Juupel ma mor fii gbah jolle
1 Ɓǝ pǝgaɓ tǝtǝl za syiŋ mana! Woora fan tǝkine ɓeɓ fanne, koo dǝɓ vaŋno ma nyen jol woo fan ɓǝǝ wala ɓeɓ fan ɓǝǝ kǝka. Amma zah'nan woo fan woo ɓǝǝ tǝkine ɓeɓ fan ɓǝǝ a ga i zahe. A ga rera reba fan joŋ ɓǝǝra.
2 Dǝɓlii, mo kwo syak tǝ ɓuuru. Ru soɓ suu ɓuu ɓo wo ɓo. Mo byak ru zah'nan Masǝŋ daŋ, mo ǝ̃ǝ ru pǝ zah'nan gaɓɓe. 3 Ne cok mo tǝ ruu sal mor ɓuu za mo laara cii ah ɓe, a ɗuura kalle. 4 Za a woora fan ɓǝǝ tǝgbana darfyãhfyãh moo woo jẽere.
5 Dǝɓlii pǝyǝk no cam! Kaa goŋ ɓo tǝ fan daŋ. A ga baa yaŋ Jerusalem ne kiita matǝ goŋga ah tǝkine fan joŋ matǝ njaŋ ahe. 6 A ga joŋ zan ah uu pǝswahe. A byak zan ah cẽecẽe, a nyi fatan tǝkine yella nyi ra. Joŋ ɓǝǝ malii ah ako ye mai moo ɗuura Dǝɓlii.
7 Za maswah ah ra tǝ yera yee fii gbah jolle, profetoen goŋ mai mo kyeɓra ka zyeɓ ɓǝ kal tǝ jam kǝsyil zana tǝ yera yee ne mĩiri. 8 Fahlii lii daŋ so joŋ pǝgaɓɓe, koo dǝɓ vaŋno ka syee gŋ yao. Gbanzah mai za mo gbǝ ɓo daŋ ɓǝ ah syel ɓe, ɓǝ mai za mo zyeɓ ɓo kǝsyil ki daŋ ɓeɓ ɓe, za ka gbanra yǝk ki yao. 9 Sǝr ne lii ah daŋ ciŋ cok kol ɓo, ka ne yeɓ yao. Gǝ̃ǝ Liban yak ɓe, cok tǝforoŋ ma joŋ fan lii ah ma Saron ciŋ cok mayak ah ɓe, goo kpuu ma Basan ne ma tǝ waa Karmel tǝ ɓuu ga sǝŋ.
Dǝɓlii lai za syiŋ ahe
10 Dǝɓlii faa nyi zana: Zǝzǝ̃ǝ mai me ga joŋ yeɓɓe, me ga cuu swah ɓe me ne nyi we. 11 Awe zyeɓ ɓǝ maɓea ah ma ne, so fan mai wee joŋ daŋ ka yea ne fahlii ya. Awe tǝ ɓeɓ suu ɓiiri! 12 We ga yea tǝgbana tǝsal mai za moo tǝǝ pǝɗama ne ko, we yea tǝgbana waa mai moo syen wii ciŋ sãhe. 13 Awe za matǝ gwari ne za maɗǝk ah daŋ, we laa ɓǝ fan mai me joŋ ɓo ka we tǝ ɓǝ swah ɓe gin gŋ. 14 Za faɓe' mai ara mo Sion, a coora ne gal coo. A faara: Kiita Masǝŋ a tǝgbana wii mai moo syen ga lii ga lii, azu yee gak yea ne cee kǝsyil man pǝzyil wii ma morãi ne? 15 We tǝ faa ɓǝ masãh ah tǝkine joŋ fan matǝ njaŋ ah ɓe, we gak yea sǝŋ ne cee. We joŋ vǝrvǝr ne za syak ka, we nyiŋ fan jol za ka, we tai ki ne za mai mo zyeɓra ɓǝ ɓo ka in wul wala ka joŋ faɓe' maki ah ra ka. 16 Nai ɓe, we ga yea ne pejii, we ga yea jam tǝgbana yaŋ ma ne ɓaale maswah ahe, we ga lwaa farel ka ren tǝkine bii zwanne.
Yǝk ma pelle
17 Comki we ga kwo goŋ kaa ma ne yǝk ah tǝ sǝr ne lii ah nyah sǝr nai daŋ. 18 Zahzyil ɓii ga foo ɓǝ gal mai za gwǝǝ mo yea tǝ joŋ we ɗuu foo to, we ga faa: Za ma foo sǝr kŋ ara kẽne? Za ma sǝǝ gǝraama ra kŋ ara kẽne? 19 We ka ga fǝ̃ǝ kwo za gwǝǝ maɓea moo faara zah mai we ka laa ya faɗa yao. 20 We ẽe Sion, ako ye yaŋ malii mai naa joŋ fĩi ɓǝ iŋ man daŋ gŋ. We ẽe Jerusalem, a ga yea yaŋ mai za moo ga kaa gŋ jam, a ga yea tǝgbana tal mbǝro mai dǝɓ mo ka gak nǝǝ gaari ah gin pǝ cok ah ka ga cok ki ne ya ŋhaa ga lii. 21 Dǝɓlii ga cuu yǝk ah nyi na. Na ga kaa kah mabii tǝkine zǝǝre, amma dah za syiŋ man ka ga syee tǝ bii ah ra ya. 22-23 Mor kpuu mai moo saara godel ma ɓaŋ dah ga pel ka ne yeɓ yao, godel ma saa pel dah ka ga ɓaŋ ga sǝŋ ya. Za ga woora fan sãh mai sooje za syiŋ man mo ne daŋ, koo lem laŋ a ga woora fan ma lwaa zah salle. Dǝɓlii ne suu ah yee ga kaa goŋ mana, a ga byak na. 24 Koo dǝɓ vaŋno yaŋ Jerusalem ka ga faa zye ne syemme faɗa yao, faɓe' za yaŋ ah daŋ a ga rwah ga lalle.
© Bible Moundang © Alliance Biblique du Tchad, 1996.
