1 So Yusafat wuu, ciira ko pǝ cok cii wul za goŋ pǝ yaŋ David, wel ah Yuram kaa goŋ pǝ cok ahe.
Yuram goŋ sǝr Yuda
2 Yuram we Yusafat ne wee pam mawǝǝ yea: Azaria, Jehiel, Zakarias, Azariahu, Mikal, ne Sefatia, marai daŋ wee Yusafat goŋ sǝr Yuda yo. 3 Pa ɓǝǝ nyi vãm kaŋnyeeri ne vãm solai tǝkine fan masãh ah camcam nyi ra pǝlli, so woo ra daŋ rǝk pǝ yaŋ maluu ma ne ɓaale ah camcam pǝ sǝr Yuda daŋ. Amma Yuram ye we malii, mor ah Yusafat ɓaŋ ko ka mo kaako goŋ pǝ cok ah fahfal ahe. 4 Ne cok Yuram mo jwǝǝ sǝ̃ǝ ge sǝŋ tǝ goŋ ahe, ik wee pah ah rai daŋ ge lalle, so ik zaluu Israel manyeeki ah ge lal ta.
5 Ne cok Yuram mo kaa goŋ, ka joŋ syii ɓo jemma sai tǝtǝl gwa, kaa goŋ yaŋ Jerusalem syii nama. 6 Ɓaŋ tǝɓal ɓǝɓe' goŋ Akaɓ ne mǝ za goŋ Israel manyeeki ahe, mor ɓaŋ mǝlaŋ Akaɓ kan ɓo. Joŋ fan maɓe' ah wo Dǝɓlii. 7 Amma ne daŋ laŋ, Dǝɓlii 'yah ka vǝr morsǝ̃ǝ goŋ David ya, mor gbǝ zah ɓo ne David faa, morsǝ̃ǝ ah ga kaa goŋ ga lii ga lii.
8 Pǝ zah'nan Yuram mo kaa goŋ ɓo, za sǝr Edom ŋwoora kyaŋ ne sǝr Yuda, so ciŋra za ma lwaa tǝtǝl suu ɓǝǝ ne swahe. 9 Yuram ur ne zaluu sal ne muŋta sal ah daŋ ne suŋ ge ka ruu sal ne za sǝr Edom, so za sal Edomien ge ryaŋra ra, amma ne suŋ ah za Yuram lal pǝ̃ǝra ɗuu kalle. 10 Sǝr Edom lwaa tǝtǝl suu ah ɓo jol sǝr Yuda ŋhaa tǝ'nahko. Za yaŋ Libna laŋ ŋwoora kyaŋ ne cok moo ta, fan ah joŋ nai mor Yuram soɓ Dǝɓlii Masǝŋ pamlii ra ɓoo ɓo. 11 Yuram vuu cok juupel za gwǝǝ pǝ cok ma tǝgee sǝŋ ah ra pǝ sǝr Yuda daŋ. Kǝǝ za sǝr Yuda ne za yaŋ Jerusalem daŋ joŋra faɓe' wo Dǝɓlii.
12 Profeto Elias ŋwǝǝ leetǝr wo Yuram faa: Dǝɓlii Masǝŋ pa ɓo lii David ŋgoŋ kiita tǝ ɓo, mor mo ɓaŋ tǝɓal fan joŋ pa ɓo Yusafat wala Asa goŋ sǝr Yuda ya. 13 Amma amo ɓaŋ fan joŋ za goŋ Israel ɓo, mo kǝǝ za sǝr Yuda ne za yaŋ Jerusalem joŋra faɓe' wo Masǝŋ tǝgbana Akaɓ ne morsǝ̃ǝ ah mo kǝǝra za Israel joŋ fan maɓea ahe. So mo ik wee pa ɓo mai ara ye mo za masãh ah kal mo ge lalle. 14 Mor ah Dǝɓlii ga ŋgoŋ kiita tǝ za sǝr ɓo, ne wee ɓo, ne ŋwǝǝ ɓo, a ga ɓeɓ fan ɓo mo ne daŋ belbelle. 15 Amo ne suu ɓo mo ga laa bone ne syem maɓe' ahe, ɓǝr ga juu mo ne syim ŋhaa syem ah a ga pel zah'nan Masǝŋ daŋ.
16 So Dǝɓlii ge ur zahzyil Filistien ne za Araɓ mai mo kaara ɓo kah sǝr Etiopia gwari, ka mo ruura sal ne Yuram. 17 Ge ɗaŋra sǝr Yuda, woora fan yaŋ goŋe, gbahra ŋwǝǝ ah ne wee ah daŋ kal ne ko, sai soɓra wel ah malaŋ ma ɗii ne Akazia to.
18 So fahfal fan mai daŋ Dǝɓlii pee syem maɓe' ah ge lwaa goŋ ɓǝr masǝ̃ǝnyiŋ. 19 Syem ah gaɓ ko syii gwa, fahfal ah goŋ so wǝ ne bone ahe, zan ah tǝǝra ɓǝrdi ge wol ah ka yii ko ne tǝgbana mo joŋra wo pamlii ra ya.
20 Ne cok Yuram mo kaa goŋ, ka joŋ syii ɓo jemma sai tǝtǝl gwa, kaa goŋ yaŋ Jerusalem syii nama. Ne cok mo wuu, dǝɓ ma 'mee tǝ ɓǝ wul ah kǝka, ciira ko pǝ yaŋ David, amma ciira ko pǝ cok cii wul za goŋ ya.
© Bible Moundang © Alliance Biblique du Tchad, 1996.
