Syii 'yakke
(CuuƁ 15:1-11)1 Dǝɓlii faa ɓǝ nyi Mosus tǝ waa Sinai: 2 Mo faa nyi za Israel sye: Ne cok we ge dan pǝ sǝr mai Dǝɓlii mo tǝ ga nyi nyi we ɓe, we soɓ sǝr ah 'yak ne syii patǝ rǝŋ ahe, mor ka yii Dǝɓlii ne ko. 3 Kǝsyil syii yea we pǝǝ 'wah ɓii ne ko, we zyeɓ jol kpuu vin ɓiiri, tǝkine tai fagwahl ɓii ne daŋ. 4 Amma ne syii patǝ rǝŋ ah we soɓ sǝr 'yak ne ko, syii ah mǝ Dǝɓlii yo, we ruu fan pǝ 'wah ɓii ne syii ah wala zyeɓ kpuu vin 'wah ɓii ne ka. 5 We ce sor mai we ye ka ruu ya mo ciŋ suu ah ɓo ka, wala we ŋhǝǝ lee kpuu vin 'wah ɓii mai we zyeɓ mor ah ɓo ya mo so lee ɓo ka ta, syii ah syii mai ka sǝr mo 'yak ne yo. 6 Fakpãhpǝǝ mai 'wah ɓii mo joŋ ɓo we kǝsyil syii matǝ yea we gak re, ne byak ɓii ra, ne za yeɓ ɓiiri, tǝkine za gwǝǝ mai mo kaara ɓo kǝsyil ɓiiri, 7 ne faɓal ɓii ra, tǝkine nǝǝ cok mai mo pǝ sǝr ɓii daŋ. Fan mai 'wah ɓii mo joŋ ɓo daŋ we gak re.
Syii rõmme
8 We kee syii rǝŋ, zahlǝŋ rǝŋ, syii jemma nai tǝtǝl doraŋ yo. 9 Ne zah'nan jemma, pǝzyil fĩi patǝ rǝŋ ahe, zah'nan ma ɓaŋ faɓe' ga lal o, we pee dǝɓ vaŋno mo kyãhko ul kokõorĩi pǝ sǝr ɓii ne lii ah daŋ. 10 We nǝǝ syii jemma dappe ahe, we lai ɓǝ pǝ sǝr ɓii ne lii ah daŋ, koo zune mo yeako ne tǝtǝl suu ahe. Ne cok syii ah koo zune mo yea tǝ joŋ byakke, mo jinko ge 'wah ahe tǝkine wo zan ahe. 11 Syii jemma dappe ah syii rõm ye wo ɓiiri. We ruu 'wah ɓii ne syii ah ka, we ce sor mai we ye ka ruu ya, mo ciŋ suu ah ɓo ka, we ŋhǝǝ lee kpuu vin 'wah ɓii mai we zyeɓ mor ah ɓo ya mo so lee ɓo ka ta. 12 Syii ah ne lii ah daŋ a pǝsãh wo ɓiiri, we ga re fakpãhpǝǝ mai mo joŋ ɓo nyi we lal hai to.
13 Pǝzyil syii ah koo zune mo jinko 'wah ah nyi zan ahe. 14 Ne cok we lee 'wah kǝsyil ki ɓe, we joŋ vǝrvǝr wo ki ne ɓǝ ah ka. 15 We ŋgoŋ lee ah nǝn pãa syii mai 'wah ah moo gak joŋ fakpãhpǝǝ nyi we, ŋhaa ka dai syii rõm maki ahe. 16 Syii ah mo pǝpãa pǝlli ɓe, ka lak lee 'wah ah laŋ mo yea pǝ'man nje ta, amma syii ah mo ka pǝlli ya ɓe, ka lak lee ah laŋ mo yea pǝlli ka, we nǝǝ ge lal ta, mor we lelee ah ɓo nǝn pãa syii mai 'wah ah mo joŋ fakpãhpǝǝ. 17 We joŋ vǝrvǝr kǝsyil ki ka, amma we ɗuu Dǝɓlii Masǝŋ ɓiiri.
Ɓǝ matǝ ɓǝ syii patǝ rǝŋ ahe
18 We syee mor ɓǝ lai Masǝŋ ne ɓǝ cuu ah ra daŋ, mor ka we kaa pǝ sǝr ah jam. 19 Sǝr ah a ga lee syẽm kpuu nyi we, we ga lwaa fan mai daŋ zahzyil ɓii mo 'yah ka renne, so we ga kaa gŋ jam.
