Kiita Masǝŋ
1 Amo dǝɓ mai mo tǝ ŋgoŋ kiita tǝ za ki, koo amo ye mo zune daŋ mo ka ne cok fofoo ya. Mor ne cok mo tǝ ŋgoŋ kiita tǝ za ki, amma mo so tǝ joŋ fan ah tǝgbana ra ta, ka mo ŋgoŋ kiita ah ɓo tǝ suu ɓo ta. 2 Mor na tǝ ɓe, kiita Masǝŋ mo tǝ za ma joŋra fan ma morãiko a goŋga. 3 Amma amo dǝɓ mai mo tǝ ŋgoŋ kiita tǝ za ma joŋra fan ma morãiko, so mo tǝ joŋ fan ah tǝgbana ra ta, mo lǝŋ mo ga ǝ̃ǝ pel kiita Masǝŋ ne? 4 Wala mo tǝ syẽa ɓǝ 'nyah Masǝŋ ne rõm ah mo tǝ rõm ne kyaŋ mo ne? Mo tǝ sõone ɓǝ 'nyah ah tǝ waa mo ka mo toobii kǝnah ya ne? 5 Amma zahzyil ɓo pǝyakke, mo ka tǝ zyii ɓǝ toobii ya. Mor ah mo tǝ tai kiita Masǝŋ tǝ ɓo pǝ'man mor zah'nan ma pel mai Masǝŋ mo tǝ ga cuu kpãh ah tǝkine kiita tǝ goŋga ah daŋ. 6 A ga soo za vaŋno vaŋno daŋ tǝgbana yeɓ ɓǝǝ mo joŋra. 7 Amma a ga nyi cee ma ga lii nyi za mai moo syeera ne joŋ yeɓ sãhe, tǝkine kyeɓ yii ne yǝk ne cee ma ga lii ma jol Masǝŋ. 8 Amma za mai mo zyii syeera mor ah ya, mo soɓra goŋga mo so kal tǝ syeera mor ɓǝɓe' daŋ, Masǝŋ ga ɓaŋ kpãh tǝ ɓǝǝ tǝkine syẽa ra. 9 Bone ne ɓǝ ma neǝ zahzyil a ga lwaa za mai moo joŋra faɓe' daŋ, a ga lwaa Yahuduen kǝpelle, amma a ga lwaa za ki ta. 10 Amma za mai mo tǝ joŋra yeɓ sãhe, Masǝŋ ga yii ra pǝ yǝk tǝkine nyi jam nyi ra, Yahuduen kǝpelle, nai ne za ki ta. 11 Mor Masǝŋ ka joŋ za pel ah camcam ya.
12 Za mai mo tǝra ɓǝ lai Mosus ya mo tǝ joŋra faɓe' daŋ, a ga muŋra, koo ara mo ka ne ɓǝ lai ya laŋ ko. Amma Yahuduen mai mo tǝra ɓǝ lai Mosus ɓo mo so tǝ joŋra faɓe', Masǝŋ ga ŋgoŋ kiita tǝ ɓǝǝ tǝgbana ɓǝ mai mo ŋwǝǝ ɓo pǝ ɓǝ lai ahe. 13 Mor za matǝ njaŋ pel Masǝŋ ye ka za ma laa ɓǝ lai ne sok to ya, amma ako ye za mai mo tǝ syeera mor ɓǝ mai ɓǝ lai mo cuu ɓo. 14 Ne cok za mai mo tǝra ɓǝ lai Yahuduen ya, a syeera mor ɓǝ foo suu ɓǝǝ tǝgbana mai ɓǝ lai mo faa ɓo, ara ka ne ɓǝ lai ya, amma suu ɓǝǝ to ɓǝ lai ɓǝǝ yo. 15 A cuura: syel ɓǝǝ yee cuu fan mai ɓǝ lai mo faa ɓǝ ah ɓo daŋ ŋwǝǝ ɓo pǝ zahzyil ɓǝǝra, fatan zahzyil ɓǝǝ laŋ a joŋ syedowal ah ta. Comki ɓǝ foo ɓǝǝ a cen ra, comki laŋ a wǝǝ ra ta. 16 Ne zah'nan mai mo tǝ ga ge, a ga yea naita, Masǝŋ ne Yesu Kristu ga ŋgoŋ kiita tǝ fan mai mo muŋ ɓo pǝ zahzyil dǝfuu, tǝgbana Ɓǝ'nyah mai me tǝ cuu mo faa ɓo.
