Lii ne ɓǝ Abraham
1 Ru ga faa ɗǝne? Pa ɓuu lii Abraham ma tǝŋ ban ɓuu kpak lwaa fẽene? 2 Kǝnah Masǝŋ mo kee Abraham na dǝɓ matǝ njaŋ mor yeɓ joŋ ah ɓe, ka a no ne fan ka yii suu ah ne tǝl ahe, amma ka ne fahlii ka yii suu ah pel Masǝŋ ya. 3 Ɗerewol faa: Abraham nyiŋ Masǝŋ, so Masǝŋ nyiŋ ko na dǝɓ matǝ njaŋ mor iŋ ahe. 4 Dǝɓ mai mo tǝ joŋ yeɓ mo nyiŋ fan soo ah ɓe, dǝɓ ka kee tǝgbana ɗǝǝ facokkol ɓo ya, mor soora gaɓ ah ɓo. 5 Amma dǝɓ mai mo joŋ yeɓ ya, mo so nyiŋ Masǝŋ mai moo kee pa faɓe' na dǝɓ matǝ njaŋ ɓe, Masǝŋ ga kee iŋ ah tǝl ah na njaŋ ahe. 6 Mor ah David faa a pǝ'nyah wo dǝɓ mai Masǝŋ mo nyiŋ ko ɓo na dǝɓ matǝ njaŋ bai yeɓ joŋ ahe. Ɗerewol faa:
7 A pǝ'nyah wo za mai Dǝɓlii mo rwah faɓe' ɓǝǝ ge lal ɓe,
Rii ɓǝɓe' ɓǝǝ ɓe.
8 A pǝ'nyah wo dǝɓ mai Dǝɓlii mo ka tǝ kee faɓe' ah tǝl ah yao.
9 Ɓǝ 'nyah mai David mo faa ɓǝ ah a mor za ma daakan to ne? Ka mor za mai mo daara kan a wah ya ne? Mor Ɗerewol faa: Masǝŋ nyiŋ Abraham na dǝɓ matǝ njaŋ mor iŋ ahe. 10 Fan mai joŋ nekẽne? Wala joŋ ka Abraham daakan ɓe ne? Koo ka a ne gãhnyah ah ba ne? Fan ah joŋ ɓo ka fahfal daakan ah ya, amma joŋ ka daakan a ba. 11 So Abraham lwaa daakan fahfal ah tǝgbana fan ma cuu fanne. A na lamba ma cuu Masǝŋ nyiŋ ko ɓo na dǝɓ matǝ njaŋ mor iŋ ah kǝpel ka ɓah daakan a ba. So Abraham ciŋ pah za mai mo daara kan a mo tǝ nyiŋra Masǝŋ daŋ. Masǝŋ ga nyiŋ ra tǝgbana za matǝ njaŋ ahe. 12 So ako ye pah za ma daakan ta, ka tǝ cuu za ma syeera mor ɓǝ daakan to nai sǝ ya, amma a cuu za mai moo syeera tǝbǝlam iŋ pa man Abraham ne cok ka ɓah daakan a ba.
Ɓǝ faa Masǝŋ dǝɓ lwaa ne iŋni
13 Masǝŋ faa nyi Abraham tǝkine morsǝ̃ǝ ah a ga rera sǝrri. Masǝŋ faa ɓǝ mai nyi Abraham mor tǝ syee mor ɓǝ lai ya, amma mor Masǝŋ nyiŋ ko ɓo na dǝɓ matǝ njaŋ mor iŋ ahe. 14 Kǝnah za mai mo tǝ syeera mor ɓǝ lai ye mo tǝ ga rera fan Masǝŋ to ɓe, ka iŋ ka ne yeɓ ya, so ka ɓǝ mai Masǝŋ mo faa laŋ ka yǝk ah kǝkao. 15 Mor ɓǝ lai a gin tǝ dǝɓ ne kpãh Masǝŋ, amma pǝ cok mai ɓǝ lai mo kǝka gŋ ya ka zyak ɓǝ lai laŋ ka gŋ ya ta.
16 Ɓǝ mai Masǝŋ mo faa ɓo a mor iŋni, mor ka mo yea na facokkol mai Masǝŋ mo nyi ɓo, ka ɓǝ ah mo yea mor za ma morsǝ̃ǝ Abraham daŋ, ka mor za mai mo tǝ syeera mor ɓǝ lai syak ɓǝǝ to ya, amma a mor za mai mo tǝ nyiŋra Masǝŋ tǝgbana Abraham mo nyiŋ ta, mor Abraham ye pah za ma iŋ ah daŋ. 17 Tǝgbana Ɗerewol mo faa: Me joŋ mo ɓo na pah za pãa daŋ. Ako ye pa man pel Masǝŋ mai mo nyiŋko ɓǝ ah ɓo - Masǝŋ mai moo syem za ma wul so yea ne cee, mai moo ɗii fan mai mo kǝka tǝgbana fan ah no. 18 Abraham nyiŋ ɓǝ ah tǝkine byak fan ahe. Fan ah ka nǝn byak ya, amma Abraham nyiŋ tǝkine byak ɓǝ ahe, so ciŋ pah za pãa daŋ tǝgbana mai Masǝŋ mo faa nyi ko: Pãa morsǝ̃ǝ ɓo ga yea naino. 19 Ne cok ah laŋ ka Abraham joŋ syii ɓo tǝgbana temere, koo ne cok mo tǝ foo ɓǝ suu ah azye tǝgbana wul o laŋ, amma iŋ ah wuu ya, Sara laŋ cok nǝn byaŋ wel ka wol ah yao. 20 Abraham uu ne iŋ ah pǝyakke, ka syesyel tǝ ɓǝ faa Masǝŋ ya, jeertǝ iŋ ah so swaako ge pel pǝswahe, yii Masǝŋ. 21 Mor tǝ belbel ɓǝ mai Masǝŋ mo faa a ga joŋ fan ahe. 22 Mor ah Masǝŋ nyiŋ Abraham na dǝɓ matǝ njaŋ mor iŋ ahe. 23 Amma ɓǝ mai mo faa, Masǝŋ nyiŋ ko na dǝɓ matǝ njaŋ, ɓǝ ah ŋwǝǝ ɓo ka mor ah to ya, 24 amma ɓǝ ah ŋwǝǝ ɓo mor man ta. Na nyiŋ Dǝɓ mai mo ur Yesu Kristu Dǝɓlii man gin pǝ wul kǝsyil za wul ɓe, Masǝŋ ga nyiŋ na tǝgbana za matǝ njaŋ ta. 25 Yesu mai Masǝŋ mo soɓ ko wǝ mor faɓe' mana, so ur gin pǝ wul mor ka joŋ na tǝgbana za matǝ njaŋ ah pel Masǝŋ.
© Bible Moundang © Alliance Biblique du Tchad, 1996.
