Juupel coksǝŋ
1 Me kwo fan maki ah faɗa, me ẽe zahfah gbǝr ɓo coksǝŋ. Kyaŋ mai me laa mo cii tǝgbana kokõorĩi mo faa ɓǝ nyi me kǝpel kŋ faa nyi me: Mo yee ge nyeeno, me ga cuu fan mai mo tǝ ga joŋ fahfal mai nyi mo. 2 Ne pel sǝ Tǝ'yak ɓaŋ me kal ge coksǝŋ pǝ cok mai fakal mo no kan ɓo gŋ. 3 Tǝ fakal ah Dǝɓ ki kaa ɓo gŋ, zahpel ah a sãh tǝgbana tǝsal masyem ah ma ɗii ne jaspis ne ma ɗii ne sardes. Tǝcee ryaŋ fakal ah ɓo, a sãh tǝgbana tǝsal ma ɗii ne emeral. 4 Kah fakal ah tǝkal so lǝǝ ɓo gŋ jemma gwa tǝ nai, zaluu jemma gwa tǝ nai haira ɓo tǝ fakal ah ra, ɓaara mbǝro ɓo pǝfãi, maara njok vãm kaŋnyeeri ɓo. 5 Sãh bamme, haŋ bamme, tǝkine ɓyaŋ ah daŋ a pǝ̃ǝ gin mor fakal ahe. Paŋwii rǝŋ tǝ syen pel fakalle, ara ye tǝ'yak Masǝŋ matǝ rǝŋ kŋ. 6 Pel fakal ahe, fan sãh gŋ tǝgbana mabii ma na fakwancee, a sãh tǝgbana kristal.
Ne pel sǝ, kahlaa fakal ah daŋ me kwo fan ma ne cee matǝ nai gŋ, ara ne nahnǝn kǝpel ne kǝfal daŋ. 7 Fan ma ne cee patǝ vaŋno ah jur ɓol ɓo, patǝ gwa ah jur we woi dǝǝ ɓo, patǝ sai ah zahpel ah jur mǝ dǝfuu ɓo, patǝ nai ah a tǝgbana dǝɗuŋ mai moo zoo sǝŋ. 8 Fan ma ne cee matǝ nai daŋ ara ne yee yea yea, ara ne nahnǝn kǝɓǝr ne kǝlal daŋ. A ɗǝǝra lǝŋ ne com ne suŋ daŋ a faara:
Daŋdaŋ, daŋdaŋ, daŋdaŋ, ako ye Dǝɓlii
Masǝŋ ma ne swah daŋ,
Mai mo no daga ɓaaɓe, mai mo no zǝzǝ̃ǝko,
Ne mai mo tǝ ginni.
9 Ne cok fan ma ne cee matǝ nai mo tǝ ɗǝǝra lǝŋ cor Dǝɓ mai mo kaa ɓo tǝ fakal ne ko, moo yea ne cee ga lii, a yiira ko tǝkine joŋ osoko nyi, 10 so zaluu jemma gwa tǝ nai laŋ a keara ga sǝŋ pel Dǝɓ mai mo kaa ɓo tǝ fakal moo yea ga lii, a rǝkra njok ɓǝǝ pel fakalle, a faara:
11 Dǝɓlii ɓuu ne Masǝŋ ɓuuru,
Mo kii ɓo nǝn pǝkoŋ yiini,
Ne nǝn sãa tǝkine yii swah ɓo,
Mor fan daŋ joŋ ɓo ne 'yah ɓo,
Mor ah fan ah ra no ne cee.
© Bible Moundang © Alliance Biblique du Tchad, 1996.