Yahuduen tǝkine ɓǝ lai
17 Amma amo, mo tǝ ɗii suu ɓo ne Yahuduyo, mo uu ɓo tǝ ɓǝ lai mo tǝ yii suu ɓo tǝ ɓǝ Masǝŋ ɓo, 18 mo tǝ fan mai Masǝŋ mo 'yah ka mo joŋ ɓo, mor ɓǝ lai cuu fahlii ah nyi mo ka mo nǝǝ fan masãhe. 19 Mo lǝŋ mo gak gbǝ sǝguu pel rǝ̃ǝ, mo gak sǝǝ cokfãi nyi za mai mo pǝ cokfuu, 20 mo ye pa cuu fan nyi za mai mo tǝra fan ki ya, tǝkine pa cuu fan nyi wee nyeere, mor fahlii fatan ah ne goŋga ah daŋ mo lwaa ɓo pǝ ɓǝ lai. 21 Amo dǝɓ mai mo tǝ cuu nyi za ki, mo ka cuu nyi suu ɓo ya ne? Mo tǝ faa: We kiŋ nyin ka. Ma ɓo mo tǝ kiŋ ɗǝne? 22 Mo faa: Dǝɓ mo joŋ ɓǝǝ ka. Ma ɓo mo tǝ joŋ ɗǝne? Amo syẽa ɓǝ masǝŋ ki cam, mor fẽe mo tǝ kiŋ fan yeɓ ah ra ne? 23 Amo tǝ yii suu ɓo ne ɓǝ lai, amma mo tǝ ɓeɓ yǝk Masǝŋ ne joŋ fan mai ɓǝ lai ah mo cak ɓo. 24 Mor Ɗerewol faa: Tǝ faara ɓǝɓe' tǝ Masǝŋ kǝsyil za sǝr mor ɓii Yahuduen.
25 Mo tǝ syee mor ɓǝ lai ɓe, ka daakan ɓo pǝsãhe, amma mo tǝ zyak ɓǝ lai ɓe, ka tǝgbana mo daakan a kpǝ. 26 Amma dǝɓ mai mo daakan a, amma mo so tǝ syee mor ɓǝ lai ɓe, Masǝŋ ka ga kwo ko tǝgbana daakan ɓo ya ne? 27 Dǝɓ mai mo daakan a, amma mo tǝ syee mor ɓǝ lai ɓe, a ga ŋgoŋ kiita tǝ ɓo dǝɓ mai mo daakan ɓo mo ne ɓǝ lai mo ŋwǝǝ ɓo jol mo ka tǝ syee mor ah ya. 28 Ɓǝ ah a naiko: Yahuduyo matǝ goŋga ye ka mai dǝɓ moo kwan kee suu ah ne nahnǝn ne mai mo daakan ma wo suu lal ɓo ya, 29 amma Yahuduyo matǝ goŋga ye dǝɓ mai mo ne pǝ cii ɓǝr mo daakan ma zahzyil ɓo, daakan mai Tǝ'yak Masǝŋ ye moo daa nyi dǝɓ ɓǝ lai mai mo ŋwǝǝ ɓo ye mo ka cuu ɓo ya. Dǝɓ ah Masǝŋ ye yii ko ɓo, dǝfuu ye ka.
© Bible Moundang © Alliance Biblique du Tchad, 1996.
