Ɓǝ lai tǝ ɓǝ fan nyi ma mor joŋ syiŋrĩ
1 Dǝɓlii faa nyi Mosus: 2 Mo faa nyi za Israel sye: Ne cok we ge dan pǝ sǝr mai me nyi ɓo nyi we ka kaa gŋ ɓe, ka we joŋ naiko: 3 Ka we nyi ŋgǝǝri, wala kǝbǝrri, wala pǝsãhmme, wala sǝgwii nyi Dǝɓlii na fan nyi ma joŋ syiŋ suŋwii, wala fan ma mor joŋ syiŋ ma baa ɓǝ gbanzah ne ko, wala mo fan ma nyi ne 'yah zahzyil o, mo fan mai wee nyi mor joŋ fĩi ɓǝ iŋ ɓii yo daŋ, mor Dǝɓlii laa fuŋ fan nyi ah ra pǝ'nyahre. 4 Dǝɓ mo 'yah nyi fan nyi marai nyi ko ɓe, ka mo so nyiko fan nyi ma farel gŋ ta. Sai mo nyiko sum tahsah mai mo suu ɓo ne nǝm liitǝr, 5 mo nyiko bii lee kpuu vin liitǝr vaŋno ta, syiŋ fazwan o, ne we pǝsãhm ma joŋ syiŋ suŋwii, wala ma joŋ syiŋ ne ko ne lii ah daŋ tǝɗe'. 6 Koo zune mo joŋ syiŋ ne kǝbǝrri, mo so nyiko fan nyi ma farel gŋ ta, sum tahsah gwa mai mo suu ɓo ne nǝm liitǝr ne raita, 7 so ne bii lee kpuu vin gŋ liitǝr vaŋno ne raita ta. Dǝɓlii laa fuŋ fan nyi ah ra pǝ'nyahre. 8 Koo zune mo nyi ŋgǝǝri nyi Dǝɓlii mor ka joŋ syiŋ suŋwii, wala mo mor joŋ syiŋ ma baa ɓǝ gbanzah yo, wala ma nyi jam yo, 9 sai mo so nyiko fan nyi ma farel gŋ ta, sum tahsah sai mai mo suu ɓo ne nǝm liitǝr gwa ta. 10 So ne fan joŋ syiŋ ma sǝsǝǝ ah ta, bii lee kpuu vin liitǝr gwa. Dǝɓlii laa fuŋ fan nyi ah ra pǝ'nyahre.
11 We nyi fan nyi ah ra ma farel ne ŋgǝǝri, kǝbǝrri, pǝsãhmme, tǝkine sǝgwii daŋ lamlam naiko. 12 We syee mor pãa fan mai we joŋ syiŋ ɓo ne ko, koo mo pǝpãa ɗǝne daŋ, ka we joŋ noo ta. 13 Koo mo dǝɓ Israel makẽne ah yo daŋ, mo 'yahko ka nyi fan nyi ma farel nyi Dǝɓlii ka mo laako pǝ'nyah ne ɓe, sai mo syeeko mor ɓǝ lai maiko. 14 Koo mo dǝɓ gwǝǝ ye mo ge kaa mowoo ɓo kǝsyil ɓiiri, wala dǝɓ ma 'yah kaa ne we ga lii yo, mo 'yahko ka nyi fan nyi ma farel nyi Dǝɓlii ka mo laako pǝ'nyah ne fuŋ ah ɓe, sai mo syeeko mor ɓǝ lai mai na we ta. 15 Ɓǝ lai mai a mor ɓii ne za gwǝǝ mai mo kaara ɓo kǝsyil ɓii ne zahŋhǝǝtǝ̃ǝ ma fahfal ɓii ra daŋ ga lii ga lii, mor awe ne ra daŋ, we pel Dǝɓlii zahki. 16 Ɓǝ lai ah ne ɓǝ nyi ah ra a mor ɓii tǝkine ra daŋ zahki.
17 Dǝɓlii faa nyi Mosus: 18 Mo faa nyi za Israel sye: We ge dan pǝ sǝr mai Dǝɓlii mo tǝ ga gŋ ne we ɓe, ka we joŋ naiko: 19 Ne cok we ge tǝ ren farel mai mo joŋ ɓo pǝ sǝr ah ɓe, mo mafẽene ah ye daŋ, ka we ɓaŋ farel ah gin gŋ nyi nyi Dǝɓlii ta. 20 Ne cok we ce sor ma byaŋ kǝpel ɓe, ka we nǝǝ ma nyi nyi Dǝɓlii gŋ ta, we joŋ farel ɓo ne sor ahe, ka we ɓaŋ tǝwaa ah zahtǝfah vaŋno mor Dǝɓlii ta. 21 Sum fakpãhpǝǝ ɓii ma joŋ kǝpel ah we joŋ ɓe daŋ, ka we nyi nyi Dǝɓlii ta. Ɓǝ ah ɓǝ lai ye mor ɓii ne zahŋhǝǝtǝ̃ǝ ma fahfal ɓii daŋ.
