Sǝr Egiɓ a tǝgbana kpuu bahre
1 Ne zah'nan vaŋno pǝzyil fĩi patǝ sai, ne syii jemma tǝtǝl vaŋno ah ru pǝ byak zah sǝr zana, Dǝɓlii faa nyi me: 2 We dǝfuu, mo faa nyi goŋ sǝr Egiɓ ne za sǝr ah daŋ sye: Amo pǝswahe, me ga lii ɗah mo ne zune? 3 Amo tǝgbana kpuu bah ma Liban mai mo ɓer jol ɓo, cee ah mo pǝsãhe, wah ah ge dai masyiibamme. 4 Bii ye joŋ giŋ ɓo, mor sǝr ah sǝŋ bii gŋ, bii ah ye joŋ ka kpuu ah mo giŋ. A sahra bii nyi cok mai kpuu ah mo gŋ, so bii ah a ɗuu ga mor kpuu mai daŋ mo pǝ gǝ̃ǝre. 5 Kpuu ah giŋ mor a lwaa bii pǝsãhe, kpuu ah giŋ kal kpuu manyeeki ah daŋ, jol ah pǝlli, so a pǝwah ta. 6 Zahban juu camcam a gin syiira kol ɓǝǝ tǝ jol ah ra, fan cok daŋ a gin bemra wee ɓǝǝ mor ahe, za sǝr daŋ a kaara mor cee kpuu ahe. 7 Kpuu ah pǝsãh no cam, a pǝ'manne, jol ah ra pǝwah ta, mor sǝ̃ǝ ah ra dan ge ɓo mor sǝr ge dai bii ɓo. 8 Koo kpuu bah ma Eden pǝ 'wah Masǝŋ laŋ dai ko ya, kpuu cil laŋ jol ah ra dai mǝ ah ya, kpuu mai goo ah mo na mǝ ah kǝka. Kpuu mai mo pǝ 'wah Masǝŋ mo pǝsãh zahki ne ki kǝka. 9 Me zyeɓ kpuu ah ɓo ne jol ah ra pǝsãh no cam, kpuu mai mo Eden pǝ 'wah Masǝŋ daŋ joŋra tǝwon tǝ ɓǝ ahe.
10 Zǝzǝ̃ǝko ame Dǝɓlii Masǝŋ me ga faa ɓǝ fan mai moo ga joŋ wo kpuu mai mo giŋ ge dai masyiibam ɓo. Ne cok mo giŋ pǝwah ge dai masyiibamme, so kal ne yii suu ahe. 11 Mor ah ame soɓ kpuu ah ɓoo, me ga soɓ ko ga mor jol goŋ maswah ah ma sǝr ki, a ga joŋ wo kpuu ah tǝgbana ɓǝɓe' mai mo joŋko ɓo. 12 Za ma bai kwan syak ah ma sǝr ki a ga cera kpuu ah ɓoo ga sǝŋ, a soɓra ko gŋ nooko, jol ah ra a lea ga tǝwaa camcam, ne pǝ cok ma tǝforoŋ ah ra mo pǝ sǝr ahe. Za sǝr mai mo kaara ɓo mor cee ah daŋ a ga kalra. 13 Zahban juu camcam ga gera, a ga cwǝǝra tǝ kpuu ah mo lee ɓo sǝŋ, nǝǝ cok a ga syeera tǝ jol ah ra mo myah ɓo sǝŋ. 14 Tǝŋ daga zǝzǝ̃ǝ ka ga pel ne ko, kpuu mai moo ga lwaa bii ka giŋ ne ko ŋhaa ka wah ah mo ge dai masyiibam ka so yii suu ah tǝ ɓǝ ah ka ga yea yao. Kpuu daŋ sai a ga wukra tǝgbana dǝfuu, a ga lwaara za mai mo pǝ cok mai za wul mo gŋ.
15 Ame Dǝɓlii Masǝŋ me faa: Ne zah'nan mai kpuu ah moo ga pǝ cok mai za wul mo gŋ, me ga joŋ paŋbii ma mor sǝr jǝŋ ga tǝl ah a yeyee wul tǝ kpuu ahe. Me ga cak el camcam ka bii ah ra mo ɗuu ka. Me ga pee cokfuu ga tǝ waa Liban ra, mor kpuu ah wǝ ɓe, me ga yak kpuu ma kǝsyicok daŋ. 16 Ne cok me pee kpuu ah ka ga pǝ cok mai za wul mo gŋ ɓe, cii lee ah mo leere, a ga joŋ za sǝr daŋ coo ne gal coo. Kpuu mai daŋ mo pǝ 'wah Eden ne kpuu masãh lii ah ra, ne kpuu mai daŋ mo wolra ɓo ne bii pǝ sǝr Liban mai mo gera ɓo pǝ cok mai za wul mo gŋ daŋ, a ga laara pǝ'nyah ne ɓǝ lee ahe. 17 Kpuu ah ra laŋ a gara pǝ cok mai za wul mo gŋ ne ki, ka ga lwaa za mai mo ikra ra pǝ wul zah sal mo gŋ. Za mai mo kaara mor cee kpuu ah daŋ a ga myahra ga kǝsyil za sǝr camcam.
18 Kpuu ah ako ye goŋ sǝr Egiɓ ne zan ahe. Koo kpuu ma pǝ 'wah Eden laŋ, giŋ pǝwah ne pǝsãh na ko ya. Amma zǝzǝ̃ǝko, kpuu ah a ga pǝ cok mai za wul mo gŋ tǝgbana kpuu ma pǝ 'wah Eden daŋ, a ga lwaa za ma bai daakan mai mo ikra ra pǝ wul zah salle. Ame Dǝɓlii me faa naiko.
© Bible Moundang © Alliance Biblique du Tchad, 1996.
