Ɓǝ muŋ Moab
1 Ɓǝ mai Dǝɓlii mo faa tǝ sǝr Moab a naiko, faa: Ɓǝ pǝgaɓ tǝ za Nebo, mor yaŋ ɓǝǝ ɓeɓ ɓe. Rera Kirjataim ɓe, ɓaale maswah kŋ hah ge sǝŋ ɓe, zan ah lwaara swãa ɓe ta. 2 Yǝk Moab vǝr ɓe, za syiŋ ah foora ɓǝɓe' tǝl ah daga Hesbon, faara: Na ge vǝr za Moab. Yaŋ Madmen laŋ a ga ɓeɓ ta, za sal ga ryaŋra yaŋ ahe. 3 Za Horonaim tǝ yera yee faa: Za mana ɓeɓ ɓe, ru muŋ ɓe! 4 Sǝr Moab ɓeɓ ɓe, we laa wee manyee moo yera yee ɗao. 5 We laa cii yee ɓǝǝ mo tǝ yeera tǝ fahlii ma ga Lukit ɗao, we laa dahgor ɓǝǝ mo tǝ dahra jol bone, tǝ fahlii ma ga Horonaim ɗao. 6 A faara: Na ɗuu gwari, ka na ǝ̃ǝ cee suu mana, na ɗuu na korro cok moo ɗuuni.
7 Moab, amo gbǝ yǝk ɓǝ swah suu ɓo tǝkine joŋ ɓo ɓo, amma zǝzǝ̃ǝko, a ga rera mo, a ga ɓaŋra masǝŋ ɓo Kemos kal ne ko ne zaluu ah ra, ne za joŋzahsyiŋ ah ra daŋ. 8 Ame Dǝɓlii me faa, yaŋ mai moo ga coŋ mo ka ga ɓeɓ ya kǝka, cok ma tǝforoŋ ah tǝkine ma tǝbǝǝ daŋ a ga ɓeɓɓe. 9 We nyi yee nyi Moab ka mo zooko ne ko, mor tǝ yah ɓeɓ gwari, yaŋ ah maluu daŋ tǝ ga ciŋ gboŋni, koo dǝɓ vaŋno laŋ ka ga kaa gŋ ya.
10 Tǝkẽawãk tǝ dǝɓ mai mo ka joŋ yeɓ Dǝɓlii ne zahzyil ah daŋ ya. Tǝkẽawãk tǝ dǝɓ mai mo ka ik wul ne kafahe ah ya.
Yaŋ sǝr Moab maluu ɓeɓ ɓe
11 Dǝɓlii faa: Daga ɓaaɓe, Moab yea kaa ɓo jam, woora ra kal ge pǝ byak ne taa ya. Moab a tǝgbana bii lee kpuu vin mai mo rǝk ɓo pǝ dah ah sǝ, vǝlra gin pǝ dah ah ge pǝ dah maki ah taa ya. Jẽe ah ɓeɓ taa ya, a pǝsãh na tãa ah 'wa.
12 Amma zah'nan ah no ginni, ne cok ah me ga pee za ga vǝl Moab ga lal tǝgbana bii lee kpuu vin, a ga vǝlra gin pǝ dah ahe, so a ga ŋgǝ̃ǝra dah ah ga lalle. 13 So swãa ga re Moabien tǝ ɓǝ masǝŋ ɓǝǝ Kemos, tǝgbana swãa mo re za Israel ne ɓǝ masǝŋ yaŋ Betel mai mo gbǝra yǝk ɓǝ ahe.
14 Za Moab, mor fẽe we faa, awe ye za ma gorom ahe, we ye sooje ma tan ruu salle ne? 15 Moab ne yaŋ ah maluu daŋ ɓeɓ ɓe, ikra wee tǝbanna ah masãh ah ra ge lal ɓe. Ame ye Goŋe, Dǝɓlii ma ne swah daŋ, me faa naiko. 16 Zah'nan bone Moab tǝ gin o, ɓeɓ ah tǝ ga ge gwari.
17 Awe za mai we kaa ɓo kah ah gwari we tǝ yǝk ah ɓo, we yeyee we faa: Kaiya za mana, goŋ ah mo yea pǝyǝk taataa kǝkao, yǝk ah ne swah ah mo yea ne kŋ vǝr ɓe. 18 Awe za mai we kaa ɓo Dibon, we ɗǝr gin tǝ fakal ɓii mayǝk ah ra, we hai ge tǝ sǝrri, mor pa ma ɓeɓ Moab tǝ gin ka ɓo, a ga hah ɓaale ɓo ga sǝŋ. 19 Awe za mai we kaa ɓo Aroyer, we uu kah fahlii ka we byakke, ka we fii ɓǝ fan mai mo joŋ ɓo zah za mai mo ɗuura ǝ̃ǝ ɓo. 20 A ga zyiira faa: Moab lee ɓe, we yeyee tǝl ahe, ciŋ fan kol ɓe. We lai ɓǝ ah kah el Arnon daŋ we faa: Moab ɓeɓ ɓe.
21 Kiita ge tǝ yaŋ maluu ma tǝbǝǝ, ge tǝ Holon, Jahaza, Mefaat, 22 ne Dibon, Nebo, Bet-Diblataim, 23 ne tǝ Kirjataim ne Bet-Gamul, Bet-Meon, 24 ne Keriot ne Bosra, tǝkine tǝ yaŋ sǝr Moab maluu matǝ gwari ah ne maɗǝk ah ra daŋ. 25 Ame Dǝɓlii me faa, yǝk Moab vǝr ɓe, swah ah mo ne daŋ kǝkao.
