Za Israel 144.000
1 Fahfal ahe, me kwo angeloi nai uura ɓo tǝ nyah sǝr nai daŋ, gbahra zyak sǝr nai daŋ ɓo jolle, mor ka zyak mo kuu tǝ sǝr ne tǝ bii tǝkine tǝ kpuu ka. 2 Me kwo angelos maki ah ur gin mor com zah'nan ge, a ne lamba Masǝŋ ma ne cee jolle. Ɓyaŋ ɓǝ ne kyaŋ lii wo angeloi matǝ nai mo lwaara swah ɓo ka ɓeɓ sǝr tǝkine mabii, faa: 3 We ɓeɓ sǝr ne mabii tǝkine kpuu ka ba, sai na kan lamba zahpel za yeɓ Masǝŋ man daŋ ɗao. 4 Cuura pãa za mai mo kanra lamba Masǝŋ ɓo zahpel ɓǝǝ nyi me, ara ujenere temere ne jemma nai tǝtǝl nai, zan ah pǝ zahban za Israel daŋ. 5 Ban Yuda mai mo ne lamba ara ujenere jemma tǝ gwa, ban Ruben ujenere jemma tǝ gwa, ban Gad ujenere jemma tǝ gwa, 6 ban Asǝr ujenere jemma tǝ gwa, ban Naftali ujenere jemma tǝ gwa, ban Manasse ujenere jemma tǝ gwa, 7 ban Simon ujenere jemma tǝ gwa, ban Lewi ujenere jemma tǝ gwa, ban Isakar ujenere jemma tǝ gwa, 8 ban Zebulon ujenere jemma tǝ gwa, ban Yuseɓ ujenere jemma tǝ gwa, ban Benyaamin ujenere jemma tǝ gwa.
Za pǝpãare
9 Fahfal ah me ẽere, me kwo za pǝpãare, dǝɓ ma gak kee za mai mo no pǝ cok ah kǝka, zan ah daga za sǝr daŋ, zahban daŋ, za daŋ, ne zah camcam daŋ, uura ɓo pel fakal ne pel Wepǝsãhmme, ɓaara mbǝro ɓo pǝfãi, ara ne goo mǝnǝǝ jolle. 10 Ŋwaara ɓǝ ne kyaŋ lii zahki daŋ faara: ǝ̃ǝ man gee wo Masǝŋ man mai mo kaa ɓo tǝ fakal tǝkine Wepǝsãhm ge! 11 Angeloi daŋ uura ryaŋ fakal ɓoo kǝsyilli, ne zaluuri, tǝkine fan ma ne cee matǝ nai. So keara ge sǝŋ pel fakalle, ɗǝmra zahpel ge tǝ sǝrri, juura pel wo Masǝŋ, 12 faara: Amen! Osoko, yǝkki, fatanne, yiini, ne swahe, tǝkine swah suu daŋ mǝ Masǝŋ man ye ga lii ga lii! Amen.
13 Dǝɓ vaŋno kǝsyil zaluu fii me: Za mai mo ɓaara mbǝro mafãi ah ɓo za kẽe ye ne? Gera gin kẽe ge ne? 14 Me zyii faa nyi ko: Me tǝ ya dǝɓlii ɓe, amo ye tǝ ɓo. So faa nyi me: Ara ye za mai mo pǝ̃ǝra ɓo gin pǝ bone malii, vãhra mbǝro ɓǝǝ ɓo, joŋra mbǝro ɓǝǝ ɓo pǝfãi ne syim Wepǝsãhmme. 15 Mor ah uura ɓo pel fakal Masǝŋ ka joŋ yeɓ mor ah ɓǝr yaŋ ah com ne suŋ daŋ. Dǝɓ mai mo kaa ɓo tǝ fakal ako ye ga byak ra ne suu ahe. 16 Koŋ tǝkine koŋ bii ka ga i ra yao syaŋsyaŋ, com ka ga cwah ra ya, cok ka ga lǝǝ wo ɓǝǝr ao ta. 17 Mor Wepǝsãhm mai mo kǝsyil fakal ako ye ga yea pakǝpii ɓǝǝra, a ga nĩi ra ga zahbiikyaŋ ma ne cee ne ko. Masǝŋ ga tah mĩi nahnǝn ɓǝǝ daŋ ga lalle.
© Bible Moundang © Alliance Biblique du Tchad, 1996.
