Fan nyi zaluuri
1 Ne zah'nan mai Mosus mo vǝr yeɓ ur tal mbǝro ma tai ge sǝŋ, so syee nǝm tǝtǝl ahe, nǝǝ tal mbǝro ah ne tǝkine fan yeɓ ah ra, ne cok joŋ syiŋ ne fan yeɓ ah ra daŋ. 2 So zaluu ma morsǝ̃ǝ ban Israel camcam mai mo soɓra ɓǝ kee za jol ɓǝǝ kŋ, 3 gera nyi Dǝɓlii ne fan nyi ɓǝǝra: muŋta dǝǝ yea, wǝǝ dǝǝ zahsol ki jemma tǝtǝl gwa, muŋta dǝǝ ah vaŋno vaŋno daŋ a mor zaluu gwa gwa, dǝǝ ah vaŋno a mor dǝɓlii vaŋno ta. Ne cok mo gera pel Dǝɓlii ne ko, 4 Dǝɓlii faa nyi Mosus: 5 Mo nyiŋ fan nyi ah jol ɓǝǝra, mo nyi nyi Lewitien ka mo joŋra yeɓ ɓǝǝ ne pǝ tal mbǝro ma taini. 6 Mosus woo muŋta dǝǝ ah ne ŋgǝǝri ah ra daŋ nyi nyi Lewitien. 7 Nyi muŋta dǝǝ gwa, ne ŋgǝǝri nai nyi Gersonien, 8 so nyi muŋta dǝǝ nai ne ŋgǝǝri nama nyi Merarien mor faswaa ɓǝǝ a pǝlli. Dǝɓlii ma lwaa ɓǝǝ ye Itamar we pa joŋzahsyiŋ Aron. 9 Amma Mosus nyi fan ki nyi Kehatien ya, mor soɓra ɓǝ fan yeɓ matǝdaŋdaŋ ah ra ɓo jol ɓǝǝra, a woora tǝbǝǝsahe.
10 Zaluu so gera ne fan nyi ɓǝǝ ma mor cok joŋ syiŋ ta. Ne cok mo tǝŋ ginra ne fan nyi ɓǝǝ ma mor cok joŋ syiŋrĩ, 11 Dǝɓlii faa nyi Mosus: Zah'nan Masǝŋ daŋ dǝɓlii vaŋno mo geko ne fan nyi ah ka joŋ syiŋ ne nǝǝ cok joŋ syiŋ ne ko mor Masǝŋ. 12-83 Gera ne fan nyi ɓǝǝ ne patǝtǝl naiko: Zah'nan vaŋno ahe: Naason we Amminadaɓ dǝɓ morsǝ̃ǝ ban Yuda. Zah'nan gwa ahe: Netanel we Zuar dǝɓ morsǝ̃ǝ ban Isakar. Zah'nan sai ahe: Eliaɓ we Helon dǝɓ morsǝ̃ǝ ban Zebulon. Zah'nan nai ahe: Elisur we Sedur dǝɓ morsǝ̃ǝ ban Ruben. Zah'nan dappe ahe: Selumiel we Suriskadai dǝɓ morsǝ̃ǝ ban Simon. Zah'nan yea ahe: Eliasaf we Dǝwel dǝɓ morsǝ̃ǝ ban Gad. Zah'nan rǝŋ ahe: Elisama we Ammihud dǝɓ morsǝ̃ǝ ban Efraim. Zah'nan nama ahe: Gamaliel we Pedasur, dǝɓ morsǝ̃ǝ ban Manasse. Zah'nan doraŋ ahe: Abidan we Gidioni, dǝɓ morsǝ̃ǝ ban Benyaamin. Zah'nan jemma ahe: Ahizer we Amiskadai, dǝɓ morsǝ̃ǝ ban Dan. Zah'nan jemma tǝtǝl vaŋno ahe: Pagiel we Okran, dǝɓ morsǝ̃ǝ ban Asǝr. Zah'nan jemma tǝtǝl gwa ahe: Ahira we Enan, dǝɓ morsǝ̃ǝ ban Naftali.
Fan nyi ɓǝǝ daŋ a zahki zahki: Tahsah ma vãm solai vaŋno, a nǝn kilo ne raita, tahsah vãm solai malaŋ ah yǝk ah a gwari nǝn kilo vaŋno, tǝgbana mai mo cuura ɓo. Ɓǝr ah gwa daŋ sum ma suuki ne nǝm ma mor fan nyi ma farel baa ɓo gŋ gǝɓgǝɓ. So ne tahsah ma vãm kaŋnyeeri mai yǝk ah mo dai raita kilo ya, ɓǝrdi baa ɓo gŋ, ne ŋgǝǝri gŋ, tǝkine kǝbǝr wolle, ne we pǝsãhm ma joŋ syii tǝ vaŋno, mor ka joŋ syiŋ suŋwii. So kǝdai wol gŋ mor ka joŋ syiŋ ma ɓaŋ faɓe' ga lal ne ko, ne ŋgǝǝri gŋ gwa kpǝ, ne kǝbǝr wol dappe ta. So ne kǝdai wol dappe, ne wee pǝsǝ̃ǝ ma joŋ syii tǝ vaŋno vaŋno gŋ dappe ka joŋ syiŋ ma nyi jam ne ko.
84-88 Pãa fan nyi mai zaluu matǝ jemma tǝtǝl gwa mo nyira mor joŋ yeɓ tǝ cok joŋ syiŋ a naiko: Tahsah ma vãm solai jemma tǝtǝl gwa, tahsah manyee ah ma vãm solai a jemma tǝtǝl gwa ta, vãm ah daŋ yǝk ah nǝn kilo jemma gwa tǝtǝl rǝŋ. Tahsah manyee ma vãm kaŋnyeeri a jemma tǝtǝl gwa, ɓǝrdi baa ɓo gŋ gǝɓgǝɓ daŋ, vãm kaŋnyeeri ah daŋ yǝk ah a gwari nǝn kilo vaŋno ne raita. Ŋgǝǝri ah jemma tǝtǝl gwa, ne kǝbǝr jemma tǝtǝl gwa, ne wee pǝsǝ̃ǝ ma joŋ syii tǝ vaŋno vaŋno jemma tǝtǝl gwa ta, tǝkine fan nyi ma farel moo nyira ne ko. Mai daŋ a mor ka joŋ syiŋ suŋwii. Kǝdai wol jemma tǝtǝl gwa ma mor joŋ syiŋ ma ɓaŋ faɓe' ga lal o, ne ŋgǝǝri gŋ jemma gwa tǝtǝl nai, ne kǝbǝr wol jemma yea, kǝdai wol laŋ jemma yea, ne wee pǝsǝ̃ǝ ma joŋ syii tǝ vaŋno vaŋno jemma yea ta. Mai daŋ a mor ka joŋ syiŋ ma nyi jam.
89 Koo nekẽne daŋ Mosus mo dan ge pǝ tal mbǝro ma tai ka faa ɓǝ ne Dǝɓlii ɓe, a laa kyaŋ Dǝɓlii faa ɓǝ nyi ko daga sǝŋ pǝ cok rwah faɓe' mai mo kan ɓo tǝ sunduku gbanzahe, kǝsyil cerubim matǝ gwa, Dǝɓlii a faa ɓǝ gŋ ne ki.
© Bible Moundang © Alliance Biblique du Tchad, 1996.
