Juupel ma mor fii gbah jolle
1 Lǝŋ David.
Dǝɓlii, mo cak za mai mo tǝ cakra me.
Mo ruu sal ne za mai mo tǝ ruura sal ne me.
2 Mo ɓaŋ bal ɓo ne fan sal ɓo ra mo ge gbah jol ɓe.
3 Mo ɓaŋ zǝǝ ɓo tǝkine kǝkahle ɓo ge sǝŋ tǝtǝl za mai mo tǝ foora mor ɓe.
Mo cuu nyi me amo ye pa ǝ̃ǝ ɓe.
4 Ka swãa mo re za mai mo tǝ kyeɓra ka in me pǝ wulli,
Tǝtǝl mo kiŋ ra,
Ka za mai mo foora ɓǝɓe' ɓo ka joŋ wo ɓe mo jinra ne swãare.
5 Ka mo yeara tǝgbana kun mai zyak moo ɓaŋ kal ne ko,
Ka Angelos Dǝblii mo nĩi ra.
6 Ka fahlii mai moo syeera gŋ mo yea pel ɓǝǝ pǝfuu, mo yea pǝrwãhe,
Ka Angelos Dǝblii mo waa ra ɓaa ge sǝŋ.
7 Saara mǝmmǝǝ pel ɓe ka gban me ne bai morrĩ,
Ciira lak maɗǝk pel ɓe ka me lee ge gŋ.
8 Ɓeɓ ga hǝǝ lwaa ra kǝpel ka ɓah tanra ɓǝ ah ya,
Mǝmmǝǝ mai mo saara ɓo ne suu ɓǝǝ a ga jin gbah ra,
A ga leara ga pǝ lak mai mo ciira ɓo.
9 Amma ma ɓe me ga 'nyah suu ne ɓǝ Dǝɓlii,
Me ga laa pǝ'nyah mor Dǝɓlii ǝ̃ǝ me ɓe.
10 Me ga faa nyi Dǝɓlii ne zahzyil ɓe daŋ:
Dǝɓ ma na mo kǝka,
Amo byak za matǝtǝ̃ǝ ah wo za maswahe,
Amo byak mabaidǝɓ wo pa ma cuu syak nyi ko.
11 Za maɓea ah a urra ne me,
A cenra me tǝ ɓǝɓe' mai me tǝ ɓǝ ah ya.
12 A soora ɓǝ sãh mai me joŋ ne ɓǝɓe',
A ɓeɓra zahzyil nyi me ne ko.
13 Amma ne cok ara mo ne syemme, me swaa ɓǝ,
Me cak suu ɓe me ka ren farel a,
Me juupel ɗǝŋ tǝtǝl ga sǝŋ ne ko,
14 Tǝgbana mee juupel mor bai ɓe ne naa pa ɓe.
Me ɗǝŋ tǝtǝl ga sǝŋ ne swaa ɓǝ tǝgbana dǝɓ mai moo gban yel wul mamme.
15 Amma ne cok mai me pǝ bone, za mai me tǝ ra ya laara pǝ'nyahre,
Taira ge kah ɓe mor ka syak me,
So loɓra me ne bǝrǝǝ.
16 Cuura bone nyi me,
Syakra me,
Rĩira me ne nahnǝnni .
17 Dǝɓlii, mo ga ẽe ɓǝ ah ga liilii nai ne?
Mo wǝǝ me jol ɓǝɓe' ɓǝǝ mo tǝ joŋra wo ɓe,
Mo ǝ̃ǝ me gin zah ɓol raiko.
18 Nai ɓe, me ga joŋ osoko nyi mo pǝ cok tai za pãare,
Me ga yii mo kǝsyil za pãare.
19 Mo soɓ za syiŋ ɓe mai moo gwahra ber mo yiira suu ɓǝǝ ne ɓǝ tǝtǝ̃ǝ ɓe ka.
Mo soɓ za mai mo syiŋra me ɓo bai mor mo laara pǝ'nyah ne ɓǝ bone ɓe ka.
20 Ka faara ɓǝ tǝgbana bai moo faara wo ki ya,
Sai a foora ɓǝ kol maber ah tǝ za mai moo 'yahra kaa jam.
21 A cenra me a faara: Ru kwo fan mai mo joŋ ɓe.
22 Amma Dǝɓlii, amo tǝ ɓǝ ah ɓe.
Dǝɓlii, mo kaa ɓoɓo ka,
Mo yea pǝɗǝk ne me ka.
23 Dǝɓlii, mo kpiŋ, mo ǝ̃ǝ me.
Masǝŋ, mo ur mo cam tǝ ɓe.
24 Dǝɓlii, mo ye Dǝɓ matǝ njaŋ,
Mo faa ɓǝ sãh tǝtǝl ɓe.
Masǝŋ ɓe, mo soɓ za syiŋ ɓe yiira suu tǝ ɓe ka.
25 Mo soɓ ra faa pǝ zahzyil ɓǝǝ: Ahãa, ɓǝ ah a tǝgbana mai na 'yahe ka.
Mo soɓ ra faa: Na kaa swah tǝl ah ɓe ka.
26 Amma mo soɓ za mai mo tǝ yiira suu ne ɓǝ bone ɓe mo tǝ lǝŋra ra kal me ɓe,
Mo cuura swãa tǝtǝl mo kiŋ ra jin ra pǝryak.
27 Ka za mai moo laara pǝ'nyah ne ɓǝ mai mo wǝǝ me ɓo mo ɗǝǝra lǝŋ cẽecẽe mo faara:
Dǝɓlii pǝyǝkki, a laa pǝ'nyah ne ɓǝ sãh mai mo joŋ ɓo wo dǝɓ yeɓ ahe.
28 Mo nai ɓe, me ga cuu njaŋ ɓo nyi zana,
Me ga yii mo zah'nan daŋ.
© Bible Moundang © Alliance Biblique du Tchad, 1996.
