Yaŋ mai ka za mo ɗuu zah ma wul ge muŋ gŋ
(KeeZ 35:9-28Jos 20:1-9)1 Ne cok Dǝɓlii Masǝŋ ɓii mo vǝr za mai mo tǝ ga nyi sǝr ɓǝǝ nyi we, so we nyiŋ yaŋ ɓǝǝ maluu ne yaŋ swul ɓǝǝ daŋ we kaa gŋ ɓe, 2 ka we nǝǝ yaŋ maluu ah sai. 3 We woŋ sǝr mai Dǝɓlii Masǝŋ ɓii mo nyi ɓo nyi we camcam sai, ka we nǝǝ yaŋ malii ah pǝ sǝr ah ra daŋ vaŋno vaŋno, ka dǝɓ mo zyak i dǝɓ ki pǝ wul ɓe, mo ɗuuko zah mawul ge muŋ gŋ. 4 Dǝɓ mo zyak i dǝɓ ki pǝ wul mo syiŋ ko ɓo ka ɓaa ya ɓe, ka dǝɓ ah mo ɗuu zah mawul ge muŋ pǝ yaŋ maki ah vaŋno kǝsyil yaŋ raiko. 5 Tǝgbana za gwa mo gera cok mor ki ka ga cen kpuu, kǝlaɓ ah mo gbel ge ce dǝɓ ki pǝ wul ɓe, ka dǝɓ ah mo ɗuuko zah mawul ge muŋ yaŋ maki ah kǝsyil yaŋ tǝ sai raiko. 6 We nǝǝ yaŋ vaŋno to ɓe, so cok ah mo pǝɗǝk ɓe, pa mai mo tǝ kyeɓ ka faŋ val wul tǝ dǝɓ ma in wul a ga lwaa mor ahe. So a ga i dǝɓ mai mo ka ne ɓǝɓe' ya pǝ wul ne kpãh mai mo ɓaŋko ɓo, so laŋ ka dǝɓ ah zyak ce dǝɓ ah ɓo pǝ wul zyakke, syiŋ ko ɓo ka syiŋ ya. 7 Mor ah me faa nyi we, ka we nǝǝ yaŋ maluu camcam sai mor ahe.
8 Ne cok Dǝɓlii Masǝŋ ɓii mo ge joŋ sǝr ɓii pǝ'man tǝgbana mai mo faako ɓǝ ah ɓo nyi pa ɓii lii ra, mo nyiko sǝr ah nyi we daŋ na mo faako ɓe, 9 ka we so nǝǝ yaŋ maluu maki ah ra sai faɗa. We tǝ joŋ fan mai daŋ me faa ɓǝ ah ɓo nyi we tǝ'nahko, so we tǝ 'yah Dǝɓlii Masǝŋ ɓiiri, we tǝ syee mor ɓǝ cuu ah ra ta ɓe, a ga nyi sǝr mai nyi we. 10 We joŋ naiko, ka za ma bai ɓǝɓe' mo wuk ka, ka we joŋ ɓǝɓe' ne ik ra pǝ wul pǝ sǝr mai Dǝɓlii Masǝŋ ɓii mo tǝ nyi nyi we ka.
11 Amma dǝɓ mo syiŋ dǝɓ ki ɓo, mo lal kaafuu ah mo i ko pǝ wulli, so dǝɓ ah mo ɗuuko zah mawul ge muŋ yaŋ maki ah kǝsyil yaŋ matǝ sai rai ɓe, 12 ka zaluu yaŋ mai dǝɓ ah mo gŋ, mo peera pee ge kyeɓ dǝɓ ah gŋ ka mo gbǝra ko nyi zum wul mai mo tǝ kyeɓ ka faŋ val wul tǝl ahe, ka dǝɓ ah mo i ko ge lal pǝ wulli. 13 We kwo syak tǝ dǝɓ ah ka, we muŋ tǝtǝl dǝɓ ah gin kǝsyil za Israel, mor ka we kaa jam.
Ɓǝ lai tǝ ɓǝ zahsyee 'wah matãa
14 We tǝɓ zahsyee 'wah mai pa ɓii lii ra mo kanra ɓo daga ɓaaɓe pǝ sǝr mai Dǝɓlii Masǝŋ ɓii mo nyi ɓo nyi we ka.
Ɓǝ lai tǝ ɓǝ syedowal
15 Syedowal zah dǝɓ vaŋno kii nǝn pǝkoŋ mai ka ɓǝ ah mo gbǝ pa ma joŋ faɓe' ya, sai syedowal ah mo yea ne zah za gwa koo sai ɗǝ. 1 Tim 5:19; Yahu 10:28 16 Dǝɓ vaŋno mo kyeɓ ka gwah ber cen dǝɓ ne ka rǝk ɓǝɓe' tǝl ah ɓe, 17 ka ara gwa daŋ mo gera pǝ cok mai za moo ga juupel gŋ, ka za joŋzahsyiŋ ne za lakaali mai mo tǝ joŋra yeɓ gŋ mo ŋgoŋra kiita ɓǝ ahe. 18 Za lakaali mo kyeɓra mor ɓǝ ah pǝsãhe, ka dǝɓ mo ge ce dǝɓ ki mo gwah ber zah dǝɓ ah ka rǝk ɓǝ tǝtǝl ah ne ɓe, 19 ka mo ŋgoŋra kiita tǝl ah tǝgbana mai mo tǝ ga ŋgoŋra tǝ dǝɓ mai mo ge ce ko kǝnah ɓo. Ne fahlii mai we ga nĩi ɓǝɓe' kǝsyil ɓii ga lalle. 20 So koo zune mo laa ɓǝ fan mai mo joŋ ɓo ɓe, a ga ɗuu galle, koo dǝɓ vaŋno ka fǝ̃ǝ ka joŋ fan maɓe' ma morãi faɗa yao. 21 We kwo syak tǝ pa ma joŋ faɓe' ka. Dǝɓ mo muŋ tǝtǝl dǝɓ ɓe, we muŋ tǝtǝl ah ta, mo nǝǝ nahnǝn nyi dǝɓɓi, mo nǝǝra nahnǝn nyi ta, mo hao syelle, mo haora syel ah ta, mo hao jol nyi dǝɓɓi, mo haora jol nyi ko ta, mo hao ɓalle, mo haora ɓal nyi ta.
© Bible Moundang © Alliance Biblique du Tchad, 1996.
