Pãa za joŋzahsyiŋ ne Lewitien
1 Mai pãa za joŋzahsyiŋ ne Lewitien mai mo pii soora gin pǝ byak ge ne Serubabel we Salatiel, ne pa joŋzahsyiŋ Joswa yo.
2-7 Za joŋzahsyiŋrĩ:
Seraja, Jeremias, Ezra,
Amaria, Maluk, Hatus,
Sekania, Rekum, Merimot,
Iddo, Gineton, Abiija,
Mijamin, Maadia, Bilga,
Semaja, Jojariɓ, Jedaja,
Sallu, Amok, Hilkiija, ne Jedaja.
Za marai daŋ ara ye zaluu kǝsyil za joŋzahsyiŋ ne zah'nan Joswa.
8 Lewitien mai moo ɗǝǝra lǝŋ yii Masǝŋ ne ko ye Joswa, Binwi, Kadmiel, Serebia, Yuda, ne Mattania. 9 So Bakbukia ne Unni a ɗǝǝra lǝŋ ne wee pa ɓǝǝ Lewitien manyeeki ah ra.
Morsǝ̃ǝ pa joŋzahsyiŋ Joswa
10 Joswa byaŋ Jojakim, Jojakim byaŋ Eliasiɓ, Eliasiɓ byaŋ Jojada. 11 Jojada byaŋ Yunatan, Yunatan byaŋ Jaddua.
Zaluu ma morsǝ̃ǝ za joŋzahsyiŋrĩ
12-21 Ne cok Jojakim mo joŋ yeɓ pa joŋzahsyiŋ malii, zaluu ma morsǝ̃ǝ za joŋzahsyiŋ a naiko: Meraja daga morsǝ̃ǝ Seraja, Hanania daga morsǝ̃ǝ Jeremias, Mesulam daga morsǝ̃ǝ Ezra, Jokanan daga morsǝ̃ǝ Amaria, Yunatan daga morsǝ̃ǝ Meluki, Yuseɓ daga morsǝ̃ǝ Sebania, Adna daga morsǝ̃ǝ Harim, Hilkiija daga morsǝ̃ǝ Merajot, Zakarias daga morsǝ̃ǝ Iddo, Mesulam daga morsǝ̃ǝ Gineton, Zikri daga morsǝ̃ǝ Abiija, so dǝɓ ki no daga morsǝ̃ǝ Minjamin ta, Piltai daga morsǝ̃ǝ Moadia, Sammua daga morsǝ̃ǝ Bilga, Yunatan daga morsǝ̃ǝ Semaja, Matenai daga morsǝ̃ǝ Jojariɓ, Uzzi daga morsǝ̃ǝ Jedaja, Kallai daga morsǝ̃ǝ Sallai, Eber daga morsǝ̃ǝ Amok, Haskabia daga morsǝ̃ǝ Hilkiija, Netanel daga morsǝ̃ǝ Jedaja.
Tǝɗii za joŋzahsyiŋ maluu ra, ne za yaŋ Lewitien
22 Ne cok zah'nan Eliasiɓ, Jojada, Johanan, ne Jaddua mo joŋra yeɓ pa joŋzahsyiŋ malii ne ko, ŋwǝǝra tǝɗii za yaŋ Lewitien maluu ah ɓo ŋwǝǝ ne mǝ za joŋzahsyiŋ daŋ, ŋhaa dai zah'nan Darius goŋ sǝr Persia.
23 Morsǝ̃ǝ Lewitien laŋ, zaluu ma pel za ɓǝǝ ŋwǝǝra tǝɗii ɓǝǝ ɓo pǝ ɗerewol Kee Ɓǝ, ŋhaa dai zah'nan Johanan we Eliasiɓ.
Yeɓ ma joŋ yaŋ Masǝŋ
24 Lewitien mai Haskabia, Serebia, Joswa, Binwi, ne Kadmiel ye mo lwaara ra ɓo, zyeɓra kul za ɓǝǝra. Kul za zahlǝŋ camcam gwa, a yiira Masǝŋ, a joŋra osoko nyi ko, tǝgbana ɓǝ lai mai David dǝɓ Masǝŋ mo faa ɓǝ ah ɓo.
