Joɓ a lǝŋ Masǝŋ ka tǝ kan lǝŋ ɓǝɓe' ya
1 Mor fẽe Masǝŋ cuu zah'nan ŋgoŋ kiita ya, muŋ zah'nan ah ɓo wo za yeɓ ah ra zoŋ ne?
2 Za a lal tǝɓra zahsyee 'wahe, mor ka bǝǝ 'wah ɓoo ga gŋ ma ɓǝǝra. A kiŋra gwii za ki rǝk ga pǝzyil ŋgaɓ ah ma ɓǝǝra. 3 A kiŋra korro jol wee syelle, a nyiŋra dǝǝ jol mawin wul zahwaa val ah mo ɓaŋ ɓo. 4 A cakra za syak ka mo lwaa joŋra ɓǝ ma ɓǝr ɓǝǝ mo 'yahra ka, a joŋra mabaidǝɓ ne swah ka mo ɗuura gal mokra. 5 Za syak ara tǝgbana korro cokki, a gara kǝsyicok ka ga kyeɓ farel ɓǝǝ gŋ, mor ara ka ne cok maki ah ka lwaa farel ɓǝǝ gŋ mor wee ɓǝǝr a. 6 A taira fagwahl pǝ 'wah mai mo 'wah ma syak ɓǝǝ ye ka, a ŋhǝǝra lee kpuu vin mai mo pǝ 'wah za maɓea ahe. 7 A swahra sǝŋ ne suŋ bai fan wo suu, fan ma jǝŋ tǝtǝl rii cel ka yea ya. 8 Bam tan tǝ waa gin tǝ ɓǝǝ a pǝ̃ǝ ra mbãakãm, so taira ki uu ge kah gbyak tǝsal mor ka bam mo lwaa ra ka.
9 Za faɓe' a joŋra wee syel ma zahwon ciŋ byakke, a woora wee pa syak kan wo ɓǝǝ zahwaa fan soo valle. 10 Amma pa syak a gak ur bai fan wo suu ka ga nyiŋ tǝ ɓǝǝra, a kyãhra ne koŋne, a cenra sor ne nooko. 11 A zuura nǝm ne tǝbaakãmme, a so ŋhǝǝra lee kpuu vin mor fazwanne, amma so ara ne suu ɓǝǝ ara ne koŋ bii. 12 Tǝgǝǝ yaŋ mo laa kyaŋ yee za mai mo kanra syim ɓo wo ɓǝǝ mo so tǝ fiira gbah jolle, amma Masǝŋ laa yee ɓǝǝr a.
13 Za ki no, ara ye za mai mo 'yahra cokfãi ya, ka laara mor ɓǝ ah ya, ka so syeera tǝ fahlii ah laŋ ya. 14 Pa in wul a ur ne cok zahmor'nan ɓaa ga in pa syak pǝ wulli, so ne suŋ ɓe, a lal woo fan ah ra. 15 Pa joŋ ɓǝǝ a kaa byak ka suŋ mo foo, a lal muŋ suu ah koo dǝɓ vaŋno ka kwan ko ya. 16 Ne suŋ ɓe, nyin a lal geara yaŋ, amma ne com ɓe, a mokra suu ɓǝǝra, mor a ɗuura gal cokfãi. 17 Ka 'yahra com ya, amma suŋ mo foo ɓe, gal ka ren ra yao.
Ɓǝ faa Sofar
18 Bii ga ɓaŋ dǝɓ faɓe' kal ne ko, Masǝŋ ga ɓoo zahyee tǝ 'wah ahe, koŋ ka ga joŋ yeɓ pǝ 'wah ka syak ah laŋ ka ga sye ko yao. 19 Tǝgbana cok cwak moo hǝǝ syaŋne, dǝɓ faɓe' laŋ a ga vǝr gin wo sǝr nai ta. 20 Dǝɓ vaŋno ka ga foo ɓǝ ah ya, koo ma ka syak ah laŋ, ka ga foo ɓǝ ah ya. Cwǝ̃ǝ ga re ko, a ga muŋ tǝɗe'. 21 Fan ah ga joŋ nai mor syẽa ŋwǝǝ wulli, zyii gbah jol masoo ra ya ta. 22 Masǝŋ ga muŋ dǝɓ faɓe' ne swah ahe. Masǝŋ mo joŋ fan vaŋno ɓe, dǝɓ faɓe' ga wuu. 23 Masǝŋ gak soɓ ko kaa jam, amma zah'nan daŋ a pii fan joŋ ahe. 24 Mor dǝɓ faɓe' a gak yea ne ɓǝ 'nyah zah'nan nje, amma so a jin fãi tǝgbana fãa, tǝgbana keesyer mai za mo ce myah ge ɓo sǝŋ. 25 Dǝɓ ma gak in ɓǝ ah ka faa ka noo ya a no ne? Dǝɓ ma syel ɓǝ ah ŋ ɓǝ faa ɓe goŋga ye ka a no ne?
© Bible Moundang © Alliance Biblique du Tchad, 1996.
