Za Israel kaara kacella tǝ goŋ Og
(KeeZ 21:31-35)1 Fahfal ah na ur syee kal ge nǝfah kǝsǝŋ pǝ sǝr Basan, goŋ Og pǝ̃ǝ ne zan ah daŋ mor ka ruu sal ne na kah yaŋ Edrai. 2 Amma Dǝɓlii faa nyi me: We ɗuu gal ah ka, me ga soɓ ko ne zan ah ne sǝr ah daŋ ga jol ɓiiri. Ka we joŋ ki ne ki tǝgbana mai we joŋ ne Sihon Amoriyo, mai mo kaa goŋ Hesbon ta.
3 So Dǝɓlii soɓ goŋ Og ne zan ah ge mor jol mana. Na ik ra ge lal vǝr tǝɗe', koo dǝɓ vaŋno laŋ coŋ ya. 4 Ne cok moo ta, na re yaŋ ah maluu ra daŋ. Yaŋ mai mo coŋ na re ya kǝka. Na re yaŋ maluu jemma yea mo pǝ sǝr Argoɓ mai Og goŋ Basan mo lwaa ɓo. 5 Yaŋ rai daŋ vuura ɓaale ryaŋ ɓo ne ko, ne zahfah ah ra ɓaa ɓo ne vãmme, kpuu yil ah ra laŋ vãm maswah ye daŋ. So yaŋ manyee mai mo ka ne ɓaale ya a gŋ pǝlli ta, dǝɓ ka gak kee pãa ah ya. 6 Ana ɓeɓ yaŋ maluu ra daŋ, na ik za wǝǝ ne ŋwǝǝ tǝkine wee nyee daŋ ge lalle, tǝgbana mai na joŋ ne yaŋ mǝ Sihon goŋ Hesbon ta. 7 Na nĩi faɓal yaŋ ɓǝǝra, so na woo fan mai mo no gŋ daŋ belbelle.
8 Ne cok ah na re sǝr za goŋ Amorien mai mo kah el Yordan nǝfah morcomzah'nan camcam gwa, tǝŋ daga kah el Arnon ŋhaa ge dai waa Hermon. 9 (Sidonien a ɗiira waa Hermon ne Sirion, Amorien a ɗiira ɓǝǝ ne Senir.) 10 Ana re sǝr Og goŋ Basan daŋ belbelle, na re yaŋ maluu ma pǝ cok tǝbǝǝ ah pǝ sǝr Giliat ne sǝr Basan, ŋhaa ge dai yaŋ Salka ne Edrai fah morcomzah'nanne.
11 (Og goŋ Basan ye goŋ mai mo coŋ ɓo sǝŋ ne nǝn kǝsyil ban Refaim to. Ɗee swul ah ɗee vãm yo, a no yaŋ Ammonien ma ɗii ne Rabba. Wah ɗee ah i jol ɓo doraŋ, 'ah ah laŋ i jol ɓo nai.)
Ban mai mo kaara kah el Yordan fah morcomzah'nanne
(KeeZ 32:1-42)12 Ne cok na re sǝr ahe, me nyi yaŋ Aroyer ma kah el Arnon, ne raita sǝr ma tǝwaa Giliat ne yaŋ maluu mai mo gŋ daŋ nyi ban Ruben, ne ban Gad. 13 So raita Giliat ma kǝki ah ne Basan, sǝr ma ɗii ne Argoɓ mai Og goŋ Basan mo lwaa ɓo daŋ me nyi nyi raita ban Manasse.
Daga ɓaaɓe yea tǝ ɗiira sǝr Basan ne sǝr Refaimien. 14 Jair dǝɓ ban Manasse re sǝr Argoɓ daŋ, tǝgba faa sǝr Basan, ŋhaa ge dai zahsyee sǝr Gesur, ne Maaka. Ɗii yaŋ mai mo no gŋ daŋ ne ɗii suu ahe. A ɗiira yaŋ ah ra ne yaŋ Jair ŋhaa tǝ'nahko.
