Lǝŋ mai za moo ɗǝǝra ne zah'nan gaɓɓe
(1 ZaG 5:11)1 Ɓǝ Etan Ezrakiyo.
2 Dǝɓlii, zah'nan daŋ me ga ɗǝǝ lǝŋ tǝ ɓǝ 'yah ɓo,
Cẽecẽe me ga cuu ɓǝ sãh ɓo.
3 Me tǝ ɓe, 'yah ɓo yea ga lii ga lii.
Ɓǝ sãh ɓo yea ga lii tǝgbana tǝlǝǝ sǝŋ mo no.
4 Mo faa: Me gbǝ zah ɓo ne dǝɓ mai me nǝǝ ɓo,
Me haa zah nyi dǝɓ yeɓ ɓe David, me faa:
5 Morsǝ̃ǝ ɓo ga kaa goŋ ga lii ga lii.
Me ga soɓ goŋ ɓo yea ga lii ga lii.
6 Dǝɓlii, fan coksǝŋ daŋ ga yiira mo mor yeɓ matǝ gǝriŋ mai mo joŋ ɓo,
A ga ɗǝǝra lǝŋ yii mo ne mor ɓǝ sãh ɓo.
7 Dǝɓlii, azu na mo coksǝŋ ne?
Kǝsyil angeloi azu na mo ne?
8 Amo pǝyǝk kǝsyil za matǝdaŋdaŋ coksǝŋ daŋ,
Ara daŋ tǝ ɗuura mo.
9 Dǝɓlii, Masǝŋ ma ne swah daŋ,
Dǝɓ mayǝk na mo kǝka.
Dǝɓlii, cẽecẽe amo pǝsãhe.
10 Mo kaa swah ɓo tǝ mabii daŋ.
Zyak mo wea mabii pǝlli laŋ, mo gak cakke.
11 Mo i Rahaɓ pǝ wulli,
Mo myah za syiŋ ɓo ne swah jol ɓo.
12 Sǝŋ ne sǝr daŋ ma ɓo yo.
Mo joŋ sǝr ne fan ma no gŋ daŋ.
13 Amo ye mo joŋ fahsǝŋ, ne fah morkǝsǝŋ daŋ.
Waa Tabor ne waa Hermon a ɗǝǝra lǝŋ yii mo ne ɓǝ 'nyahre.
14 Amo pǝswah ɗii ne! Swah ɓo a pǝ'man no cam!
15 Goŋ ɓo a njaŋ,
Cẽecẽe mo joŋ fan daŋ ne 'yahe, tǝkine goŋga.
16 A pǝ'nyah wo za mai moo yiira mo ne ɗǝǝ lǝŋni,
Ara ye za mai mo kaara ɓo tǝ laa pǝ'nyah pǝ cokfãi ɓo.
17 Zah'nan daŋ a laara pǝ'nyah ne mo,
A yiira mo mor amo njaŋ.
18 Mo ye nyi swah nyi ru ka ru nĩi za syiŋ ɓuuru.
Mo joŋ ɓǝ sãh ɓo wo ɓuu ru kaa kacella tǝ za syiŋ ɓuuru.
19 Mor amo ye pa byak ɓuuru,
Amo Dǝɓ matǝdaŋdaŋ Israel,
Mo ye goŋ ɓuuru.
Masǝŋ gbǝ zah ne David
20 Ɓaaɓe mo faa ɓǝ nyi za yeɓ ɓo ra ne lomme, mo faa:
Me maa njok goŋ tǝ dǝɓ swah salle,
Me kan goŋ ne dǝɓ mai me nǝǝ ɓo kǝsyil zana.
21 Me nǝǝ dǝɓ yeɓ ɓe David,
Me kan goŋ ɓii ɓo ne ki.
22 Swah ɓe ga yea ne ki,
A ga joŋ ko ciŋ dǝɓ swahe.
23 Koo za syiŋ ah mo urra ne ki laŋ,
Ka gak nĩira ko ya.
Za ɓe' ka ga kaara swah tǝl ah ya ta.
24 Me ga ik za syiŋ ah pel ahe.
25 Goŋga ɓe ne 'yah ɓe ga yeara ne ki,
Cẽecẽe me ga joŋ ko uu pǝswahe.
26 Me ga joŋ sǝr ah pǝ'manne,
Zahsyee sǝr ah ga ur daga mabii Mediterrania ŋhaa ga dai el Efrat.