22 Ne cok we joŋ yella ya, we kal zǝǝ tǝ ɓǝ lai mai daŋ Dǝɓlii mo cuu ɓo nyi we ne zah Mosus ɓe, 23 ɓǝ lai mai Dǝɓlii mo faa ɓǝ ah ɓo ne zah Mosus, koo zahŋhǝǝtǝ̃ǝ ɓii ma fahfal ɓii daŋ mo zǝǝra tǝ ɓǝ mai Dǝɓlii mo faa ne zah Mosus, 24 wala za pãa mo zyakra ɓǝ ah mor tǝra ya ɓe, ka mo joŋra syiŋ suŋwii ne ŋgǝǝri, mor ka Dǝɓlii mo laa fuŋ ah pǝ'nyahre, ka mo so nyira fan nyi ma farel ne bii lee kpuu vin ta, mo so nyira kǝdai mor ka joŋ syiŋ ma ɓaŋ faɓe' ga lal ne gŋ ta. 25 Pa joŋzahsyiŋ mo joŋko syiŋ ma mor rwah faɓe' za pãare, ka faɓe' ɓǝǝ mo rwah ge lalle, mor joŋra faɓe' ah ɓo ka kee ya, so joŋra syiŋ ma mor rwah faɓe' ga lal na fan nyi ma farel ɓo wo Dǝɓlii ta. 26 Ka za Israel ne za gwǝǝ mai mo kaara ɓo kǝsyil ɓǝǝ daŋ faɓe' ɓǝǝ mo rwah ge lalle, mor faɓe' ah a tǝtǝl ɓǝǝ daŋ.
27 Koo dǝɓ vaŋno mo joŋ yella ya, mo zyak joŋ faɓe' ɓe, ka mo ɓaŋko we sǝgwii matam ah ma joŋ syii tǝ vaŋno, ka mo joŋko syiŋ ma ɓaŋ faɓe' ga lal ne ko. 28 Ka pa joŋzahsyiŋ mo joŋko syiŋ pel Dǝɓlii mor dǝɓ ahe, ka faɓe' dǝɓ ah mo vãhe, mo lwaako rõmme. 29 Ɓǝ lai mai a mor za daŋ mai mo joŋra faɓe' ɓo ka kee ya, koo mo dǝɓ Israel o, wala mo dǝɓ gwǝǝ ye mo kaa ɓo kǝsyil ɓǝǝra, daŋ a tǝki.
30 Amma koo zune mo joŋ faɓe' kee, mo dǝɓ Israel o, wala mo dǝɓ gwǝǝr o daŋ, ka tǝǝ Dǝɓlii ɓo, sai ka we i dǝɓ ah pǝ wulli. 31 Mor ka syẽa ɓǝ faa Dǝɓlii ɓo, zǝǝ tǝ ɓǝ lai ah ɓo kee. Ako ye kyeɓ wul ge ɓo tǝ suu ah ne ko.
Dǝɓ ma zǝǝ tǝ ɓǝ lai com 'yakke
32 Ne cok ah ka za Israel kǝsyicok ba, za ki kǝsyil ɓǝǝ lwaara dǝɓ ki tǝ sǝǝ zahwii ne zah'nan com 'yakke. 33 Zaŋra dǝɓ ah ge pel Mosus ne ko, ne Aron tǝkine za pãa daŋ. 34 So byakra dǝɓ ah pǝsãhe, mor ka ɓah tanra ɓǝ fan mai ka rǝ joŋ ne dǝɓ ah ya ba. 35 So Dǝɓlii faa nyi Mosus: We i dǝɓ ah ge lalle, za pãa daŋ mo ɓaara ko pǝ wul ne tǝsal fahfal jul lalle. 36 Za zaŋra ko gin zahjul pǝ̃ǝ ge lal ne ko, ira ko ge lal ne ɓaa ko ne tǝsal tǝgbana mai Dǝɓlii mo faa nyi Mosus.
Ɓǝ lai tǝ ɓǝ juu fan tǝ ɓal mbǝro
37 Dǝɓlii faa nyi Mosus: 38 Mo faa nyi za Israel sye, ara ne wee ɓǝǝ ma fahfal ɓǝǝ daŋ mo juura fan tǝ ɓal mbǝro ɓǝǝra, mo gõmra fan juu ah ra daŋ ge gŋ ne suu kǝrãhmo. 39 Ne cok fẽene daŋ we kwo fan juu ah we juu ɓo ɓe, a ga joŋ we ka we foo ɓǝ lai ɓe, we so syee mor ahe. Nai ɓe, we ka ga soɓ me ɓoo ka so syee mor fan cwaa zahzyil ɓii ya. 40 Fan ah a ga joŋ we ka we gbǝ ɓǝ lai ɓe ra daŋ, we ga ciŋ za ma ɓe tǝɗe'. 41 Ame ye Dǝɓlii Masǝŋ ɓiiri, ame zaŋ we pǝ̃ǝ gin sǝr Egiɓ ne ko, mor ka me yea Masǝŋ ɓiiri. Ame ye Dǝɓlii Masǝŋ ɓiiri.
© Bible Moundang © Alliance Biblique du Tchad, 1996.
