Jeremias fifii zah Dǝɓlii
1 Dǝɓlii, me tǝ faa ɓǝ ne mo ɓe, goŋga ma ɓo a ga uu, amma ne daŋ laŋ me 'yah fifii zah ɓo tǝ ɓǝ kiita. Mor fẽe za faɓe' a yeara jam ne? Mor fẽe za matǝ vǝrvǝr a yeara ne pejii pǝ fan joŋ ɓǝǝ ne? 2 Amo pea ra ge sǝŋ, so ara laŋ jwǝǝra sǝ̃ǝre, giŋra, so leera syẽmme, a faara ɓǝ ɓo pǝ zah ɓǝǝ cẽecẽe, amma so ka ɓaŋra syiŋ ɓo 'manna 'manna ya. 3 Amma Dǝɓlii, amo tǝ me ɓe, amo kwan fan joŋ ɓe no, mo tǝ ɓe, me 'yah mo. Mo kwak za faɓe' rai tǝgbana pǝsǝ̃ǝ mai za moo kwakra ga cok ŋgoŋ ne ko, mo ŋgee ra rǝk nǝkah cam ŋhaa ka zah'nan ŋgom ɓǝǝ mo ge dai. 4 Sǝr ɓuu ga yea pǝyak nai ga lii ne? Fãa mai mo pǝ 'wah daŋ a ga rẽe nai ga lii ne? Faɓal ne juu daŋ tǝ wukra, mor faɓe' za mai mo kaara ɓo pǝ sǝr maiko, moo so faara mo tǝ ɓǝ fan joŋ ɓǝǝr a.
5 Dǝɓlii faa nyi me: Jeremias, lii zah maɗul ne dǝfuu mo tǝ gaɓ mo ɓe, mo so gak lii ne pǝr suu ɗǝne? Ne cok mo laa suu ɓo pǝ'nyah pǝ sǝr mai mo jam ya, amma mo gak ga kaa kǝsyil kpuu matǝ mbaŋmbaŋ ah kah el Yordan ɗǝne? 6 Koo wee pa ɓo, za yaŋ pa ɓo mai ara ye mo zum ɓo, mo kaara tǝkor ɓo, mo taira zah joŋ ɓǝɓe' wo ɓo, mo so tǝ faara ɓǝ 'nyah nyi mo laŋ, mo nyiŋ ɓǝ ɓǝǝ ka.
Dǝɓlii tǝ swaa ɓǝ zan ahe
7 Dǝɓlii faa: Ame soɓ za ɓe ɓe, ame ɓoo za mai me nǝǝ ra ɓo kŋ ge lal ɓe, me soɓ za mai me 'yah ra ge mor jol za syiŋ ɓǝǝ ɓe. 8 Za ɓe mai me nǝǝ ra ɓo, so urra ɓo ne me tǝgbana ɓol moo ur ne dǝɓɓi, a ɓyaŋra ɓǝ tǝ ɓe o, mor ah me so syiŋ ra ɓo. 9 Za ɓe mai me nǝǝ ra ɓo, ara tǝgbana papǝlamma mai papǝlamma manyeeki ah moo taira tǝl ah moo faara: Fafyãh cokki, we ge tai ne ru na joŋ fĩi. 10 Za goŋ pǝ sǝr camcam nyiŋra 'wah kpuu vin ɓe, dahra 'wah ɓe ne ɓalle, joŋra sǝr ɓe mai me 'yah ɓo so ciŋ cok kolle. 11 Joŋra sǝr ah na fan kolle, ɓeɓ ɓe, ciŋ fan ki pel ɓe yao, sǝr ah ne lii ah daŋ ciŋ cok kol ɓe, dǝɓ ma ɓaŋ syiŋ ah kǝkao. 12 Za ma nyiŋra cok gera ɓo pǝ cok ma tǝgee ah ra camcam, mor me pee sal ɓo ka ɓeɓ sǝr ah ne lii ah daŋ, koo dǝɓ vaŋno laŋ ka ga kaa jam ya. 13 Za ɓe ruura sorre, amma so fer ciŋ waa. Joŋra yeɓ pǝlli, amma lwaara fan ki ya, mor kpãh mai me ɓaŋ ɓo tǝ ɓǝǝra, ako ye joŋ lwaara fakpãhpǝǝ ya.
Dǝɓlii faa ɓǝ tǝ za jǝk Israel
14 Dǝɓlii faa: Ame no ne ɓǝ ka faa tǝ za jǝk Israel maɓea mai mo ɓeɓra sǝr mai me nyi ɓo nyi za ɓe Israel. Me ga nĩi ra gin pǝ sǝr ɓǝǝ kal tǝgbana me tǝ ga nĩi za Yuda gin pǝ sǝr ma ɓǝǝ kal ta. 15 Amma fahfal me woo ra kal ne ɓe, me so ga kwo syak tǝ ɓǝǝra, me ga zaŋ ra pii soo ge pǝ cok ɓǝǝ ne ko, zune daŋ a ga pǝ sǝr mǝ ahe. 16 A ga feera zah fan joŋ za ɓe, a ga haara zah ne faa: 'Manna, tǝgbana Masǝŋ mo no sǝŋ, na mai mo yea tǝ cuura nyi za ɓe ka haa zah ne Ba'al ta. Mo joŋra nai ɓe, a ga yeara ne faren kǝsyil za ɓe, a ga laara pǝ'nyahre. 17 Amma za sǝr mai mo zyiira ka laa zah ya ɓe, me ga muŋ zah ahe, me vǝr ra tǝɗe'. Ame Dǝɓlii me faa naiko.
© Bible Moundang © Alliance Biblique du Tchad, 1996.
