Masǝŋ ga ŋgoŋ kiita tǝ sǝr Egiɓ
1 Ɓǝ ma faa tǝ sǝr Egiɓ a naiko:
Dǝɓlii yee ɓo tǝ swãh tǝ gin tǝ sǝr Egiɓ ne ne hǝǝre. Masǝŋ Egiɓien coora pel ah coo, zahzyil nǝǝ za sǝr Egiɓ ne lii ɓǝǝ daŋ. 2 Dǝɓlii faa: Me ga ur sal yaŋ kǝsyil za sǝr Egiɓ, wee pa tǝ vaŋno ga ruura sal wo ki, jǝk ne wajǝk ah a ga ruura salle. Yaŋ maluu ma 'yah yǝk a ga ruura sal wo ki. Za goŋ ma 'yah ru kal goŋ maki ah a ga ruura sal wo ki mor ka lwaa cokki. 3 Me ga ɓeɓ ɓǝ mai Egiɓien mo zyeɓra ɓo, me ga muŋ yella ɓǝǝra. A ga fiira masǝŋ ki ɓǝǝ ka mo gbah jol ɓǝǝra, a ga fiira za yiila tǝkine mǝǝzuwuŋ za wul ka mo cuura yella nyi ra. 4 Me ga soɓ Egiɓien ga jol dǝɓ magaɓ ah mai mo pǝɓe' yee ga kaa goŋ tǝ ɓǝǝra. Dǝɓlii ma ne swah daŋ faa naiko.
5 Bii el Nil ga ǝŋ, bii ma pǝ zǝǝ a ga yak tǝɗe'. 6 El daŋ bii ah ga ǝŋ, so a ga fuŋ ndǝ̃ǝ. Var tǝkine kee daŋ a ga yakke. 7 Fãa tǝkine fakpãhpǝǝ mai mo pǝǝ ɓo kah el Nil daŋ a ga yak curcur, zyak ga woo kal ne ko. 8 Za mai zah yeɓ ɓǝǝ ye mo gbah syiŋ moo gbahra syiŋ pǝ el Nil daŋ, a ga 'meera 'meere, a yera yee, kǝṽǝl ɓǝǝ ne jin ɓǝǝ daŋ ka ga yea ne yeɓ yao. 9 Za mai moo danra mbǝro tǝkine za ma kaŋ zyim daŋ swãa ga re ra. 10 Zahzyil ga nǝǝ za ma kaŋ zyim ne za ma joŋra yeɓ mor lak daŋ.
11 Zaluu yaŋ Zoan ara pǝ tǝgwĩi. Za fatan sǝr Egiɓ a cuura yella ma tǝgwĩi ah nyi zana. A gak faara nyi goŋ ɗii ŋ ara ye za ma pǝ cok za fatan ma kǝpelle tǝkine za goŋ daŋ ne? 12 Goŋ Egiɓ, za fatan ɓo mai moo cuura fan ma ga joŋ pel nyi mo kŋ kẽne? Ɗah maki a gak faara ɓǝ fan mai Dǝɓlii ma ne swah daŋ mo foo ɓo ka joŋ wo sǝr Egiɓ nyi mo no ne? 13 Zaluu yaŋ Zoan ne Mamfis ara pǝ tǝgwĩi. Lǝŋra rǝ gak gbah jol za sǝr ahe, amma so muŋra sǝr ahe. 14 Dǝɓlii joŋ ra ka mo cuura yella ma kiŋ tǝtǝl ah nyi za sǝr Egiɓ ka zyak ra pǝ yeɓ joŋ ɓǝǝ daŋ tǝgbana pa ma zwan yim tǝǝ ne mo ka yea ne tǝtǝl a, moo swan tǝ zah zwǝǝ ah mo zwǝǝ ɓo. 15 Koo dǝɓ vaŋno pǝ sǝr Egiɓ pa joŋne wala pa syakke, dǝɓ malii ah wala malaŋ ahe, mai moo gak gbah jol kǝka.
16 Zah'nan ah no ginni, ne cok ah za sǝr Egiɓ ga yeara na ŋwǝǝre, ne cok mo kwora Dǝɓlii ma ne swah daŋ mo zyeɓ suu ɓo ka ŋgoŋ kiita tǝ ɓǝǝ ɓe, a ga coora ne gal kpakkpakke. 17 Sǝr Yuda a ga yea na fan ma ren gal ah wo za sǝr Egiɓ. Ne cok ah dǝɓ vaŋno kǝsyil ɓǝǝ mo faa ɓǝ sǝr Yuda ge zah ɓe daŋ, a ga coora coo ne galle, mor ɓǝ mai Dǝɓlii ma ne swah daŋ mo zyeɓ ɓo ka joŋ wo ɓǝǝra.
18 Ne cok zah'nan ah mo ge ɓe, a ga faara zah Yahuduen pǝ yaŋ Egiɓien maluu camcam dappe. Za yaŋ ah ra ga haara zah ne tǝɗii Dǝɓlii ma ne swah daŋ. A ga ɗiira yaŋ vaŋno kǝsyil yaŋ ah ra ne yaŋ Comme.
19 Ne cok zah'nan ah mo ge ɓe, cok joŋ syiŋ wo Dǝɓlii a ga yea pǝ sǝr Egiɓ, a ga peera tǝsal ma foo ɓǝ Dǝɓlii gŋ pǝ zahsyee sǝr ahe. 20 Fan ah ra a ga yea na fan ma cuu: Dǝɓlii ma ne swah daŋ a no pǝ sǝr Egiɓ. Ne cok za ki mo ge tǝ cuura bone nyi ra, so mo yera yee ɗii Dǝɓlii mor ka fii gbah jol ɓe, a ga pee dǝɓ ki ge ka ǝ̃ǝ ra. 21 Dǝɓlii ga cuu suu ah nyi za sǝr Egiɓ, ne cok ah a ga tǝra ko, a ga juura pel pel ah ne ŋgom fan joŋ syiŋ wol ah ne tǝkine nyi fan nyi ko. A ga haara zah pel ahe, so a ga joŋra fan mai mo faara ɓǝ ah ɓo baa ga cok ahe. 22 Dǝɓlii ga ŋgoŋ kiita tǝ za sǝr Egiɓ, amma so a ga joŋ ra kaa jam. A ga piira soo ge wol ahe, so a ga laa juupel ɓǝǝra, a ga laɓ ra.
23 Ne cok zah'nan ah mo ge ɓe, fahlii lii ga yea kǝsyil sǝr Egiɓ ne Asiria. Za sǝr matǝ gwa mai a ga kyãhra kǝsyil ki so a ga juura pel wo Dǝɓlii cok vaŋno. 24 Ne cok zah'nan ah mo ge ɓe, Israel ga yea zahki ne Egiɓ ne Asiria. Mor za ma tǝ sǝr rai ẽe ga yea tǝ za sǝr daŋ. 25 Dǝɓlii ma ne swah daŋ ga ẽe ra, a ga faa: Za Egiɓ, me ga ẽe we za ɓe. Awe za Asiria mai me joŋ we, me ga ẽe we. Awe za Israel mai me nǝǝ we ɓo, me ga ẽe we.
© Bible Moundang © Alliance Biblique du Tchad, 1996.