Moab ga wuu syellele
26 Dǝɓlii faa: We nyi yim nyi Moab zwǝ tǝǝ ne ko, mor ŋwookyaŋ ne me. Moab ga hǝr tǝ zahzwǝǝ suu ah mo zwǝǝre, so za ga syakra ko. 27 Moab, mo foo ɓǝ mai mo yea tǝ syak za Israel kŋ ɓe ne? Amo joŋ ra tǝgbana gbahra ra kǝsyil za kaafuu ge ɓo ne ko.
28 Awe za mai we kaa ɓo sǝr Moab, we pǝ̃ǝ gin yaŋ ɓii maluu we ge kaa tǝgǝǝ waare, we yea tǝgbana matǝvaa mai moo syii kol ah kah yii gwari. 29 Moab a yii suu pǝlli, ame laa ɓǝ yii suu zan ah moo yiira, ne ɓǝ vǝrvǝr ɓǝǝ tǝkine mai moo foora ɓǝ suu ɓǝǝ to ɓe. 30 Ame Dǝɓlii me tǝ ɓǝ yii suu ɓǝǝ ɓe, yii suu ɓǝǝ ɓǝ kol o, fan mai moo joŋra daŋ ka ne yeɓ ya. 31 Mor ahe, me ga yeyee tǝ za sǝr Moab ne za Ker-Heres daŋ. 32 Me ga yeyee mor za Sibma kal za Jaizer. Yaŋ Sibma, amo na kpuu vin mai jol ah ra mo yee tǝ mabii wul ge ɓo nǝzakǝŋhaa, mo kal ge dai yaŋ Jaizer ɓo. Amma zǝzǝ̃ǝ lee ɓo ma ne zah gwahl tǝkine bii ah daŋ ɓeɓ ɓe. 33 Laa pǝ'nyah tǝkine fan ma 'nyah suu ah daŋ zol gin sǝr Moab ma joŋ fan lii kal ɓe. Bii lee kpuu vin ka ɗuu pǝ cok ŋhǝǝ ah yao, mor pa ma ŋhǝǝ ah kǝka, kyaŋ za ma ɗǝǝ lǝŋ laa pǝ'nyah ka cii gŋ yao.
34 Za yaŋ Hesbon ne Eleal tǝ yera yee, cii yee ɓǝǝ a cii ga dai Jahaza, ŋhaa za yaŋ Zoar ne za Horonaim tǝkine za yaŋ Eglat Mafuu daŋ a laara ga ne. Koo bii el Nimrim laŋ yak tǝɗe'. 35 Ame Dǝɓlii me faa, me ga yee zah za Moab pǝ cok joŋ syiŋ wo masǝŋ ɓǝǝ ra, pǝ cok ma tǝgee sǝŋ ah ra.
36 Zahzyil ɓe tǝ yeyee cii na tǝsol mor za Moab ne za Ker-Heres, mor fan sãh mai mo yea kanra zahzyil ɓo tǝl ah daŋ pee ɓe. 37 Azune daŋ a cik tǝtǝlli, a sõo pyaŋ ah ga lalle, ɗeara jol ɓǝǝ daŋ ne nyahe, azune daŋ ɓoo mbǝro dahsuu. 38 Tǝ zahdǝǝ sǝŋ sǝr Moab, ne tǝ fahlii daŋ, mo ka laa fan ki ya, sai mo laa yee to, mor ame Dǝɓlii me dah Moab tǝgbana cii mai za mo 'yah yao. 39 Moab ɓeɓ ɓe! We yeyee o! Swãa re Moab ɓe, ciŋ cok kol ɓe, za mai mo kaara jǝk ɓo ne ki daŋ tǝ syakra ko.
Cok ka ɗuu ǝ̃ǝ kǝka wo za Moab ya
40 Ame Dǝɓlii me faa, za ga cwǝǝ gin tǝ Moab tǝgbana vak moo raŋ yee ah ka tanne. 41 A ga rera yaŋ ah maluu tǝkine ɓaale ah ra daŋ. Ne zah'nan ah sooje Moab a ga ɗuura gal tǝgbana mawin mai mo kaa byaŋ ɓo. 42 Za sǝr Moab ga vǝrri, ka ga yeara yao, mor ŋwoora kyaŋ ne me. 43 Ame Dǝɓlii me faa, galle, ne kpǝram tǝkine mǝmmǝǝ kaa ɓo tǝ byak za Moab. 44 Dǝɓ mo kyeɓ ka ǝ̃ǝ pel gal kal ɓe, kpǝram ga ɓaŋ ko, dǝɓ mo nǝǝ ɓal gin pǝ kpǝram ɓe, mǝmmǝǝ ga gbǝ ko. Mor ame Dǝɓlii me kan zah'nan ah ɓo mor ka ŋgoŋ kiita tǝ za Moab. 45 Za mai mo ɗuura, swah mo kǝka wo ɓǝǝ yao, a ga kyeɓra cok muŋ yaŋ Hesbon. Amma yaŋ Hesbon mai goŋ Sihon mo yea kaa ɓo gŋ tǝ syen wii. Wii tǝ syen zahsyee sǝr mǝ Moab ne tǝ waa ma pǝ sǝr Moab mai zan ah moo 'yahra sal pǝlli. 46 Ɓǝ gaɓ lwaa Moab ɓe, za mai moo juura pel wo Kemos vǝr ɓe, wee ɓǝǝ mawǝǝ ne maŋwǝǝ daŋ za gbah ra kal ne ɓe. 47 Amma pǝ zah'nan ma pel mo tǝ ginni, me ga joŋ za Moab yea jam faɗa. Dǝɓlii ŋgoŋ kiita tǝ Moab naiko.
© Bible Moundang © Alliance Biblique du Tchad, 1996.