15 Me nyi Giliat nyi morsǝ̃ǝ Makir, ban Manasse. 16 So me nyi sǝr mai mo ur gin Giliat ŋhaa ge dai kah el Arnon nyi ban Ruben ne ban Gad, zahsyee ɓǝǝ ma fah morcomzah'nan a kǝsyil el ah jaŋjaŋ. Zahsyee ma fahsǝŋ ne Ammonien laŋ a ne el Jabok. 17 Zahsyee sǝr ɓǝǝ ma fah kǝmorcomlil laŋ a ne el Yordan, tǝŋ gin zah mabii Galile nǝfah kǝsǝŋ, ŋhaa ge dai zah mabii Wul nǝfah morkǝsǝŋ, so ŋhaa ge kan kah waa Pisga nǝfah kǝmorcomzah'nan taa.
18 Ne cok ah me faa nyi ra: Dǝɓlii Masǝŋ man nyi sǝr ma kah el Yordan nǝfah morcomzah'nan mai nyi we ka we re. Zǝzǝ̃ǝko, we faa nyi za ɓii ma nen gak ruu sal mo zyeɓra suu, ka mo kalra pel ban Israel manyeeki ah ka mo yeera el Yordan, ka ga gbah jol ɓǝǝ ka nyiŋ sǝr ma ɓǝǝ tǝkǝ̃ǝ ɓǝǝra. 19 Sai ŋwǝǝ ɓii ne wee ɓii ra ye mo yeara nyee to. Me tǝ ɓe, awe ne faɓal pǝlli, ko mo ɗah yeara fahfal ɓii pǝ yaŋ mai me nyi ɓo nyi we ko. 20 We ge gbah jol wee pa ɓii za Israel, sai ka nyiŋra sǝr ma kah el Yordan nǝfah morcomlil Dǝɓlii mo tǝ ga nyi nyi ra ɓe. Dǝɓlii ga soɓ ra kaa gŋ jam, tǝgbana mai mo joŋko ɓo wo ɓii ta. Fahfal ah ɓe, ka we pii soo ga pǝ sǝr ma ɓii mai me nyi ɓo nyi we ba.
21 So me faa nyi Joswa: Amo kwo fan mai daŋ Dǝɓlii Masǝŋ man mo joŋ wo za goŋ matǝ gwa ɓe, goŋ Sihon ne goŋ Og. A ga joŋ nai ne za goŋ manyeeki ah ra daŋ pǝ sǝr mai wee ga dan gŋ. 22 We ɗuu gal ɓǝǝ ka, mor Dǝɓlii Masǝŋ ɓii a ga ruu sal mor ɓiiri.
Mosus lwaa fahlii ka ga sǝr Kanaan a
23 Ne cok ah me juupel faa: 24 Masǝŋ Dǝɓlii, me tǝ ɓe, amo cuu tǝtǝŋ mor yeɓ malii ne yeɓ matǝ gǝriŋ ah mai mo tǝ ga joŋ pel ɓo nyi me to, masǝŋ maki ah coksǝŋ ne wo sǝr daŋ moo gak joŋ yeɓ malii na mai mo joŋ ɓo kǝka. 25 Dǝɓlii, oseni, mo soɓ me yee el Yordan, ka me ge ẽe sǝr masãh lii nǝzakǝŋhaa, ne waa masãh ah ra, tǝkine waa Liban daŋ ɗao.
26 Amma Dǝɓlii ɓaŋ kpãh ne me mor ɓǝ ɓiiri, zyii ka laa juupel ɓe ya. 27 So faa nyi me: Kii ɓe, mo fǝ̃ǝ gbǝr ɓǝ ah ge zah kao. Mo yee ge tǝlǝǝ waa Pisga, ka mo ẽe cok ge nǝ fahsǝŋ ne morkǝsǝŋ nǝfah morcomzah'nan tǝkine morcomlil daŋ. Mo ẽe pǝsãhe, mor mo ka tǝ ga yee el Yordan a. 28 Mo faa ɓǝ mai mo wo ɓo daŋ nyi Joswa. Mo swaa zahzyil nyi, mo swaa ko ne ɓǝ pǝsãhe. Mor ako ye ga kal pel za ka yee el ga ren sǝr mai mo kwo ge ɓo.
29 Mor ah na nǝn ɓo pǝ cok tǝforoŋ, pǝ cok mai mo ɓyaŋ ki ɓo ne Bet-Peor.
© Bible Moundang © Alliance Biblique du Tchad, 1996.