20 Amma maki dǝɓ ki ga fifii faa: Na ga re fẽe pǝzyil syii patǝ rǝŋ ah ne? Mor na ka tǝ ga ruu nah fan ga sǝŋ ya, na ka tǝ ga tai fakpãhpǝǝ laŋ ya ta. 21 Ɓǝ ah ga yea naiko: Pǝzyil syii patǝ yea ah Dǝɓlii ga ẽe sǝr ka mo joŋ fakpãhpǝǝ pǝlli, ŋhaa nǝn wol za dai syii gwa. 22 Koo ne cok wee ga ruu nah fan pǝ 'wah ɓii ne syii patǝ nama laŋ, ka we yea matǝ ren fakpãhpǝǝ mai we lwaa ɓo pǝzyil syii patǝ yea ah ren ba, farel ga kii we, ŋhaa a dai zah gwahl mai we ga tai fakpãhpǝǝ ɓii ne ta.
Lee sǝrri
23 We ka gak ɓaŋ 'wah ɓii lee fan ne ga lii sǝ ya, mor ma ɓii ye ka, mǝ Masǝŋ yo, awe tǝgbana za gwǝǝ mai mo ɓaŋko we ɓo tǝ joŋ yeɓ sǝr mai to.
24 Ne cok dǝɓ mo lee fan ne 'wah ah ɓe, so mo 'yahko ka jin lee comki ɓe, fahlii ah no. 25 Dǝɓ Israel syak mo joŋko lee fan ne 'wah ah ɓe, ka zum ah matǝ gwari mo so jinko lee 'wah ahe. 26 Dǝɓ ah mo ka ne zum ma so jin lee 'wah ah ya ɓe, maki dǝɓ ah ga lwaa fan pelle, ka mo so jin lee 'wah ah ne ko ne suu ahe. 27 Ka mo sooko dǝɓ mai mo yea lee 'wah ah ɓo nǝn tǝcoŋ syii mai mo coŋ ɓo ka ga dai syii rõmme, mor syii rõm mo dai ɓe, 'wah ah tǝ ga jin ga jol pah ahe. 28 Amma mo ka ne lak nǝn jin lee 'wah ah ya ɓe, ka dǝɓ mai mo leeko 'wah ah ɓo mo kaako ne ŋhaa dai syii rõm maki ahe. Ka syii ah mo ge dai ɓe, mo soɓko 'wah ah nyi pah ah matãa tǝkolle.
29 Ne cok dǝɓ mo ɓaŋ yaŋ ah lee fan ne pǝ yaŋ malii ma ne ɓaale ɓe, a no ne fahlii ka so jin lee yaŋ ah pǝzyil syii moo mo ɓaŋko lee fan ne ko. 30 Amma mo gakko ka jin lee pǝzyil syii ah sǝ ya ɓe, ka ka ne fahlii ka so jin lee yao ga lii o. Ka yaŋ ah ciŋ mǝ pa ma lee jol ah ɓo ne morsǝ̃ǝ ah ga lii. Koo syii rõm mo ge dai laŋ, ka jin lee kpee yao. 31 Amma mǝ yaŋ ma lal mai mo ka ne ɓaale ya, we joŋ ɓǝ ah tǝki vaŋno ne ɓǝ 'wahe, pah ah a no ne fahlii ka so jin lee yaŋ ahe. Syii rõm mo ge dai ɓe, ka mo jinra yaŋ ah nyi pah ah tǝkolle. 32 Lewitien laŋ ara no ne fahlii ka jin lee yaŋ ɓǝǝ mai mo leara fan ɓo ne ko pǝ yaŋ maluu mai Lewitien mo kaara ɓo gŋ, koo ne cok fẽene daŋ. 33 Lewitiyo mo ɓaŋ yaŋ ah pǝ yaŋ malii ma ne ɓaale lee fan ne ko, mo gakko ka so jin lee ya ɓe, syii rõm mo ge dai ɓe, ka mo jinra yaŋ ah nyi ko. Mor yaŋ Lewitien mai mo pǝ yaŋ ɓǝǝ maluu ra, zah faren ma ɓǝǝ ye kǝsyil za Israel ga lii ga lii. 34 Amma cok pii fan mai mo kah yaŋ maluu mǝ Lewitien mo ɓaŋra lee fan ne ka syaŋsyaŋ, mor sǝr ma ɓǝǝ ye ga lii ga lii.
