɓ ya tǝ cok joŋ syiŋ ɓe. Me ka tǝ laa pǝ'nyah ne we ya syaŋsyaŋ, me ka ga nyiŋ fan nyi mai we ga nyi nyi me ya. 11 Za sǝr ne lii ah daŋ tǝ yiira me, pǝ cok daŋ a tǝǝra ɓǝrdi wo ɓe gŋ, a nyira fan masãh ah nyi me, ara daŋ a yiira me. 12 Amma awe ɓeɓ tǝɗii ɓe ne mai wee faa cok joŋ syiŋ ɓe ka ne yeɓ ya, tǝkine mai wee syẽa farel mai wee joŋ syiŋ ne tǝl ahe. 13 Awe faa we tǝ gǝgaɓ kolle. We syẽa me. Awe gin nyi me ne faɓal mai we kiŋ ɓo ne nyinni, wala ne mai mo lelem ɓo, koo ne ma ne syem ahe, we lǝŋ me ga nyiŋ jol ɓii ne? 14 Tǝkẽawãk tǝ dǝɓ matǝ vǝrvǝr ah mai mo ne faɓal masãh ah pǝzyil ŋgaɓ fan ahe, mo faa zye ga nyi nyi me moo so ɓaŋ maɓe' ah joŋ syiŋ wo ɓe ne ko. Mor ame ye Goŋ malii ahe, za sǝr daŋ a ɗuura me. Ame Dǝɓlii ma ne swah daŋ me faa naiko.
© Bible Moundang © Alliance Biblique du Tchad, 1996.
