Zapee Kristu
1 Sai we kwo ru tǝgbana za yeɓ Kristu, tǝgbana za mai Masǝŋ mo soɓ ɓǝ goŋga ah mai mo muŋ ɓo syeɓ jol ɓǝǝra. 2 Fan mai moo fiira wo dǝɓ mai mo soɓra ɓǝ yeɓ ɓo jol ahe: a 'yah mo yeako dǝɓ tǝ goŋga. 3 Amma wo ɓe, koo we ŋgoŋ kiita tǝ ɓe, wala dǝɓ ki ye mo ŋgoŋ daŋ, a tǝkolle, me ka gak ŋgoŋ kiita tǝ suu ɓe laŋ ya ta. 4 Fatan zahzyil ɓe ce me ya, amma mai cuu ɓo ka ŋ me bai faɓe' sǝ o ya. Dǝɓlii ye pa ma ŋgoŋ kiita tǝ ɓe. 5 Mor maiko, we ŋgoŋ kiita tǝ dǝɓ kǝpel zah'nan ah mo kan ɓo no ka, we byak Dǝɓlii mo ge ɗao, ako ye ga pǝ̃ǝ gin pǝ cokfãi ne fan mai mo muŋ ɓo pǝ cokfuu. A ga joo ɓǝ foo mai mo mok ɓo pǝ zahzyil dǝfuu gin lalle. So Masǝŋ ga yii zune daŋ tǝgbana yeɓ ah mo joŋko.
6 Wee pa ɓe, ɓǝ mai me tǝ faa daŋ me rǝk ge tǝ Apollus ne me mor ka cuu fan nyi we ne ko. Me 'yah ka we fee yella ah gin tǝ ɓuuru, ka we zǝǝ tǝ ɓǝ mai mo ŋwǝǝ ɓo ka, koo dǝɓ vaŋno kǝsyil ɓii mo yiiko dǝɓ ki ka so syẽa dǝɓ maki ah ka. 7 Azu ye joŋ mo kal za ki ne? Fan mai mo ne daŋ Masǝŋ ye ka nyi ɓo mo ya ne? Ko mo nai ɓe, mor fẽe mo so yii suu ne fan ah tǝgbana nyira nyi mo nyi ya ne?
8 Zǝzǝ̃ǝ awe ne fan mai we 'yah daŋ o, awe kǝ̃ǝ ɓe, we kaa goŋ ɓo bai ɓuu o! Ko me 'yah we kaa goŋ sye no, ka aru laŋ ru kaa goŋ ah ne we! 9 Mor me kwo tǝgbana Masǝŋ kan ru zapee ɓo pǝ cok ma fahfal tǝ lii ahe. Aru tǝgbana za mai mo ŋgoŋra kiita wul ɓo tǝ ɓǝǝ ka ik ra ga lal pǝ wul pel za pãare. Aru no na fan mai ka dunia daŋ mo ẽe na fan kol ne angeloi tǝkine dǝfuu daŋ. 10 Aru ye tǝgwĩi mor Kristu, amma awe ye za fatan pǝzyil Kristu. Aru pǝtǝtǝ̃ǝre, amma awe pǝswahe. Aru na fan masyẽa ahe, amma awe pǝyǝkki. 11 Ŋhaa ge dai cok matǝ zǝzǝ̃ǝko, ru tǝ laa bone ne koŋne tǝkine koŋ bii, aru ne suu kolle, a loɓra ru, ru ka ne yaŋ ya. 12 Ru gaɓ ne joŋ yeɓ ne jol ɓuu mor ka wol suu ɓuuru. Ne cok mo tǝ tǝǝra ru laŋ, ru faa ɓǝ sãh tǝ ɓǝǝra, mo tǝ foora mor ɓuu laŋ, ru rõmme. 13 Koo mo tǝ faara ɓǝɓe' wo ɓuu laŋ, ru zyii zah ɓǝǝ ne kyaŋ 'nyahre. Zǝzǝ̃ǝ laŋ a kwanra ru tǝgbana zãa mai za moo gbǝǝ ga lalle, tǝgbana hal mai za moo rǝk zãa gŋ.
14 Me ŋwǝǝ ɓǝ mai wo ɓii nai mor ka cuu swãa ɓii ne ya, amma me joŋ nai mor ka cuu fan nyi we ne ko tǝgbana wee 'yah ɓe. 15 Mor koo we lwaa za ma cuura Kristu nyi we ne zah'nan cee ɓii ara mo ujenere jemma laŋ, awe ne dǝǝ vaŋno to, mor ne ɓǝ fahlii cee ɓii ma pǝzyil Kristu ɓe, ame ye pa ɓiiri, me ye ɓaŋ Ɓǝ'nyah ge nyi we ne ko. 16 Mor ahe, me pǝǝ we, we joŋ na me. 17 Me pee Timoteus wo ɓii mor ɓǝ ahe, ako ye we 'yah ɓe. Ako ye dǝɓ tǝ goŋga tǝ fahlii Dǝɓlii, a ga joŋ we foo ɓǝ syel ɓe me tǝ syee mor Yesu Kristu, tǝgbana mai me cuu ɓǝ ah ɓo pǝ eklesia cok camcam daŋ.
18 Za ki kǝsyil ɓii a yiira suu ɓǝǝ a lǝŋra tǝgbana me ka ge wo ɓii ka ẽe we yao. 19 Amma Dǝɓlii mo 'yah ɓe, me ga wo ɓii gwari, so ka me ẽe fan mai za ma yiira suu ɓǝǝ moo gak joŋra, mor ma faa ne zah to kii ya. 20 Mor Goŋ Masǝŋ sye, ɓǝ faa pǝ zah faa ye ka to ya, amma swah yo. 21 We 'yah fẽene? Me ge wo ɓii ne kǝndaŋ ne? Wala me ge ne zahzyil ma ne 'yah tǝkine wonsuu ne?
© Bible Moundang © Alliance Biblique du Tchad, 1996.
