Juupel ma fii ka Masǝŋ mo byak ko
1 Lǝŋ David.
Dǝɓlii, me juupel wo ɓo,
Me soɓ suu ɓe ɓo wo ɓo Masǝŋ ɓe.
2 Mo ǝ̃ǝ me, mo soɓ za syiŋ ɓe cuu swãa ɓe ka,
Mo soɓ za syiŋ ɓe 'nyahra suu tǝ ɓǝ ɓe ka ta.
3 Za mai mo soɓra suu ɓǝǝ ɓo wo ɓo swãa ka re ra ya,
Amma swãa ga re za mai moo ŋwoora kyaŋ ne mo.
4 Dǝɓlii, mo cuu fahlii ɓo nyi me ka me tǝ.
5 Mo cuu kal ɓo matǝ goŋga nyi me,
Mor amo ye pa ǝ̃ǝ ɓe.
Zah'nan daŋ me soɓ suu ɓe ɓo wo ɓo.
6 Dǝɓlii, mo foo ɓǝ kwan syak ɓo tǝkine 'yah ɓo malii mai mo joŋ ɓo daga ɓaaɓe.
7 Mo rõm faɓe' ɓe tǝkine ɓǝ mai me joŋ daga laŋ ɓe,
Mor 'yah ɓo malii tǝkine ɓǝ sãh ɓo.
Dǝɓlii, mo foo ɓǝ ɓe.
8 Dǝɓlii ye Dǝɓ sãhe,
Dǝɓ tǝ goŋga yo,
A cuu fahlii nyi za ma zyak fahlii.
9 A zaŋ za ma wonsuu kan tǝ fahlii masãhe,
A cuu fahlii mai mo 'yah ɓo nyi ra.
10 A zaŋ za mai moo syeera mor ɓǝ gbanzah ah ne ɓǝ lai ah ra ne 'yah tǝkine goŋga.
11 Dǝɓlii, mo joŋ ɓǝ faa ɓo ge cok ahe,
Mo rõm faɓe' ɓe,
Mor faɓe' ɓe pǝ'manne.
12 Za mai mo tǝ laara zah Dǝɓlii daŋ a ga feera ɓǝ fahlii mai moo gak syeera gŋ jol ahe.
13 A ga kaara jam, wee ɓǝǝ ga rera sǝr mai Masǝŋ mo nyi ɓo ta.
14 Dǝɓlii ako ye bai za mai moo laara zah ahe,
A cuu ɓǝ gbanzah ah nyi ra.
15 Me syii nahnǝn ɓe ga wo Dǝɓlii cẽecẽe,
Mor a wǝǝ mǝmmǝǝ ɓal ɓe ga lalle.
16 Mo cii nahnǝn ẽe me, mo kwo syak tǝ ɓe,
Mor me ye mabaidǝɓɓi, me pǝtǝtǝ̃ǝre.
17 Mo wǝǝ me jol ɓǝ swaa ɓe,
Mo ǝ̃ǝ me gin zah gaɓɓe.
18 Mo ẽe syak ɓe me gŋ ne bone ɓe daŋ,
Mo rwah faɓe' ɓe daŋ ge lalle.
19 Mo ẽe za syiŋ ɓe taa ɗao,
Syiŋra me ɓo no cam.
20 Mo byak me, mo ǝ̃ǝ me,
Mo soɓ swãa re me ka,
Mor me soɓ suu ɓe ɓo jol ɓo.
21 Mo joŋ goŋga tǝkine ɓǝ sãh yea na pa byak ɓe,
Mor me soɓ suu ɓe ɓo wo ɓo.
22 Masǝŋ, mo wǝǝ za ɓo pǝ bone ɓǝǝ ra daŋ.
© Bible Moundang © Alliance Biblique du Tchad, 1996.