27 A ga faa nyi me: Amo ye pa ɓe tǝkine Masǝŋ ɓe,
Mo ye pa byak ɓe tǝkine pa ǝ̃ǝ ɓe.
28 Me ga joŋ ko na welii ɓe,
Ako ye ga yea dǝɓlii tǝ za goŋ wo sǝr daŋ.
29 Me ga cuu 'yah ɓe nyi ko cẽecẽe,
Ɓǝ gbanzah ɓe mai me gbǝ ɓo ne ki a yea ga lii ga lii.
30 Morsǝ̃ǝ ah ga kaa goŋ ga lii ga lii.
Goŋ ah ga yea ga lii tǝgbana tǝlǝǝ sǝŋ mo no.
31 Amma wee ɓǝr ah mo soɓra ɓǝ lai ɓe mo syeera mor ah ya,
32 Wala koo mo zyakra tǝ ɓǝ ah mo syeera mor ɓǝ ah njaŋ ya ɓe,
33 Me ga ŋgoŋ kiita tǝ ɓǝǝ mor bai laa zah ɓǝǝra,
Me ga loɓ ra ne bǝrǝǝ mor faɓe' ɓǝǝra.
34 Amma me ka soɓ David bai 'yah ko ya,
Me ka soɓ ɓǝ gbanzah mai me gbǝ ɓo ne ki laŋ ya ta.
35 Me ka zǝǝ tǝ ɓǝ gbanzah ɓe ka fer ɓǝ mai me faa ne zah ɓe ya.
36 Me haa zah nyi David ɓal vaŋno ne tǝɗii ɓe matǝdaŋdaŋ,
Me ka gwah ber nyi ko ya.
37 Morsǝ̃ǝ ah ga yea ga lii ga lii,
Me ga byak goŋ ah ga lii tǝgbana me tǝ byak comme,
38 A ga yea wo ɓe tǝgbana fĩi mai moo sǝǝ cok ne suŋ daŋ.
Yee tǝ ɓǝ goŋ mo leere
39 Amma zǝzǝ̃ǝko mo ɓaŋ kpãh ne goŋ mai mo nǝǝ ko ɓo,
Mo soɓ ko ɓoo ɓe.
40 Mo syel ɓǝ gbanzah mai mo gbǝ ɓo ne dǝɓ yeɓ ɓo,
Mo ɓoo njok goŋ ah ge lalle.
41 Mo dah ɓaale yaŋ ah ge sǝŋ,
Mo dah yaŋ sal ah ge sǝŋ ta.
42 Za mai moo gin pǝ̃ǝra kah ah daŋ a kiŋra fan yaŋ ahe,
Jǝk ah ra daŋ a syakra ko.
43 Mo nyi swah ɓo nyi za syiŋ ah ra daŋ,
Mo joŋ ra ɓo tǝ laa pǝ'nyah ne ɓǝ ahe.
44 Mo ɓeɓ fan sal ah ra,
Mo zyii ka gbah jol ah cok ruu sal a.
45 Mo ɓaŋ kǝndaŋ goŋ jol ahe,
Goŋ ah ciŋ fan jok sǝrri.
46 Mo joŋ ko tam gwari,
Mo joŋ ko ɓo nai ka swãa mo re ko.
Juupel ma fii ka Masǝŋ mo wǝǝ dǝɓɓi
47 Dǝɓlii, mo ga muŋ suu ɓo ga lii ne?
Mo ga kaa ne kpãh ga lii nai ne?
48 Dǝɓlii, mo foo ɓǝ syii dǝfuu mo pǝcõo ɗao,
Mo joŋ ra ka mo yeara wo sǝr ge lii ya.
49 Dǝɓ mai moo kaa bai wun ye zune?
Azu gak ǝ̃ǝ suu ah gin zah wul ne?
50 Dǝɓlii, ɓǝ sãh ɓo ma kǝpel kŋ kẽne?
Ɓǝ gbanzah ɓo mai mo faa nyi David kŋ kẽne?
51 Mo foo ɓǝ swãa mai dǝɓ yeɓ ɓo moo cuuni.
Mo foo ɓǝ mai mee rõm tǝǝ za bai iŋ moo tǝǝra me.
52 Dǝɓlii, mo foo ɓǝ tǝǝ za syiŋ ɓo moo tǝǝra goŋ mai mo nǝǝ ɓo.
A tǝǝra ko cok daŋ.
53 Na yii Dǝɓlii ga lii ga lii! Amen! Amen!
© Bible Moundang © Alliance Biblique du Tchad, 1996.
