2 KEE ƁƏ 7 - Bible Moundang (MUA)

Joŋra fĩi gbǝr zah yaŋ Masǝŋ

1 Ne cok goŋ Salomo mo vǝr juupelle, wii ɗǝr gin sǝŋ ge sye syiŋ mai mo tǝ joŋra, yǝk Dǝɓlii baa ɓǝr yaŋ Masǝŋ kǝrkǝrri. 2 Mor ah za joŋzahsyiŋ gakra ka dan ga gŋ yao. 3 Za Israel mo kwora wii ɗǝr gin sǝŋ ge, cokfãi mo baa ɓǝr yaŋ Masǝŋ kǝrkǝrri, keara ge sǝŋ ɗǝmra zahpel ge tǝ cok ma zyeɓ ne tǝsalle, juura pel wo Masǝŋ, joŋra osoko nyi mor ɓǝ sãh ah moo joŋko, tǝkine 'yah ahe. 4 So goŋ Salomo ne za daŋ joŋra syiŋ wo Dǝɓlii. 5 Ŋgomra ŋgǝǝri 22.000, ne kǝbǝr 120.000, joŋra syiŋ ma nyi jam ne ko. So goŋ ne za pãa daŋ joŋra fĩi gbǝr zah yaŋ Masǝŋ. 6 Za joŋzahsyiŋ urra uu pǝ cok yeɓ ɓǝǝra, Lewitien laŋ uura cam, yiira Dǝɓlii ne fakyẽm camcam mai goŋ David mo zyeɓ mor ka yii Dǝɓlii ne ko. Ɗǝǝra lǝŋ faa: 'Yah ah ga lii ga lii, tǝgbana mai mo yea tǝ joŋra ne cok goŋ David mo yea sǝŋ. Za joŋzahsyiŋ ulra kokõorĩi, za pãa daŋ urra uu sǝŋ.

7 Salomo nǝǝ cok kǝsyil pedǝǝ yaŋ ah ka gin nǝfah kǝ zahpel yaŋ mor Masǝŋ. So tǝǝ syiŋ suŋwii gŋ, ne sor mai mo nyira mor Dǝɓlii tǝkine nǝm faɓal daŋ joŋ syiŋ ma nyi jam ne wo Dǝɓlii. Salomo joŋ nai mor cok joŋ syiŋ ma ne vãm syẽ mai mo cooko kŋ a pǝlaŋne, ka gak joŋ syiŋ marai gŋ daŋ ya.

8 Salomo ne za Israel mo ne ki daŋ, joŋra fĩi jul zah'nan rǝŋ, za taira ge gŋ pǝlli, tǝŋ daga pǝ cok yee bii Hamat nǝ fahsǝŋ, ŋhaa dai zahsyee sǝr Egiɓ nǝfah morkǝsǝŋ ahe. 9 Ira zah joŋ fĩi ne zah'nan nama ahe. Joŋra fĩi ma pel cok joŋ syiŋ zah'nan rǝŋ, so joŋra fĩi maki ah zah'nan rǝŋ faɗa. 10 Ne zah'nan jemma gwa pǝzyil fĩi patǝ rǝŋ ahe, Salomo nyi fahlii nyi za kalra ge yaŋ ɓǝǝra. Laara pǝ'nyah pǝlli, so zahzyil ɓǝǝ laa pǝ'nyah mor ɓǝ sãh mai Dǝɓlii mo joŋ wo zan ah Israel, ne wo David ne Salomo.

Masǝŋ cuu suu ah nyi Salomo faɗa

(1 ZaG 9:1-9)

11 Ne cok goŋ Salomo mo vuu yaŋ Masǝŋ ne yaŋ goŋ daŋ vǝrri, tǝkine joŋ fan mai zahzyil ah mo foo ɓo ka joŋ gŋ daŋ, 12 Dǝɓlii so cuu suu ah nyi Salomo ne suŋ faa nyi ko: Ame laa juupel ɓo ɓe, me nyiŋ cok mai ɓo ka za mo joŋra syiŋ wo ɓe gŋ. 13 Ne cok me cak bam ka mo tǝ ka, wala me pee tǝzyee ge ɓo ka mo re fakpãhpǝǝ, koo me pee syem maɓe' ah ge ɓo tǝ za ɓe 14 mai me ɗii ra ɓo ne za ma ka syak ɓe, mo juura pel wo ɓe, mo toora bii ne goŋga, mo soɓra faɓe' mai mo tǝ joŋra ɓe, me ga laa ga coksǝŋ, me ga rwah faɓe' ɓǝǝ ga lalle, me so ga joŋ sǝr ɓǝǝ yea jam faɗa. 15 Nahnǝn ɓe ga yea tǝ cok maiko, me ga laa juupel mai daŋ moo ga juura wo ɓe gŋ. 16 Ame nǝǝ yaŋ maiko, me joŋ cok ah ɓo na cok mai moo ga juura pel wo ɓe gŋ ga lii ga lii. Cẽecẽe nahnǝn ɓe ga yea tǝl ahe, me ga byak zah'nan daŋ. 17 Mo joŋ mor ɓe ne zahzyil vaŋno tǝgbana pa ɓo David mo joŋ ɓe, mo syee mor ɓǝ lai ɓe ra tǝkine joŋ fan mai daŋ me faa ɓo nyi mo ɓe, 18 ka me ga joŋ ɓǝ mai me faa ɓo nyi pa ɓo David. Mor ne cok ah me faa nyi ko, cẽecẽe morsǝ̃ǝ ɓo ye ga kaa goŋ Israel. 19 Amma amo ne za ɓo daŋ, we zyii syee mor ɓǝ lai ɓe tǝkine ɓǝ mai daŋ me faa ɓo nyi we ya, we kal tǝ syee mor masǝŋ ki ra ɓe, 20 ka me ga nĩi we gin pǝ sǝr mai me nyi ɓo nyi we myahe, so me ga soɓ yaŋ mai me nǝǝ ɓo na cok mai ka za mo juupel wo ɓe gŋ. Za sǝr daŋ a ga cuura tǝ cuu ne ɓǝ za Israel, a ga syakra ra syakke. 21 Zǝzǝ̃ǝ yaŋ mai a pǝyǝkki, amma cok ɓeɓ ah koo zune mo ge pǝ̃ǝ kah ah daŋ, a ga kaa tǝl ah gǝriŋ, a ga fifii faa: Dǝɓlii joŋ sǝr mai ne yaŋ mai nai mor fẽene? 22 Za ga zyii zah ah faa: Mor soɓra Dǝɓlii Masǝŋ ɓǝǝ mai mo pǝ̃ǝ ne pa ɓǝǝ lii ra gin sǝr Egiɓ ɓoo ɓo, so kal tǝ syeera mor masǝŋ ki ra, a juura pel wo ɓǝǝra. Dǝɓlii pee ɓeɓ mai ge ɓo tǝ ɓǝǝ mor ahe.