25 So zaluu Lewitien Mattania, Bakbukia, Obadias, Mesulam, Talmon, ne Akkuɓ, a byakra yaŋ rǝk fan mai mo kah zahfah yaŋ Masǝŋ.
26 Za marai daŋ ara no ne cok zah'nan Jojakim we Joswa, we Josadak, ne zah'nan govener Nehemias, tǝkine zah'nan pa joŋzahsyiŋ Ezra pa cuu ɓǝ laini.
Joŋra fĩi vuu ɓaale
27 Ne cok mo tǝ joŋra fĩi vuu ɓaale, ɗiira Lewitien daga yaŋ mai mo kaara ɓo yaŋ camcam daŋ ka mo gera yaŋ Jerusalem, ka mo joŋra fĩi ne laa pǝ'nyahre, mo joŋra osoko, mo ɗǝǝra lǝŋ ne woŋ koŋkeere, tǝkine tǝnjuŋni. 28 Lewitien mai moo ɗǝǝra lǝŋni, taira pǝ cok mai mo kaara ryaŋ yaŋ Jerusalem ɓo, tǝkine yaŋ mai mo kaara ryaŋ Netofa ɓo, 29 ne Bet-Gilgal, ne Geba, tǝkine Asmavet pǝ cok mai mo kaara ɓo gŋ. 30 Za joŋzahsyiŋ ne Lewitien joŋra suu ɓǝǝ daŋdaŋ kǝpelle. Fahfal ah so joŋra za pãare, ne zahfahe tǝkine ɓaale yaŋ Jerusalem.
31 Ame Nehemias, me tai zaluu Yahuduen yee ge tǝ ɓaale sǝŋ, me zyeɓ kul za camcam gwa, ka mo syeera tǝ ɓaale kiŋ yaŋ Jerusalem ne ko, mo joŋra osoko nyi Masǝŋ. Kul patǝ vaŋno ah syeera tǝ ɓaale nǝfah jokǝsãh ka ga nǝfah kǝ wo zahfah Ma Zahhalle. 32 Hosea syee fahfal za ma ɗǝǝra lǝŋni, tǝkine raita zaluu zahban Yuda. 33-35 So za joŋzahsyiŋ ma ulra kokõorĩi so syeera ge mor ɓǝǝra, zan ah ara naiko: Azaria, Ezra, Mesulam, Yuda, Benyaamin, Semaja, ne Jeremias, so fahfal ɓǝǝ Zakarias we Yunatan, we Semaja, we Mattania, we Mikaia, we Zakkur dǝɓ morsǝ̃ǝ Asaf kalra ge gŋ. 36 Za ma morsǝ̃ǝ ah manyeeki ah syeera fahfal ahe, zan ah ye Semaja, Azarel, Milalai, Gilalai, Mai, Netanel, Yuda, ne Hanani, ara daŋ, ara ne fan ɗǝǝ lǝŋ camcam mai goŋ David dǝɓ Masǝŋ mo nyi nyi za ma ɗǝǝ lǝŋni. Ezra pa cuu ɓǝ lai ye kal pel ɓǝǝra. 37 Pǝ̃ǝra zahfah Ma Zahbii, ɓoora tǝtǝl jaŋjaŋ, ge yeera pǝ cok mai za moo yee gŋ ga yaŋ David, so syeera ge pǝ cok ma yee ga tǝ ɓaale, fahfal yaŋ David ka ga kah zahfah Ma Zahbii nǝfah kǝmorcomzah'nanne.