Ɓǝ nyi val nyi pa syakke
35 Dǝɓ Israel na mo, mo pǝsyak mo ka gak wol suu ah ya ɓe, sai mo gbah jol ah tǝgbana mai moo gbah jol dǝɓ gwǝǝ ta, a gak kaa kah ɓo. 36 Mo nyi val lak nyi ko ɓe, mo ɓoo reba ge nyi ko gŋ ka. Mo ɗuu Masǝŋ, mo soɓ naa pa ɓo kaa kah ɓo. 37 Mo nyi val lak nyi ko ɓe, mo so ɓoo reba ge nyi ko gŋ ka. Mo nyi farel nyi lee, mo fii reba ge tǝl ah ka. 38 Ɓǝ lai mai ɓǝ lai Dǝɓlii Masǝŋ ɓii mai mo zaŋ we gin sǝr Egiɓ pǝ̃ǝ ne ko mor ka nyi sǝr Kanaan nyi we, ka mo so yeako Masǝŋ ɓii yo.
Wǝǝ byakke
39 Naa pa ɓo masyak mo ɓaŋ suu ah lee ge jol ɓo na byak ɓe, mo soɓ ko joŋ yeɓ byak ka. 40 Mo kaako wo ɓo tǝgbana dǝɓ yeɓɓe, wala dǝɓ gwǝǝre, mo joŋko yeɓ ne mo ŋhaa syii rõm mo ge dai. 41 Ne cok ah sǝ, ako ga soɓ mo ne wee ah daŋ ka ga wo zahzum ahe, pǝ cok mǝ pamlii ra. 42 Za Israel ara ye byak Dǝɓlii, ako ye zaŋ ra gin sǝr Egiɓ pǝ̃ǝ ne ko, mo leera ki na byak ka. 43 We joŋ ra pǝɓe' ka, amma we ɗuu Masǝŋ ɓiiri. 44 We tǝ 'yah ka lee byak ɓe, we ge lea jol za sǝr mai mo kaara ryaŋ we ɓo. 45 So we gak lea wee za gwǝǝ mai mo kaara ɓo kǝsyil ɓiiri, wee ma morãi mo bemra ɓo pǝ sǝr ɓiiri, we gak ciŋ ma ɓii ne ko. 46 We gak soɓ wee ɓii re yaŋ ne ko, ka mo joŋra yeɓ nyi ra ga lii ga lii. Amma we joŋ ki kǝsyil ki pǝɓe' ka.
47 Maki dǝɓ gwǝǝ mai mo kaa ɓo kah ɓo mo ciŋ pa joŋ ɓe, so naa pa ɓo masyak mo kaa ɓo kah ahe, maki a ɓaŋko suu ah lee fan ne ga mor jol ahe, 48 fahlii no ka dǝɓ mai mo kǝsyil zahzum ah mo jin lee dǝɓ ahe, 49 koo mo naa mam wala naa pam yo, wala mo zahzum ah matǝ gwari maki ah yo, mo jin leeko dǝɓ ahe. Koo ako ne suu ah ye moo gak jin wǝǝ suu ahe, ka mo wǝǝko. 50 Mo zyeɓko ɓǝ ah ne dǝɓ mai mo lee ko ɓo. Mo kee syii ah daga ne cok mai mo leeko suu ahe, ŋhaa mo ge dai syii rõmme, ka mo cuura soo ah tǝgbana mai za moo soo dǝɓ ma joŋ yeɓ mor lakre. 51-52 Sai mo sooko lak nǝn pãa syii mai mo coŋ ɓo ka dai syii rõmme, koo syii ah mo coŋ ɓo pǝpãare, wala mo ka pǝpãa ya daŋ, 53 soo ah mo yea tǝgbana soo dǝɓ yeɓ moo lwaa pǝzyil syii daŋ. Amma pah yaŋ ah mo joŋ ko pǝɓe' ka. 54 Mo gakko ka wǝǝ suu ah ne fahlii marai ya ɓe, ako ne wee ah daŋ, syii rõm mo ge dai ɓe, sai mo wǝǝra ra myah kalle. 55 Za Israel mo syeera mor ɓǝ lai maraiko, mor ara ye byak Dǝɓlii, ako ye zaŋ ra gin sǝr Egiɓ pǝ̃ǝ ne ko, ako ye Dǝɓlii Masǝŋ ɓǝǝra.
© Bible Moundang © Alliance Biblique du Tchad, 1996.
