Na yii Masǝŋ ma ne swah daŋ
1 Na yii Dǝɓlii!
A pǝsãh ka na ɗǝǝ lǝŋ yii Masǝŋ man ne ko,
A pǝ'nyah ka na yii ko.
2 Dǝɓlii ye so jin ɓo tǝ vuu Jerusalem,
Tǝ zaŋ za mai mo zah sǝr za ki pii soo ne ko.
3 A kǝǝ za mai zahzyil mo nǝǝ ra ɓo ka zahzyil ɓǝǝ mo wuu.
4 Dǝɓlii tǝ pãa ŋwǝǝmǝŋgai mo coksǝŋ ɓe,
Gea tǝɗii ɓǝǝ ɓo vaŋno vaŋno daŋ.
5 Dǝɓlii man pǝyǝkki, a pǝswahe,
Fatan ah ka ne zahsyee ya.
6 A woo za matǝtǝ̃ǝ ur sǝŋ,
A ɓaa za faɓe' ga tǝ sǝrri.
7 Na woŋ tǝnjuŋ yii Dǝɓlii man ne ko.
Na ɗǝǝ lǝŋ cor ko ne ko.
8 Ako yee joŋ swãh yea sǝŋ,
A tan bam gin tǝ sǝrri,
A joŋ fãa giŋni.
9 A nyi farel nyi faɓalle,
Wee tǝmgbuu mo yeyee ɗii ko ɓe, a kǝ̃ǝ ra ne farelle.
10 Ɓǝ swah pǝr tǝkine swah sooje saaŋ ko ya.
11 Amma a laa pǝ'nyah ne za mai mo yiira ko,
Tǝkine za mai moo soɓra suu ɓǝǝ mor 'yah ahe.
12 Jerusalem, mo yii Dǝɓlii.
Sion, mo yii Masǝŋ ɓo.
13 Ako ye tǝ joŋ ka zahfah ɓo mo yea pǝswahe,
A ẽe za ɓo ta.
14 A byak zahsyee sǝr ɓo pǝsãhe,
A nyi alkamaari nyi mo kǝ̃ǝre.
15 A faa ɓǝ gin sǝŋ,
So ɓǝ ah a myah tǝ sǝr gwari sǝ.
16 A tan sum syaŋ mafãi na mbǝro gin tǝ sǝr na bamme,
A joŋ mahm nǝnni.
17 A tan syaŋ gin sǝŋ na tǝsalle,
Dǝɓ ka gak uu nǝn cok wok ah ya.
18 So a faa ɓǝ,
A pee zyak gin hǝǝni,
So a ɗuu bii.
19 Cuu ɓǝ faa ah nyi Yakuɓ,
Cuu ɓǝ lai ah ra nyi za Israel.
20 Ka joŋ nai wo zahban za ki mai mo tǝra ɓǝ lai ah ya ya.
Na yii Dǝɓlii!
© Bible Moundang © Alliance Biblique du Tchad, 1996.
