Lǝŋ ma joŋ osoko
1 Dǝɓlii, amo ye Masǝŋ ɓe.
Me ga joŋ osoko nyi mo tǝkine ɗǝǝ lǝŋ yii mo ne ko.
Mor amo joŋ fan matǝ gǝriŋ ah mai mo zyeɓ ɓǝ ah kan ɓo daga ɓaa ka joŋni.
2 Mo joŋ yaŋ maluu camcam ciŋ gboŋni,
Amo dah ɓaale yaŋ maswah daŋ ge sǝŋ.
Yaŋ goŋ mai za syiŋ ɓuu mo vuura ɓo daŋ kǝkao.
3 Za sǝr maswah ah camcam a ga yiira mo.
A ga gbǝra yǝk ɓo pǝ yaŋ maluu mai za maɓea ah mo gŋ pǝ sǝr camcam daŋ.
4 Ne cok zah'nan gaɓ mo ge ɓe,
Za syak ne mabaidǝɓ a ɗuura gin wo ɓo,
So mo nyi cok muŋ nyi ra pel zyak ma'man ahe,
Mo gban cee tǝ ɓǝǝ ka com mo cwah ra ka.
Za maɓea ah a joŋra dǝɓ tǝgbana zyak zah bam mai moo hah yaŋ ga sǝŋ,
5 Ara tǝgbana kǝǝ mai moo gban matǝ sǝrri.
Amma Dǝɓlii, amo ye cak zah za syiŋ ɓuuru,
Amo cak ɓǝ ɓyaŋ za maɓea ah tǝgbana swãh bam moo cak coo comme.
Masǝŋ zyeɓ farel malii ahe
6 Dǝɓlii ma ne swah daŋ tǝ ga zyeɓ farel malii ah mor za sǝr daŋ tǝwaa Sion nyeeko, tǝ ga zyeɓ farel ma'nyah ah ra tǝkine fazwan masãhe. 7 A ga ɓaŋ ɓǝ swaa mai mo tǝtǝl za sǝr daŋ gŋ ga lalle. 8 Masǝŋ Dǝɓlii ga muŋ wul ga lii ga lii! A ga tah mĩi yee nahnǝn za daŋ, a ga wǝǝ ɓǝ swãa mai zan ah mo yea tǝ laara wo sǝr daŋ ga lalle, mor Dǝɓlii faa ɓǝ ah ɓo naiko.
9 Ne cok fan ah mo joŋ ɓe, za daŋ ga faara: Ako ye Masǝŋ man mai na soɓ suu man ɓo wol ah ka mo ǝ̃ǝko na. Ako ye Dǝɓlii, na soɓ suu man ɓo wol ahe, zǝzǝ̃ǝko ana tǝ laa pǝ'nyah tǝkine 'nyah suu, mor ako ǝ̃ǝ na ɓe.
Masǝŋ ga ŋgoŋ kiita tǝ Moab
10 Dǝɓlii ga byak waa Sion, amma a ga dahra Moab ga sǝŋ ne ɓal tǝgbana dǝɓ moo dǝǝ vuuri. 11 A ga ɓaara jol ɓǝǝ tǝgbana dǝɓ moo ɓaa jol ne ee bii, amma yii suu ɓǝǝ a ga joŋ jol ɓǝǝ lea ga sǝŋ tǝkine yeɓ jol ɓǝǝ daŋ. 12 Masǝŋ ga ɓeɓ ɓaale Moab mo vuu ɓo, a ga hah ga sǝŋ nahmnahm.
© Bible Moundang © Alliance Biblique du Tchad, 1996.
