Ira Jabin ne za goŋ ma ne ki
1 Ne cok Jabin goŋ Hazor mo laa ɓǝ mai mo joŋ, pepee ge wo Jobaɓ goŋ Madon ne goŋ Simron, goŋ Aksaf, 2 tǝkine za goŋ mai mo kaara ɓo nǝfah kǝsǝŋ tǝ waare, ne mai mo pǝ cok tǝforoŋ Yordan nǝfah morkǝsǝŋ mabii Galile, ne ma tǝ geere, ne ma zahbii, gwari ne Dor, 3 so pee wo Kanaanien ma fah kǝmorcomzah'nan ne ma morcomlilli - Amorien, Hetien, Perisien ne Jebusien ma tǝ waare, tǝkine Hevien mai mo kah waa Hermon pǝ sǝr Mispa. 4 Pǝ̃ǝra ne za sal ɓǝǝ daŋ, pãa zan ah tǝgbana tǝkuu zahbii. Ara ne muŋta sal pǝlli ta. 5 Za goŋ rai taira cok vaŋno, ge ɗǝrra zahbii Meron mor ka ruu sal ne za Israel.
6 Dǝɓlii faa nyi Joswa: Mo ɗuu gal ɓǝǝ ka, mor tǝ'nan ne cok naiko me ga soɓ za Israel ik ra. Mo cee gah pǝr ɓǝǝra, mo ɓaa wii nyi muŋta sal ɓǝǝ ta. 7 Joswa tǝkine za sal ma ne ki daŋ ge ryaŋra zah ɓǝǝ zahbii Meron, urra ne ra. 8 Dǝɓlii soɓ ra ge jol za Israel ik ra, nĩira mor ɓǝǝ ŋhaa ge dai Sidon gbǝm, ŋhaa so ge dai Misrefot nǝfah kǝmorcomlilli, ŋhaa ge dai pǝ el Mispa nǝfah morcomzah'nanne, ikra ra, koo dǝɓ vaŋno ǝ̃ǝ ya. 9 Joswa joŋ ne ra tǝgbana mai Dǝɓlii mo faa nyi ko, cee gah nyi pǝr ɓǝǝra, ɓaa wii nyi muŋta sal ɓǝǝ ta.
10 Fahfal ah Joswa pii soo ge re Hazor, ce goŋ yaŋ ah ne kafahe pǝ wulli. Amma daga pǝtãa Hazor yaŋ goŋ malii mai mo yea lwaa goŋ rai ɓo daŋ yo. 11 Ikra fan ma ne cee mo ɓǝr yaŋ ah daŋ vǝr tǝɗe', soɓra fan ma ne cee gŋ ya, so ɓaara wii nyi yaŋ ahe.
12 Joswa re goŋ rai tǝkine yaŋ ɓǝǝ daŋ, ik ra pǝ wulli. Vǝr zan ah tǝɗe' tǝgbana Masǝŋ mo faa. 13 Amma yaŋ mai mo kaa ɓo tǝgee ah ra daŋ za Israel ɓaara wii nyi ya, sai Joswa ɓoo wii nyi Hazor to. 14 Za Israel woora fan yaŋ rai tǝkine faɓal ah ra daŋ ka syak ɓǝǝra. Amma ikra dǝfuu ah vǝr tǝɗe'. Soɓra fan ma ne cee gŋ ya. 15 Ɓǝ mai Dǝɓlii mo faa nyi dǝɓ yeɓ ah Mosus, Mosus so faa nyi Joswa, Joswa laŋ soɓ ɓǝ mai Dǝɓlii mo faa nyi Mosus daŋ ge lal vaŋno ya.
Joswa re sǝr daŋ
16 Joswa re sǝr rai daŋ, ma tǝ waa ne ma tǝ geere, ne ma fahsǝŋ ne ma morkǝsǝŋ, ne sǝr Gosen, ne cok ma na pil mo fah morkǝsǝŋ ahe, tǝkine cok tǝforoŋ Yordan daŋ. 17-18 Sǝr ah tǝŋ daga kah waa Halak nǝfah morkǝsǝŋ gwari ne sǝr Edom, ŋhaa ge dai Ba'al-Gad nǝ fahsǝŋ ne cok tǝforoŋ Liban nǝ morkǝsǝŋ waa Hermon. Joswa nǝn ne ruu sal ne goŋ sǝr rai liilii, gbah za goŋ ah daŋ ik ra pǝ wulli. 19 Yaŋ mai mo zyeɓ ɓǝ ka kaa jam ne za Israel kǝka sai Hevien mai mo kaara ɓo Gilgal to. Za Israel rera sǝr daŋ ne salle. 20 Mor Dǝɓlii 'yah za rai mo yerra zahzyil ɓǝǝ ka mo urra ka ruu sal ne za Israel ka za Israel mo ik ra vǝr tǝɗe' bai kwan syak tǝ ɓǝǝra, amma ka mo vǝrra ra tǝgbana mai Dǝɓlii mo faa nyi Mosus.
21 Ne cok ah Joswa ge ik Anakien ma tǝ waa Hebron ne Debir, Anaɓ, tǝkine ma tǝ waa Yuda ne tǝ waa Jerusalem daŋ vǝr tǝɗe'. Joswa vǝr ra tǝkine yaŋ ɓǝǝ daŋ. 22 Coŋ Anakien koo vaŋno tǝ sǝr za Israel a, sai coŋra ge Gaza ne Gat tǝkine Asdod vaŋno vaŋno to.
23 Joswa re sǝr daŋ tǝgbana mai Dǝɓlii mo faa nyi Mosus. Joswa nyi sǝr ah nyi za Israel ka renne, za daŋ lwaara zah ma ɓǝǝ ne morsǝ̃ǝ ɓǝǝra.
So sǝr 'yak bai ruu salle.
© Bible Moundang © Alliance Biblique du Tchad, 1996.