38 Kul patǝ gwa ah laŋ syeera tǝ ɓaale nǝfah jokǝlǝɓai, ame syee fahfal ɓǝǝ ne raita zaluu zahban Yuda manyeeki ahe. Aru syee tǝ ɓaale fahfal yaŋ mawah ah mai lak wii mo gŋ. So ru ge dai zah ɓaale ma'ahe. 39 Ru so ur gin gŋ ru ge pǝ̃ǝ zahfah Efraim, ne zahfah Jesana, ne zahfah Luma Syiŋ, ne yaŋ Hananiel mai mo vuu ɓo pǝwahe, ne yaŋ mawah ah mai moo ɗii ne Temere, ŋhaa ru ge dai zahfah Pǝsǝ̃ǝre. Ru ge i zah syel kah zahfah Byak Cokki. 40 Kul za ɗǝǝ lǝŋ matǝ gwa ge uura yaŋ Masǝŋ joŋra osoko nyi Masǝŋ, ame ne raita zaluu mai mo ne me daŋ ru gŋ, 41 tǝkine za joŋzahsyiŋ ma ulra kokõorĩi: Eliakim, Maaseja, Minjamin, Mikaia, Eljonai, Zakarias, ne Hanania. 42 So ne za ma ɗǝǝ lǝŋ mai Jisrakia ye mo pa kal pel ɓǝǝra, zan ah ara naiko: Maaseja, Semaja, Eleasar, Uzzi, Jokanan, Malkia, Elam, ne Ezar, a ɗǝǝra lǝŋ ga sǝŋ ne kyaŋ pǝ'manne. Pa tǝŋ kyaŋ lǝŋ ye Jezrahiija.
43 Com ah laŋ nyira fan mor joŋ syiŋ pǝlli, za laara pǝ'nyah no cam, mor Masǝŋ ye joŋ ra laa pǝ'nyahre. Ŋwǝǝ tǝkine wee manyee daŋ taira ne ra, joŋra fĩi ahe, ŋhaa cii fan joŋ ɓǝǝ a cii ga lal pǝɗǝkki.
Fahlii nyi fan mor yeɓ yaŋ Masǝŋ
44 Ne cok ah Yahuduen rǝkra za ka mo byakra yaŋ rǝk fan mai za moo gin ne sor ɓǝǝ ma zyen kǝpel tǝkine lee kpuu 'wah ɓǝǝ ma kǝpel ah ne patǝ jemma fan ɓǝǝra, ne fan mai za moo nyi mor yaŋ Masǝŋ daŋ moo rǝk gŋ. Ka zan ah mo lwaara ɓǝ yeɓ fan mai za moo ginra gin yaŋ camcam gin nyi mor za joŋzahsyiŋrĩ, ne Lewitien tǝgbana ɓǝ lai mo faa ɓo. Yahuduen daŋ laara pǝ'nyah ne yeɓ za joŋzahsyiŋ ne Lewitien. 45 Mor a joŋra yeɓ tǝgbana mai Masǝŋ mo faa ɓǝ ah ɓo, tǝkine fahlii yeɓ ma vãh fan daŋ, so za ma ɗǝǝ lǝŋ yaŋ Masǝŋ, ne za ma byak yaŋ Masǝŋ daŋ, a joŋra laŋ yeɓ ɓǝǝ na fahlii ah mai goŋ David ne wel ah Salomo mo cuura ɓo. 46 Mor daga ne cok zah'nan goŋ David ne Asaf zaluu ma lwaa ɓǝ yeɓ lǝŋ ma yii Masǝŋ, tǝkine joŋ osoko nyi ko ne a no. 47 So ne cok zah'nan Serubabel tǝkine zah'nan Nehemias za Israel daŋ a nyira fan nyi zah'nan daŋ, mor ka gbah jol za ma ɗǝǝra lǝŋ yaŋ Masǝŋ, ne za ma byakra yaŋ Masǝŋ. A so nyira fan nyi ma mor Lewitien, so Lewitien a nyira zah fan mai mo mor za joŋzahsyiŋ ma morsǝ̃ǝ Aron laŋ nyi ra ta.
© Bible Moundang © Alliance Biblique du Tchad, 1996.
